Nations Bible

Matthew 10

ગામીત નોવો કરાર · Tap a verse to see its cross-references.

બારા શિષ્યહાન દેનલો ઓદિકાર એને ચ્યાહાન દેનલી સેવા

1પાછે ઈસુવે ચ્યા બાર શિષ્યહાન હાદિન, બુતાલ લોકહામાઅને કાડના ઓદિકાર દેનો એને બોદયે જાત્યા રોગ એને દુઃખ હારાં કોઅના ચ્યાહાન ઓદિકાર દેનો. 2એને બાર પ્રેષિતાહા નાંવે યેં હેતેં: પેલ્લો, સિમોન જ્યાલ પિત્તર આખવામાય યેહે એને ચ્યા બાહા આંદ્રિયાસ, જબદયા પોહો યાકૂબ, એને ચ્યા બાહા યોહાન. 3ફિલિપ, એને બારતોલોમી, થોમા, એને જકાતદાર માથ્થી, અલફિયા પોહો યાકૂબ, એને તદે. 4સિમોન કનાની, એને યહૂદા ઇસ્કારીયોત જ્યેં ચ્યાલ દોઅવાડી દેનેલ.

શિષ્યહાન સેવાયે હાટી દોવાડના

5યા બાર શિષ્યહાન ઈસુવે એહેકેન આખીન દોવાડયા કા: “ગેર યહૂદી લોકહામાય જાતા મા, એને સમરૂના કોઅહાબી શેહેરામાય ઉરાયાહા મા. 6બાકી તુમા ઈસરાયેલ દેશા કુટુંબમાય ટાકાલા ગેટાહા એછે જાજા. 7એને જાતા-જાતા તુમા એહેકેન હારી ખોબાર આખજા: કા હોરગા રાજ્ય પાહી યેય ગીઅલાં હેય. 8દુખ્યાહાન હારેં કોઅયા, મોઅલાહાન જીવતે કોઅરા, કોડળ્યાહાન હારેં કોઅયા, એને બુતાહાન કાડી ટાકજા, તુમાહાય મોફાત મેળવ્યાહાં તે મોફાત દા. 9તુમા તુમહે પાકીટ માય હોના, રુપાં નાયતે તાંબા લાહા મા. 10વાટેહાટી ઠેલી મા લાહા, નાંય બેન જોડ ફાડકે લેતા, નાંય બેન જોડ વાઅણે એને બેન લાકડયોબી મા લેતા. કાહાકા કામ કોઅનારાલ ચ્યા ખાઅના મિળાં જોજે.”

11“એને જ્યા કોઅહાબી શેહેરામાય નાયતે ગાવહામાય જાહા, તે ચ્યે માન એહેકેન પુછ્યાં કા ઈહીં કું હારો હેય એને જાંઉ લોગુ તાંઅરે નાંય જાહા, તાંઉલોગુ ચ્યાજ ગોઅમે રોજા. 12ગાઆમાય જાતાંજ ચ્યાહાલ બોરકાત દેજા. 13એને તીં ગુઉ બોરકાતે લાયક્યે ઓઅરી તે તુમહે સુખ શાંતી ચ્યાહાવોય જાય, બાકી તીં લાયક્યે નાંય ઓઅરી તે તુમહે સુખ શાંતી તુમહેપાય વોળી યેઅરી. 14એને જાં તુમહાન લોક નાંય હાદેત એને તુમહે નાંય હાંબળેત, તાંઅરે નિંગી જાયા, એને ચ્યાહાન નિશાણી દાંહાટી, તુમહે પાગહા આરેને ઉદળાં તાંજ ખેખરી ટાકજા, ચ્યાહાન ઈ ચેતાવણી દાંહાટી કા પોરમેહેરા એહેરે મિળનારી સજા ચ્યા પોતેજ જાબાવદાર હેય.” 15આંય તુમહાન હાચ્ચાં આખતાહાવ, ન્યાયા દિહી ચ્યા શેહેરા દશા સદોમ એને ગમોરા શેહેરા કોઅતા વોદારી સાજા મિળી એને યાહા હાલાત બોજ ખારાબ ઓઅઇ જાઅરી.

યેનાર્યો સતાવણ્યો

16“એઆ, આંય તુમહાન ગેટાહા હારખો તોઅસાહા વોચમાય દોવાડતાહું, ચ્યાહાટી હાપડાહા હારખા બોજ ઉશારી રોજા એને કબુતરાહા હારખા બોળા બોના. 17બાકી તુમા લોકહાપાઅને હાચવીન રા, કાહાકા લોક તુમહાન કોચર્યેમાય લી જાય એને સોબાયે ઠિકાણાહામાય માર દી. 18તુમા માંહાટી સરકારા, એને રાજહા આગલા એને ગેર યહૂદી લોકહાવોય સાક્ષી બોનાહાટી ઉબા કોઅલા જાહા. 19જોવે તુમહાન ચ્યે કોચર્યેમાય દોઅવાડી દેય, તોવે કેહેકેન બોલના એને કાય આખના ચ્યા ચિંતા મા કોઅહા, કાહાકા જીં કાય તુમહાન આખના હેય તીં ચ્યે સમયે આખાડી.” 20કાહાકા આખનારે તુમા નાંય હેય, બાકી તુમહે પવિત્ર આત્મા તુમહેકોય બોલી.

