Matthew 8
Angkentye Mwerre · Tap a verse to see its cross-references.
Jesus-ele artwe rlkerte angkwerre-iweme
1Jesus apwerte akertne-ngentyele atnarnpemele iperre tyerrtye atningke anthurrele renhe apentewarreke. 2Kenhe artwe anyente utyene irrkelhe-irrkelhe ilentye akngerre-akerte apetyeke nhenge Jesus aremele re amperele-arlenge tnemele renhe apayuthneke, “Jesus-aye, ayenge utyene nhenhe angkwerre-iwaye. The itelareme unte-arle ayenge angkwerre-iwemere, unte-arrpe apeke awelhemele.” 3Kele Jesus-ele iltye ikwerenhele renhe anpeke, ikwere angkirtnemele, “The ngenhe angkwerre-iwetyeke ahentye-aneme.” Kenhe iparrpe anthurrele utyene akngerre uyerrerlenge, yenpe alyere-alyere-irremele. 4Kele anteme Jesus ikwere angkeke, “Arrpenhe areyeke ilelhetyale tharle ngenhe angkwerre-iweke. Angkentye Moses-kenhe alakenhe angkeme: Kenhe arrekwele kwertengerle tyatye-arenyeke imernelhetyeke alhaye ngenhe-arle angkwerre-iwekeke. Kele re ngenhe areke-arle-iperre ilemele yenpe ngkwinhe ulkere anteme, kele thipe akweke atherre inaye ampetyeke Ngkarteke yanhe atherre tyawerrelyele anthetyenhenge. Kele mwerrantye mpwareke-ngentyele itne itelarerrirretyenhenge unte-arle mwerre-irrekenge.”
Jesus-ele urrkapentye akngerre thultye-kenhe angkwerre-iweme
5Nhenge Jesus-arle apmere nhenge Capernaum-werne alherlenge thultye akngerrepate ikwere-werne apetyeke. Artwe nhenhe apmere Rome-arenye thultye Rome-arenye 100-eke alartetye-arle apmere Capernaum-ele. Re anteme Jesus-eke angkeke, alakenhe renhe apayuthnemele, 6“Akngerrepate anwerne-kenhe, urrkapentye akngerre atyinhe rlkerte apmerele interle-aneme, akngelhetyakenhe-arlke arekare awelhemele.”
7Awemele Jesus ikwere alakenhe angkeke, “Kele mwerre-arle! Ayenge iparrpe alheme renhe angkwerre-iwemele mwerre iletyeke.”
8Kenhe akngerrepate thultye-kenhe re akenhe angkerlenge, “Arrangkwe akngerrepate, unte kwenhe akngerre aneme, kele ayenge akenhe artwe akurne akweke ware-arle ayenge apure-arle-irreme unte apmere atyinhe-werne apetyetyeke. Unte nhenhenge ware angkeye arrwengkelthe re nhenhenge-ntyele ware mwerre-iletyenhenge. 9The itelareme unte-arle Ngkarteke mpwarepareme. Kenhe Re ngenhe ileme mpwaretyeke, nge Renhe awemele, kele nge mpwareme-arle. Alakenhe rarle ayenge warrke-irreme Rome-arenye areyeke akngerrepate. Kenhe ayenge akngerrepate aneme thultye arunthe anthurre-akerte. Ayenge anyenteke angkemele yanhe-werne alhetyeke, kenhe re iparrpe anthurre alherlenge. Kenhe ayenge apeke anyenteke angkemele, “Nhenhe-werne apetyaye!” Kele re iparrpe anthurre apetyeme. Kenhe ayenge anyenteke angkemele mpwaretyeke, kenhe re iparrpe anthurrele mpwarerlenge. Kele unte-arteke rarle. Kele unte-arle angkemele arteke kenhe iparrpe anthurre urrkapentye akngerre atyinhe re mwerre-irrerlenge.”
10Nhenge Jesus-ele nhenhe awemele re apatemele anthurre. Re imerte tyerrtye areyeke angkemele renhe-arle apentewarremeke, “The arrenhantherrenhe arratye ileme, artwe nhenhe thultye atningkeke akngerrepate-arle anemeke re Jew anetyakenhe-arle, re akenhe arratye itirreme tharle mpwaretyeke, Jew areye-arteke kwenye. Apmere nhenhe Israel-enge the arrpenhe aretyakenhe artwe nhenhe-arteke-arle arratye itirremeke tharle iwenhe apeke renhe mpwaretyeke. 11The arrekantherre arratye ileme, tyerrtye apmere arrpe-anenhe-ngentyele Jew anetyakenhe areye apetyetyenhe. Itne-arle apetyetyenhe Abraham-eke anyente-irretyeke, Isaac-eke, Jacob-eke-arlke akangkemele merne apurtele arrpenhe areyenge arlkwetyenhe Ngkarte akngerrepate anerlenge itnenhe arntarnte-aretyenhele. 12Kele Jew arrpenhe areye itnekenge apurte anetyeke arrangkwe-arle. Ngkartele-arle itnenhe arrule akngakeke Ikwerenhe areye anetyeke. Itne-arle akenhe Ikwerenhe areye anetyeke ahentye-anetyakenhe-arle anekenge Re akenhe itnenhe uliletyenhe, kenhe itne ingkirreke arrangkemele artitye lterrkemele utyene-ante-irretyeke alkngultyeke-ante artnemele anerle-atherre-anetyenhe.”
