Matthew 9
ગામીત નોવો કરાર · Tap a verse to see its cross-references.
લખવાવાળાલ હારો કોઅયો
1પાછો ઈસુ ઉડીમાય બોહીન દોરિયો પાર કોઇન પોતાના ગાવામાય યેનો. 2એને કોલહાક લોક યોક લખવાવાળા માઅહાન ખાટલાવોય હુવાડીન ઈસુવાપાય લેય યેના, ઈસુવે જાંઅયા કા ચ્યા માયેવોય બોરહો થોવતાહા, ચ્યે લખવાવાળા માઅહાન આખ્યાં, “ઓ બાહા, ઈંમાત રાખ, તો પાપહાલ આંય માફ કોઅતાહાંવ.” 3એને કોલાહાક મૂસા નિયમ હિકાડનારા ગુરુ આતા ચ્યાહાય વિચાર કોઅયો, “એલો તે પોરમેહેરા નિંદા કોઅહે” 4ઈસુવે ચ્યાહા મોના વિચાર જાંઆઈન આખ્યાં, “તુમા તુમહે મોનામાય કાહા ખારાબ વિચાર કોઅતાહા? 5કાય આખના હેલ્લા હેય? તો પાપ માફ ઓઅઇ ગીયા ઈ આખના હેલ્લા હેય, કા ઉઠ ચાલા લાગ, ઈ આખના હેલ્લા હેય? 6બાકી તુમહાન ખોબાર પોડા જોજે કા માન એટલે માઅહા પોહાલ દોરત્યેવોય લોકહા પાપ માફ કોઅના ઓદિકાર દેનલો હેય.” ચ્યાહાટી ઈસુ લખવાવાળા માઅહાન આખહે. “તુલ આંય આખતાહાવ, ઉઠ, તો ખાટલા લેઈને ગોઓ જો.” 7તો ઉઠીન ચ્યા ગોઓ ગીયો. 8લોક ઈ દેખીન બિઇ ગીયા એને પોરમેહેરા મહિમા કોઅરા લાગ્યા જ્યેં માઅહાન ઓહડો ઓદિકાર દેનહો.
માથ્થી શિષ્યા તેડા
9જોવે ઈસુ તાઅને આગલા ગીયો, માથ્થી નાંવા યોક માઅહાન કર લેઅના નાકાવોય બોઠલો દેખ્યો, એને ચ્યાલ આખ્યાં, “મા આરે ચાલ, આંય તુલ મા શિષ્ય બોનાવીહી.” તો કામ છોડીન ઈસુવાઆરે ગીયો. 10જોવે ઈસુ એને ચ્યા શિષ્ય ગોઅમે રાતી ખાઅના ખાં બોઠલા આતા, તોવે બો બોદા કર લેનારા એને પાપી લોક ઈસુ એને ચ્યા શિષ્યહાઆરે ખાં બોઠા. 11ઈ એઇન પોરૂષી લોકહાય ઈસુવા શિષ્યહાન આખ્યાં, “તુમહે ગુરુ કર લેનારાહા એને પાપી લોકહાઆરે કાહા ખાહે?” 12ઈસુ ઈ વાત વોનાયો, એને મૂસા નિયમ હિકાડનારા ગુરુ એને પોરૂષી લોકહાન આખ્યાં, “જ્યેં હારેં હેતેં ચ્યાહાન ડાકટારા ગોરાજ નાંય રોય, બાકી જ્યેં દુખ્યેં હેતેં ચ્યાહાન ગોરાજ હેય. 13યાહાટી તુમા જાયને યા મોતલાબ હિકી લા, માન તુમહે બલિદાન નાંય જોજે, બાકી માન દયા ગોમહે, કાહાકા આંય ન્યાયી લોકહાન નાંય, બાકી પાપ્યાહાન બોચાવાં યેનોહો.”
