Nations Bible

Psalms 38

God Nuye Kunwok · Tap a verse to see its cross-references.

Bu King David Di Yiwarrudj.

1Yawey, bu yiyiddung ngardduk, wanjh yuwn bu kanmarneyime, bu kanwernhdung. 2Ngaye ngakanjbabang kore ngudda yiman kandulubun bunarra dorrengh ke, nawu ngudda yiman kanwidjbihkeng wernkih duninjh.

3Ngaye ngabekkarren kanjdji kore kunburrk ngardduk bu ngahngoreng, bu ngudda kanhdung. Bu ngaye ngabakkeng mankarre ke, dja mak ngawarreworrinj. 4Ngaye wanjh kunwarre ngadjalyimi, dja mak ngakukburrburreni munguyh bu ngaye ngawarre, warridj ngakangewarre duninjh.

5Ngaye nawu ngadjalwarre bininj dja mak ngabengwarrminj, wanjh kunmekbekenh kunu ngaye ngamokwernminj, dja mak ngamoknudminj. 6Ngaye nawu nganjilngwarre dja mak ngangudjyawarren. Ngaye nganalkkihre kore kundowikenh ngarre bu kunbarnangarrakuyeng. 7Mak ngababang kore kunbodme ngardduk, dja mak kunburrk ngardduk ngawarremen. 8Ngaye ngangudjyawarren munguyh, warridj minj ngarayekworren. Kaluk ngaye ngadjalkongiburren dja mak ngadjalkangewarre duninjh.

9Ngudda nawu kanmarnewohrnan, ngudda kankangenan kanjdji duninjh kore kukange ngardduk, dja mak yiburrbun nawu njalehnjale ngaye ngadjare. Ngudda nawu kanbekkan kore ngangolekwerren. 10Yoh, ngahngurlbekkarren bu wernkih ngangurlhwokdi. Ngaye nawu ngangudjyakmen, dja mak ngamimwarremen, minj ngawernhbolknan. 11Ngaye ngamokwernhminj nawu bininj ngardduk bedda ngandibawon, minj kabirrimre darnkih kore ngaye. Nawu bininj ngardduk namud bedda minj ngadimyikan ngaye. 12Nawu bininj ngarriyidko bedda kabirridjare ngandibun, dja mak ngandimarnekunidi. Bu bedda ngandiyolyolme bu yimankek ngandiwarrewon. Bu barnangarrakuyeng nawu bedda kabirrikarremarnbun bu ngandikowekenh.

13Ngaye yiman nawu ngabengwarr yerrih dja mak minj ngabenbekkan kore kunwok bedberre. Ngaye yiman nawu ngawokwarre, minj ngabenmarnewokdi kore bedda. 14Yoh, ngaye minj ngawokdi bedberre mak minj ngabenwokbekkan. 15Ngaye wanjh ngabengyirri dja mak madbun ngudda Yawey! Ngudda nawu kanwokmarrkmang, nawu God ngardduk Yiwohrnan rowk. 16Ngaye marneyimeng, “Yuwn yibenbawon bu bedda ngandimarneburlumerren, dja mak ngandidjekmiwon bu ngaye ngayirrebme.”

17Wanjh bolkkime bu ngaye ngabekkarren ngayirrebme bu ngamankan. Dja ngadjakbekkan munguyh. 18Wanjh ngaye ngawarnyakmulewarren kore kunwarre ngayimi. Ngaye nawu ngadjalkangewarre kore kunwarre ngardduk. 19Ngabenhkarrme birriwern bininj nawu ngarriyidko, bedda birringudjbang duninjh. Nawu bedda ngandiwirrihme bu burudjang, nawu birriwern. 20Bininj nawu kunmak ngaye ngabenmarnekurduyime, wanjh bedda kabirriborledme dja ngandiwarrewan. Mak bu ngaye kunmak ngakurduyime, wanjh bedda ngandiwirrihme.

21Ngudda Yawey, yuwn bu kanbawon. Yuwn bu djarreh yihdi, ngudda nawu God ngardduk. 22Yimray werrknin ba bu kanbidyikarrme, ngudda Yiwohrnan, ba bu kanngehke.

Artistic illustration — an interpretation, not a historical record.

Did you know?

A Lament of Affliction and Confession

  • The superscription designates this chapter as a psalm of David for remembrance. In it, the psalmist vividly describes deep bodily suffering, including festering wounds, burning pain, and failing vitality, which he connects directly to his own sin and divine discipline.Sources: the Bible text itself
  • The psalm highlights the social isolation that often accompanied illness in the ancient world. Close companions and relatives keep their distance from his affliction, while adversaries take advantage of his vulnerability to plot against his life.Sources: the Bible text itself

Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.

Credits and license for this translation
God Nuye Kunwok
The Holy Bible in the Kunwinjku language of Australia
copyright © 2018 Bible Society of Australia
Language: Kunwinjku (Gunwinggu)
This translation is made available to you under the terms of the
Creative Commons Attribution-Noncommercial-No Derivatives license 4.0.
You may share and redistribute this Bible translation or extracts from it in any format, provided that:
You include the above copyright and source information.
You do not sell this work for a profit.
You do not change any of the words or punctuation of the Scriptures.
Pictures included with Scriptures and other documents on this site are licensed just for use with those Scriptures and documents.
For other uses, please contact the respective copyright owners.
2026-04-02

Source: http://ebible.org/gup/ · eBible.org

Talk to us

Tell us where you read from, how the Bible has helped you, or what we could improve. We read every message.