21ચ્યે સમયે, જ્યા લોક માયેવોય બોરહો નાંય કોએત, “ચ્યા ચ્યાહા બાહાહાલ દોઇન કોંડાડી દી, જ્યા માયેવોય બોરહો કોઅતાહા ચ્યાહાન માઆઇ ટાકી, આબહો પોતે પાહાહા આરે એહેકેન કોઅરી એને પોહેં પોતે આયહે આબહા વિરુદ કોઅરી એને ચ્યાહાન માઆઇ ટાકી.” 22કાહાકા તુમા મા શિષ્ય હેય યા લેદે, બોદે માઅહે તુમહેઆરે દુશ્માની કોઅરી; બાકી જ્યા લોક માયેવોય બોરહો કોઅનામાય લાગી રોય, એને દોરત્યેવોય ચ્યા જીવના છેલ્લે હુદી મા પાહલા ચાલતો રોય, ચ્યાલ પાપહા ડોંડ બોગાવનાથી તારણ ઓઅઇ જાઅરી. 23જોવે તુમહાન ચ્યે યોકા શેહેરામાય સતાવે, તોવે બિજા શેહેરામાય નાહી પોડજા, આંય તુમહાન હાચ્ચાંજ આખતાહાવ કા, તુમા આંય, માઅહા પોહા યેઅના પેલ્લા ઈસરાયેલ દેશા બોદા ગાવાહામાય ગીયા બી નાંય ઓરી.

શિષ્ય ઓઅના મોતલાબ

24“શિષ્ય ચ્યા ગુરુઆ કોઅતા મોઠો નાંય રોય, એને દોણ્યા કોઅતા મોઠો ચાકાર નાંય રોય. 25ગુરુઆ હારખા શિષ્ય, એને ચાકાર દોણ્યા હારખો બોનના તીંજ બો હેય; જોવે ચ્યાહાય ગોઆ દોણ્યાલ સૈતાન જો બુતાહા મુખ્ય આખ્યાં, જો ચ્યે દોણ્યા આરે ખારાબ વ્યવહાર કોઅતેહે, તે ચ્યે ચ્યા ચાકારાહા આરેબી ખારાબ વ્યવહાર કોઅરી.”

કા દાક રાખના

26“ચ્યાહાટી માઅહાન ગાબરાના નાંય; કાહાકા કોઅહીજ વસ્તુ ઓહડી નાંય હેય કા તી ડાકલી રોય એને યોકતી વસ્તુ ઓહડી નાંય હેય કા તી દુબાડી હોકાય બાકી બોદાજ ખુલ્લાં પોડી જાય.” 27આંય જીં તુમહાન આંદારામાય આખતાહાવ, તીં તુમા ઉજવાડામાય આખી દિયા; એને જો આંય કાનામાય દુંદરીન આખતાહાવ, તીં તુમા બોદે જાગે આખા. 28જ્યેં શરીરાલ માઆઇ ટાકી હોકતેહેં, બાકી ચ્યે આત્માલ નાશ નાંય કોઅઇ હોકે, ચ્યાહાન મા ગાબરાયાહા, બાકી જો શરીર એને આત્મા બેન્યાહાન બોસામકોળીમાય ટાકી હોકહે ચ્યા પોરમેહેરાલ ગાબરાજા. 29હાકરીયેં ચિડેં બોજ હોયતે વેચાતેહે, તેરુંબી તુમહે હોરગ્યા આબહા મોરજી વોગાર ચ્યાહામાઅને યોકબી દોરતીવોય નાંય ટુટી પોડે. 30પોરમેહેર તુમહે જીવના બોદી ચિંતા કોઅહે, તો ઇબી જાંઅહે કા તુમહે ટોલપીવોય કોલહા કીહીં હેય. 31યાહાટી તુમા મા બીયહા, તુમા બોજ ચિડહા કોઅતાબી કિમત્યા હેતા.

ઈસુવાલ માનના કા નાંય માનના

32“જીં માઅહું લોકહા હોમ્મે માની લેહે, તો મા શિષ્ય હેય, આંયબી મા હોરગામાઅને આબહાલ આખી દિહીં કા ઓ મા શિષ્ય હેય. 33બાકી જીં માઅહું માન માઅહા હોમ્મે નાંય માને, તે ચ્યાલ આંયબી મા હોરગામાઅને આબહાલ આખી દિહીં કા ઓ મા શિષ્ય નાંય હેય.”