13Jesus anteme thultye akngerrepateke angkeke, “Kele, apmere-werne alpaye! The urrkapentye akngerre ngkwinhe mwerre-ileke unte-arle itirreke the mpwaretyeke.” Ikwerenge anteme urrkapentye akngerre re iparrpe anthurre mwerre-irreke.
Jesus-ele tyerrtye arunthe itnenhene angkwerre-iweme
14Jesus apmere yanhe ikwerenge-ntyele imperle-alhemele apmere Peter-kenhe-werne alheke nthenhele-arle mwerikwe Simon-kenhe rlkerte anthurre apmere kwenele intekenge, amperlenge anthurre re awelheke. 15Jesus-ele iltye ikwerenhe apaneke, iparrpe anthurre rlkerte imperle-alhemele arratintyeke, arelhe re akenhe mwerre-arle-irrerlenge. Re akeme-irremele merne-arlke itetyeke. Re anteme Jesus-arlke anthemele arrpenhe areye-arlke.
16Kele-arle alernnge irrpeke-arle arrpenhe areyele apmere yanhe ikwere areye-ngentyele arrentye areye-akerte Ngkarte-werne akngetyewarreke re itnenhe mwerre-iletyeke. Rarle angkentyele ware arrentye itneke-ngentyele arratelhe-ilemele aywepeke, itne mwerre-irreke. Jesus-ele rlkerte areye ingkirreke angkwerre-iweke. 17Nhenge Jesus-ele tyerrtye areye alakenhe angkwerre-iweke, alhilentye Ngkarte-kenhe arratye-irretyeke, angkentye Ngkarte-kenhe awemele ilerle-apentye akngerre Isaiah-ele intelhe-ilekenge-arteke arrule anthurre pwekeke-arleke alakenhe,
“Re arrengkwelthe anwerne-kenhe areye uyerrelhe-ileke
anwernenhe mwerre-ilemele.” Isaiah 53:4.
Ayeye Artwe Atherre Jesus apentetyeke-arle itirreke-akerte
18Jesus-ele areke tyerrtye atningke anthurre ikwere-werne apetyewarremele tnerrirrerlenge re angkeke apententye akngerre ikwerenhe areyeke, “Mpe, boat-eke antyemele alhetyekeye ahelhe irntwarre-werne kwatye alayele arrengakwe-werne!”
19Nhenge re angkeke alhetyeke, artwe angkentye Moses-kenhe-arle akaltyele-anthetyarte apetyeke Jesus-eke angkemele, “The ngenhe apenterle-apetyeke nthenhe-werne apeke unte alherlenge.”
20Kele Jesus akenhe ikwere angkerlenge, “Kere rapite itne alhwengele anerrirreme, kenhe thipe areye akenhe arne akertnele antywele anerrirreme. Kenhe ayenge akenhe, Alere alkere-arenye apmere ahelhe nhenhele-arle akweke inteke, apmere-kwenye-arle, arrangkwe. Ayenge-arle akwetethe re intetyeke. Ayenge-arle akwetethe-arle unthetyarte.”
21Kele apententye akngerre Jesus-kenhe arrpenhe anteme ikwere angkeke, “Ayenge apele alhampwe-irreke-arle. Ayenge urrekeke impaye ayenge-arle apmere-werne alpetyeke, akngeye atyinhe artetyeke. Kenhe yanhe iperrele the ngenhe apenterle-apetyenhenge.”
22Kele Jesus akenhe ikwere alakenhe-arle angkirtnerlenge, “Arrangkwe, lyete nhenhe ayenge apentaye, atyenge akangkwe-irretyakenhe areyele renhe iperteke artetyeke re ilwerlenge.”
Jesus-ele rlke ntertelhe-ileme
23Kele Jesus boat-eke antyemele kwatye alayele tyanemele alhetyeke-irreme apententye akngerre areye-akerte. 24Itne alaye talkwe alherlte-iwepiwemele, rlke akngerrele wernerlenge impeltye-ngentyele. Kwatye alyepe boat ikwere-arleke irrpeke, itne akenhe atere-irrerirrerlenge alhekwarle-irrerirre-ketyenge. Kenhe Jesus boat ikwerele ankwe-interle-aperlenge akwenpe anthurre. 25Kenhe ikwerenhe areyele akarrelhe-ilemele akemelhe-ilerrirremele angkerrirreke, “Akngerrepataye! Anwernenhe itetheke mpwaraye, alhekwarle-irrerirre-ketyenge!”