ઉપહા બારામાય
14તોવે યોહાના શિષ્ય ઈસુપાય યેના એને ચ્યાહાય આખ્યાં કા “કાય કારણ હેય કા આમા એને પોરૂષી લોક ઉપહા કોઅતાહા, બાકી તો શિષ્ય ઉપહા નાંય કોએત.” 15ઈસુવે ચ્યાહાન આખ્યાં, મા શિષ્ય એને આંય, વોવડા એને ચ્યા દોસ્તારા રોકા હેતા, “જાવ લોગુ વોવડો ચ્યાહા હાતે રોય, તાંવ લોગુ ઉપહા કોઅઇ હોકતાહા? બાકી ચ્યાહા પાયને વોવડો લેવાય જાય, ઓહડા દિહી યી તોદિહી ચ્યા ઉપહા કોઅરી.” 16માઅહે જુના ફાડકા આરે નોવા ફાડકા ઠિગળા નાંય હિવેત, કાહાકા દોવ્યા પાછે નોવા ફાડકા ચંડળાય જાય એને જુના આજુ ચિઆઈ જાહે, એહેકેન તીં ફાડકા કામ નાંય લાગે. એહેકેન મા શિક્ષા જુની રીતીરીવાજાહા આરે જોડે, તે મા શિક્ષા યા ફાડકા હારકી કાયજ કામ નાંય લાગે. 17એને માઅહે નોવો દારાખા રોહો જુના ચાંબડા ઠેલ્યેમાય નાંય બોએત, કાહાકા ઠેલી ફાટી જાય, એને દારાખા રોહો વેરાય જાય બાકી નોવો દારાખા રોહો નોવ્યે ઠેલ્યેમાયજ બોઅતેહેં, એને બેની હારેં હાચવાય રોતેહેં.
ઓદિકાર્યા પોહી જીવતી જાયી એને યોક બાય હારી જાયી
18તો ચ્યાહાન ઈ વાત આખહે, તોવે યાઈર નાંવા સોબાયે ઠિકાણા આગેવાનાહા માઅને યોક યેનો એને ઈસુવા પાગે પોડયો. એને યાઈર બોજ રાવ્યો કોઅતો લાગ્યો, “મા વાહની પોહી આમી મોઓઈ ગીયહી, બાકી તું યેઇન ચ્યેલ આથ લાવહે, તોવે તીં જીવતી ઓઅઇ જાય” 19ઈસુ ઉઠયો એને ચ્યા શિષ્યહાઆરે ચાલ પોડયો. 20એને યોક બાઈ ચ્યે બારા વોરહાથી લોય પોડના બિમારી આતી, તી ચ્યા પાહલા યેની એને ફાડકા છેડાલ આથ લાવ્યો. 21કાહાકા તી પોતે મોનામાય આખતી આતી, કા જોવે એલા ફાડકાલુજ આથ લાવહી તોવે મા બોચાવ ઓઅઇ જાય. 22ઈસુવે ચ્યે એછે ફિરીન ચ્યેલ આખ્યાં, બોઅહી ઈંમાત રાખ, માયે તો બોચાવ કોઅલો હેય કાહાકા તુયે માયેવોય બોરોહો કોઅલો હેય, આમી તુલ એલી બિમારી નાંય લાગે તોવે તી બાય તારાત હારી ઓઅઇ ગીયી. 23ઈસુ સોબાયે ઠિકાણા આગેવાના ગોઓ યેનો, તાં થાળી તુર વાજાડનારાહાલ એને લોકહાન કાકાહા કોઅતા દેખ્યા, 24તોવે ચ્યે આખ્યાં, “હોરકી જાં, પોહી મોઅયીહી નાંય, બાકી હુતહી” તોવે ચ્યા ઓહરા લાગ્યા. 25બાકી જોવે ચ્યે લોકહા ટોળાલ બાઆ કાડી દેના, એને ચ્યે ગોઅમે જાયન પોહયે આથ દોઅયો એને તી જીવી ઉઠી. 26એને યે વાતે ખોબાર ચ્યા બોદા ગાવહામાય ફેલાય ગિઇ.
ઈસુ બેન આંદળાહાન દેખતા કોઅહે
27તાઅને ઈસુ આગલા ગીયો તોવે બેન આંદળા ચ્યા પાહાલાને બોંબાલતા લાગ્યા કા, “ઓ દાઉદ રાજા કુળા પોહા, આમહાવોય દયા કોઓ.” 28જોવે તો ગોઅમે ગીયો, તોવે ચ્યા બેની આંદળા ચ્યાપાય યેના ઈસુવે ચ્યાહાન પુછ્યાં, “કાય તુમહાન બોરહો હેય, કા આંય હારાં કોઓઇ હોકહુ?” ચ્યાહાય આખ્યાં “આમા બોરહો કોઅજેહે કા તું હારો કોઅઇ હોકતોહો.” 29તોવે ઈસુવે ચ્યાહા ડોળાહાલ દોઇન આખ્યાં કા “તુમા બોરહા કોઅતાહા યાહાટી તુમહાન હારાં કોઅતાહાંવ.” 30તોવે ચ્યાહા ડોળા હારાં ઓઅઇ ગીયા, એને ઈસુવે ચ્યાહાન આખ્યાં, “હાચવીન રા, ઈ કાદાલ નાંય ખોબાર પોડા જોજે કા માયે કોઅયા.” 31બાકી ચ્યાહાય જાયને ચ્યા કામહા બારામાય બોદા ભાગામાય આખ્યાં.
