Nations Bible

Psalms 37

God Nuye Kunwok · Tap a verse to see its cross-references.

Bininj Birrimak Dja Mak Bininj Birriwarre.

1Namud ngardduk, yuwn bu ngurrinjilngwarremen nawu bininj birriwarre bedberre. Dja yuwn bu ngurribenkirnwe bininj nawu kabirrikurduyime kunwarre. 2Nawu birriwarre bininj nakka yiman kayime kundalk manbu kahdarlehmen. Kaluk bedda yiman kayime mandalkmak, wanjh karralkdarlehmen.

3Ngudda wanjh ngurridjalkangekurrmerren kore Yawey, dja mak ngurridjalkurduyimen kunmak. Bu ngurridjaldi kamak rowk kore kondah kurorre. 4Ngudda ngurrinjilngmarnburrimen kore Yawey nuye. Djal nungka nawu ngunwon kore kunmakmak ngudda ngurrihdjare.

5Ngurrikurrmerrimen kore Yawey nuye ba bu ngunbolhbukkan dja mak ngunnahnan. Ngurridjalkangekurrmerren kore nungka, dja mak ngunmarnekurduyime kore kunmakkenh. 6Kaluk nungka ngunmarnbun ngudberre ba bu ngudda bininj ngunmak wanjh, birriwern bininj bedda kabirrinan kore kunmakkenh! Nungka nawu ngundjadme bu ngunmakwankenh, bu ngurrbenmarnebolkwolkan yiman kayime manbu kundungbang yerrih.

7Ngurridjaldin dja mak ngurrimadbun yeledj nawu Yawey, dja yuwn ngurrinjilngwarremen bininj bedberre nawu kabirrikurduyime kunwarre kore kabirrikarremarnbun. 8Dja yuwn ngurridjalyiddung bedberre. Dja mak yuwn ngurrbenburrbun munguyh. Wardi kunnuka ngudmandeleng ngurrimarnburren bu ngurriyime kunwarre. 9Kaluk birrimekbe nawu bininj birriwarre, nungan God kabendjalngeybularrbun. Ngudda nawu ngurrimadbun nungka Yawey, kaluk nungan ngunbolkwon kunbolk ngudberre.

10Dja med, kaluk bu darnkih kabolkyimerran wanjh bininj nawu birriwarre kabirridjalyakmen. Bu kuhni ngudda ngurrbenyawan, wanjh bonj, minj ngurrbenngalke. 11Nawu bininj minj kabirriburlumerren wanjh bedda kabirribolkmang dja mak kabirringehme, bu kunmodmikenh dorrengh.

12Bininj nawu birriwarre, wanjh kabindihmarnekarremarnbun bu kunwarrekenh bedberre nawu bininj birrimak, dja mak bedda kabindimarneyidmebayerren duninjh. 13Dja Kawohrnan Rowk nungka kabendjekmiwon bininj nawu birriwarre. Kaluk nungka kadjalburrbun nungan kore kabolkyimerran bu nungka kabendjadme bedberre.

14Bininj nawu birriwarre kabirrihkarrme nakimuk mandjawak, dja mak bunarra kabirrikarrme, bu kabindibunkenh nawu birrimarladj dja mak bininj nawu minj birrikuken. Bedda nawu birriwarre kabirridjare kabindibun nawu birrimak bininj. 15Kaluk nawu nakimuk mandjawak kabirrikarrme wanjh kunu bedmandeleng kabirrikangeduluburren. Dja nawu bunarra kabirrihkarrme bedberre wanjh kadjalbakmerren rowk.

16Bininj nawu birrimak minj bedda birrikuken, wanjh kamak rowk! Birriwern bininj nawu birriwarre, wanjh bedda kabirrikarrme nawern, wanjh kawarre duninjh! 17Nawu birriwarre bininj bedberre kundulkarre, kabirridulkarreyakmen rowk. Dja Yawey kabendjalbidyikarrme nawu birrimak bininj.

18Bininj nawu minj kunwarre kabirriyime, wanjh nakka Yawey kabennahnan munguyh. Dja nungan kabenmarnekarrme kunmakmak kore kayingkihkarrme. 19Bu kunrayek kabebme bedberre nawu birrimak bininj, wanjh kabirridjale bu kunmakkenh. Bu mak manme kayakmen kore kunred rowk, wanjh bedda minj kabirrimarrwedowen, dja kabirridjalworrkmiworren.

20Dja nawu birriwarre bininj bedda kabirridjalyakmen rowk. Nawu bininj kabirriyidko Yawey, wanjh bedda kabirridjalyakmen rowk yiman kayime mannguymak, dja mak yiman kundolng kayime kare.

21Nawu birriwarre bininj wanjh kabirridjalmang nawu njalehnjale, dja minj bedda kabindimarnedurndiwe bedberre. Dja ngaleng nawu birrimak bininj bedda wanjh kabirridjalnjilngmak bu kabirriweykan bedberre njalehnjale. 22Yawey nawu kabenmarneyime bininj kunmak, wanjh bedda kabirribolkmang dja kabirrihni kore kunred kunbolkmak. Wanjh Yawey nungan kabenwarrewan nawu bininj, wanjh kunukka nungan kabenngeyburlarrbun bedberre.

23Bininj nawu kabirridjare bedda kabirribolhkadjung nuye Yawey, wanjh Yawey nungan kabenbidyikarrme ba bu minj kabirrimankan. 24Wardi namak nawu bininj bu kabibungwarrewon, wanjh minj nakka kawernhmankan. Nungan Yawey kabiberlmang dja mak kabibidkarrme.