ઈસુવા યેવાથી કાય પરિણામ જાયો

34“ઈ મા હુમાજતા કા આંય દોરત્યેવોય લોકહાવોચમાય શાંતી દાં યેનોહો, આંય દોરત્યેવોય લોકહાવોચમાય શાંતી નાંય બાકી જગડો કોઆડાં યેનહો. 35આંય યાહાટી યેનોહો કા: પોહાલ ચ્યા આબહા આરે, એને પોહયેલ આયહે આરે, એને વોવલ્યેહેન હાઅવેહે આરે, વિરુદ કોઅઇ દાવ.” 36“માઅહા વિરુદયે ચ્યા પોતે ગોઅને માઅહેજ રોય.”

37જીં માઅહું આબહાલ યા આયહેલ મા કોઅતો બોજ પ્રેમ કોઅહે, તીં માઅહું મા શિષ્ય બોના લાયકે નાંય હેય, એને જીં માઅહું પોહા યા પોહયેલ મા કોઅતો બોજ પ્રેમ કોઅહે, તીં મા શિષ્ય બોના લાયકે નાંય હેય. 38જીં માઅહું મા શિષ્ય ઓઅના લીદે દુઃખ નાંય વેઠે એને મોઅરાંહાટી તિયાર નાંય ઓએ, તીં મા શિષ્ય બોના લાયકે નાંય હેય. 39જીં માઅહું પોતે જીવ બોચાડેહે, તો ચ્યાલ ગુમાવી દી, એને જો મા લીદે ચ્યા જીવ દેહે, તો ચ્યાલ મેળવી.

ઇનામ

40“જો કાદોબી મા લીદે એહેકેન યોકા પોહાલ દોયા દેખાડેહે, તો હાચ્ચાંજ મા માની લેહે, જો કાદો મા માની લેહે, તો હાચ્ચાંજ પોરમેહેરાબી માની લેહે જ્યાંય માન દોવાડયોહો.” 41જીં માઅહું ભવિષ્યવક્તાલ ભવિષ્યવક્તા જાંઆઈન માનહે, ચ્યાલ ભવિષ્યવક્તા હારખો ઇનામ મિળી; જીં હારાં માઅહું હોમજીન હારાં માઅહાન માનહે, ચ્યાલ હારાં માઅહા હારખા ઇનામ મિળી. 42જો કાદો યોક ગોલાસ પાઆઈ તુમહાન યાહાટી પાજી કા તુમા મા શિષ્ય આખાતાહા, આંય તુમહાન હાચ્ચાંજ આખતાહાવ કા પોરમેહેર નોક્કીજ ચ્યા માઅહાન ઇનામ દેઅરી.

Artistic illustration — an interpretation, not a historical record.

Did you know?

The Twelve Sent on Mission

  • Simon, called Peter, and his brother Andrew—the first pair named among the twelve—were fishermen from Bethsaida, on the western coast of the Sea of Galilee. James and John, listed next, were sons of Zebedee, a Galilean fisherman who had his own boats and hired servants.Sources: the Bible text itself · Simon Peter · Andrew · Zebedee
  • Matthew, identified in the list as the tax collector, was the son of Alphaeus and had formerly been known as Levi; he collected taxes at Capernaum, and the name Matthew means “gift of God.” Thomas, named beside him, was also called Didymus, the Greek equivalent of the Hebrew name, meaning “twin.” Bartholomew means “son of Tolmai” and is generally supposed to have been the same person as Nathanael.Sources: the Bible text itself · Matthew · Thomas · Bartholomew
  • Jesus warns that the day of judgment will be more bearable for Sodom and Gomorrah than for a town that refuses the twelve apostles. Easton's Bible Dictionary (1897) describes those cities of the plain of Siddim as destroyed by fire and proverbial for wickedness, and places them, probably close together, near the northern end of what is now the Dead Sea.Sources: the Bible text itself · Sodom · Gomorrah

Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.

Credits and license for this translation
ગામીત નોવો કરાર
Bible in Gamit language of India
copyright © 2022 Beyond Translation
Language: (Gamit)
Contributor: Wycliffe USA
Read and download Bible and several other Christian materials in various formats : www.freebiblesindia.in
This translation is made available to you under the terms of the
Creative Commons Attribution Share-Alike license 4.0.
You have permission to share and redistribute this Bible translation in any format and to make reasonable revisions and adaptations of this translation, provided that:
You include the above copyright and source information.
If you make any changes to the text, you must indicate that you did so in a way that makes it clear that the original licensor is not necessarily endorsing your changes.
If you redistribute this text, you must distribute your contributions under the same license as the original.
Pictures included with Scriptures and other documents on this site are licensed just for use with those Scriptures and documents.
For other uses, please contact the respective copyright owners.
Note that in addition to the rules above, revising and adapting God's Word involves a great responsibility to be true to God's Word. See Revelation 22:18-19.
2025-05-02

Source: http://ebible.org/gbl/ · eBible.org

Talk to us

Tell us where you read from, how the Bible has helped you, or what we could improve. We read every message.