ઈસુ યોકા મુકા માઅહાન હારો કોઅહે
32જોવે ચ્યા બેની આંદળા વાટે જાય રીઅલા આતા, તોવે લોક યોક મુકા માઅહાલ, જ્યાલ બુત વોળાગલો આતો ઈસુપાય લેય યેને. 33એને જોવે બુતાલ કાડયા પાછે, મૂકો બોલતો લાગ્યો. ચ્ચાથી ગીરદીય નોવાય પામીન આખ્યાં, “ઈસરાયેલ દેશામાય ઓહડા કોવેજ નાંય દેખહયા” 34બાકી પોરૂષી લોકહાય આખ્યાં કા, “તો સૈતાન બુતાહા મુખ્ય હેય ચ્યા મોદાત લેઈને બુતાહાન તાંગાડેહે.”
ઈસુલ લોકહાવોય દયા યેની
35એને ઈસુ ગાલીલ વિસ્તારમાય એને બોજ શેહેરાહામાય એને ગાવહામાય ફિરીન, ચ્યાહા સોબાયે ઠિકાણામાય હિકાડે, એને પોરમેહેરા રાજ્યા હારી ખોબાર આખતો એને માઅહામાયને બોદે જાત્યા બિમારી એને ચ્યાહામાઅને નોબળાય દુઉ કોઅતો રિયો. 36લોકહા ટોળા એઇન, ચ્યાહાવોય ચ્યાલ દયા યેની, ચ્યે ચ્યા ગેટાહા રોકે આતેં જ્યાહા ગોવાળ નાંય હેય, લાચાર એને ટાકાલાહા રોકે આતેં. 37તોવે ઈસુય ચ્યા શિષ્યહાન આખ્યાં, “જેહેકોય રાનહા માય બોજ પાક રોહે, તેહેકોય બોજ લોક હેય, જ્યા પોરમેહેરા હારી ખોબારેવોય બોરહો કોઅરાહાટી તિયાર હેય, બાકી પોરમેહેરા રાજ્યા બારામાય આખનારા લોક વોછા હેતા. 38યાહાટી તુમા પાક વાળા માલિકાલ વિનાંતી કોઆ કા તો રાનામાય કામ કોઅનારા લોકહાન દોવાડે.”

Did you know?
Mercy, Healing, and New Wine
- Matthew, son of Alphaeus, was a publican, or tax collector, at Capernaum. Jesus, coming up from the side of the lake, passed the custom-house where Matthew sat and said, “Follow me.” He had formerly been known as Levi; that same day he gave a great feast, described as a farewell, for Jesus, the disciples, and probably many of his old associates.Sources: Matthew · the Bible text itself
- Those who ask why they and the Pharisees fast so often, while Jesus’ disciples do not, are disciples of John the Baptist. John is called the forerunner; he was of priestly descent, his father Zacharias a priest of the course of Abia and his mother Elisabeth one of the daughters of Aaron.Sources: John the Baptist · the Bible text itself
- One chronology places the healing of the paralyzed man, the call of Matthew, the question about fasting, and the parable of the wineskins in AD 28.Sources: Healing the Man with Palsy · Jesus Calls Matthew · Fasting Question · Parable of the Winseskins
Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.
Places in this chapter
- Sea of Galilee · 32.819, 35.590 · verse 1
Only places identified with high confidence are shown (90% or more according to the scholarly sources compiled by OpenBible). Period map: DARE (Digital Atlas of the Roman Empire), CC BY 4.0; modern map: © OpenStreetMap contributors; places: OpenBible.info (CC BY 4.0).
Credits and license for this translation
ગામીત નોવો કરાર Bible in Gamit language of India copyright © 2022 Beyond Translation Language: (Gamit) Contributor: Wycliffe USA Read and download Bible and several other Christian materials in various formats : www.freebiblesindia.in This translation is made available to you under the terms of the Creative Commons Attribution Share-Alike license 4.0. You have permission to share and redistribute this Bible translation in any format and to make reasonable revisions and adaptations of this translation, provided that: You include the above copyright and source information. If you make any changes to the text, you must indicate that you did so in a way that makes it clear that the original licensor is not necessarily endorsing your changes. If you redistribute this text, you must distribute your contributions under the same license as the original. Pictures included with Scriptures and other documents on this site are licensed just for use with those Scriptures and documents. For other uses, please contact the respective copyright owners. Note that in addition to the rules above, revising and adapting God's Word involves a great responsibility to be true to God's Word. See Revelation 22:18-19. 2025-05-02
Source: http://ebible.org/gbl/ · eBible.org