25Ngaye bu ngayawurrinjni, dja bolkkime ngaye wanjh ngakohbanjmen, minj ngaye ngabennayinj bininj nawu birrimak bu kunrayek benbularrbuyinj, dja mak nawu wurdwurd bedberre minj bedda kabirrimarrwedowen. 26Bedda nawu bininj wanjh kabirrinjilngmak bu kabindiwon nawu njalehnjale kore bininj nawu birrimarladj, dja mak wurdwurd bedberre, wanjh God nungan kabenmarnekurduyime kunmak.

27Mah, ngurribawo manbu kunwarre, dja ngurridjalkurduyimen kore kunmakkenh. Bu kuhni ngurriyime, wanjh ngurridjalnin munguyh kore kunred kunbolkmak. 28Kuhni Yawey nungan kabenmarnedjare bininj nawu kabirrikurduyime kore mandjad nuye. Dja minj kabenbawon nawu bininj nuye birrimak. Nungka kabenmarnebiddjurrudangen bu munguyh. Dja nawu birriwarre bininj, wanjh nungan Yawey kabendjalwe nawu wurdwurd bedberre. 29Yawey kabenbolkwon kunred bedberre nawu birrimak bininj ba bu kabirridjalni kumekbe bu munguyh munguyh.

30Nawu bininj namak bu nungka kawokdi kunmaknin, kore God nuye kunmayali, bu kawokdi wanjh djal mandjadnin. 31Nungka wanjh kaburrbun kore God nuye mankarre dja mak kunkange nuye, dja nungan kadjalle kore manbolhmak minj kamankan.

32Nawu birriwarre bininj bedda kabirridjare kabindibun nawu birrimak bininj, dja kabirriwarlkkarren bu kabindidarrkidmangkenh. 33Nawu Yawey minj kabenbawon bu kabindibun bedda. Nawu birriwarre bininj bu kabindidjadme, wanjh Yawey nungan kabenbidyikarrme nawu birrimak bininj.

34Mah, ngudda ngurridjalmadbun nawu Yawey, dja mak ngurrimarrkmang kore nungka ngunbukkan. Wanjh nungan ngunkukenwon ngudberre ba bu nungka ngunbolkwon kunred ngudberre. Wanjh nungan kabendjalwe nawu birriwarre bininj, kaluk ngudda ngurrbennan kore bedda kabenmarnekurduyimerran.

35Ngaye ngakurdunang nahni bininj nabang dja nungka nawarreni. Wanjh nungka kimukworrinj yiman kayime mandulkmak duninjh kadjordmen kore mankurrkmak. 36Dja bonj, nungka yakminj! Bu ngayawam, burrkyakni, bonj, yakminj.

37Ngudda ngurrbenngunjdjikka bininj nawu minj kabirrikurduyime kunwarre, dja kabirridjalkurduyime kunmak! Bininj nawu kabirridjare kunmodmikenh, wanjh bedda kunu kabirridjalre munguyh. 38Dja ngaleng bininj nawu birriwarre, wanjh bedda kabirribularrbuyindan rowk. Minj kabirriyawoyhre munguyh.

39Nawu Yawey nungan kabenngehke birrimak bininj, dja mak nungka yiman kayime kadjurruddi bedberre munguyh, bu nungka kabirridjarrkdi bu kunyid kawernmerren bedberre. 40Yawey nungan kabendjalbidyikarrme bu kabenbebke kore birriwarre bininj nawu kabindidjalkarrme, kore nungan kabendjalngehke munguyh. Kunmekbekenh bedda kunu wanjh kabirriwarlkkarren kore nungan kabennahnan.

Artistic illustration — an interpretation, not a historical record.

Did you know?

Wisdom on the Fate of the Righteous and the Wicked

  • The psalm is framed as reflection from a lifetime of observation, with the speaker noting that from youth to old age he has watched how the righteous and the wicked fare. Rather than a direct prayer or lament, it functions as wisdom poetry offering counsel to remain patient and avoid fretting over the temporary success of evil.Sources: the Bible text itself
  • Throughout the poem, the promise of inheriting and dwelling securely in the land is repeated as the lasting outcome for the humble and righteous. By contrast, the transient prosperity of the wicked is illustrated through agricultural imagery, such as grass that withers quickly, vanishing smoke, and a flourishing tree that abruptly disappears.Sources: the Bible text itself

Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.

Places in this chapter

  • Lebanon · 33.540, 35.584 · verse 35

Only places identified with high confidence are shown (90% or more according to the scholarly sources compiled by OpenBible). Period map: DARE (Digital Atlas of the Roman Empire), CC BY 4.0; modern map: © OpenStreetMap contributors; places: OpenBible.info (CC BY 4.0).

Credits and license for this translation
God Nuye Kunwok
The Holy Bible in the Kunwinjku language of Australia
copyright © 2018 Bible Society of Australia
Language: Kunwinjku (Gunwinggu)
This translation is made available to you under the terms of the
Creative Commons Attribution-Noncommercial-No Derivatives license 4.0.
You may share and redistribute this Bible translation or extracts from it in any format, provided that:
You include the above copyright and source information.
You do not sell this work for a profit.
You do not change any of the words or punctuation of the Scriptures.
Pictures included with Scriptures and other documents on this site are licensed just for use with those Scriptures and documents.
For other uses, please contact the respective copyright owners.
2026-04-02

Source: http://ebible.org/gup/ · eBible.org

Talk to us

Tell us where you read from, how the Bible has helped you, or what we could improve. We read every message.