26Kele Jesus itneke angkirtneke, “Iwenheke-ame arrantherre atere-irreme? Arrantherre itirretyakenhe tharle arrenhantherrenhe ulyeyele arntarnte-arerle-aneme.”
Yanhe ikwerenge-ntyele, re akeme-irremele rlke mwantye-irretyeke kwatye arnmarre-arlke akweke-irretyeke ileke. Iparrpe anthurrele rlke atnengke-irreke kwatye arnmarre akweke-irreke. 27Itne apatemele angkerreke, “Artwe iwenhe-arle-ame nhenhe re? Re rlke uthene kwatye arnmarre uthene akweke-irretyeke ileke, kenhe ratherre atnengke-irrerlenge-arle!”
Jesus-ele arrentye itnenhene artwe atherre-ngentyele aywepeme
28Kele Jesus apententye akngerre ikwerenhe areye-arlke kwatye alayenge intwarreke-irremele itne alherlte-iweke apmere Gadara arritnye-werne. Apmere yanhe re, arratye apwerte akngerre areye-arle interrirreme inteye arrpe-anenhe aneme-akerte. Yanhe ikwere areye itne ilweke-arle areye inteye kweneke arrernewarretyarte. Kenhe artwe arerte atherre apmere yanhe ikwerele anerle-anerretyarte, arrentye atningke areye-arle ikwere-atherrele-arlenge aneme-akerte. Tyerrtye apmere ikwere-arenye areye iwerrele inteye itwele alhetyakenhe ahe-akngerre ikwere-atherre-ketyenge. 29Ratherre untetyemele Jesus-nge arrekwele tneke, arrentye areye ikwere arlkemele, “Alere Ngkarte-kenhe, ingkirreke anthurreke akngerre anerlenge-arle. Unte-ame anwernenhe nthakenhe-iletyenhe? Unte-ame anwernenhe apmere akurne anthurre-werne yernetyeke lyete ware, urrekeke impetyakenhe?”
30Kenhe pike-pike atningke apwerte itwele tnerrirreke arlkwerrirremele. 31Arrentye areyele Jesus renhe ileke, “Unte apeke nhenhe atherrenge arratelhe-ilemele anwernenhe pike-pike itneke-werne yernaye anwerne tyerrtye itne-kenheke irrpetyeke.”
32Kele Jesus itneke angkirtnerlenge, “Kele mwerre-arle, pike-pike itneke irrperrirraye.”
Iparrpele arrentye itne artwe yanhe atherrenge-ntyele arratewarremele pike-pike itne areyeke-arleke irrperrirreke. Kele imerte pike-pike itne apwerte kwene-werne unterlte-iwemele apwerte arnke-werne, ingkirreke akertne-ngentyele atnyerrirremele kwatye kweneke, ingkirreke anthurre anteme itne alhekwarle-irrerirreke.
33Kenhe tyerrtye yanhe itne pike-pike itnenhene arntarnte-arerlte-anemele arerrirreke nthakenhe-arle-irrerne, kele itne anteme-arle apmere-werne-arleke-irreme. Kenhe itne ingkirrenyekeke ilerrirreke nthakenhe Jesus-ele mpwareke-akerte, artwe atherre-arle arrentye areye atnyeneke-akerte-arlke. 34Kele ikwerenge-ntyele, tyerrtye apmere yanhe-arenye itne Jesus-eke atwaremele alherlte-iweke. Itne renhe aremele, Gadara-arenye yanhe areye atere-irrerirremele, ikwere angkerrirreke, “Apmere nhenhenge-ntyele alperlte-iwaye!”

Did you know?
Healings, faith, and the sea
- Capernaum, which Jesus enters in this chapter, was a Galilean city not named in the Old Testament. Easton's Bible Dictionary (1897) says it became his “own city” after he left Nazareth, and it lists the centurion’s appeal and the healing at Peter’s house among the events set there.Sources: Capernaum · the Bible text itself
- Jesus says that many will come from east and west to share the banquet with Abraham, Isaac, and Jacob in the kingdom of heaven. Easton's Bible Dictionary (1897) calls Abraham the son of Terah and heir of the promises, Isaac Abraham’s only son by Sarah, and Jacob—also known as Israel—the younger twin son of Isaac and Rebekah.Sources: the Bible text itself · Abraham · Isaac · Jacob (Israel)
- Matthew presents that evening’s healings as fulfilling words spoken through the prophet Isaiah: “He took on our infirmities and carried our diseases.” Easton's Bible Dictionary (1897) identifies Isaiah as the son of Amoz, who prophesied in the reigns of Uzziah, Jotham, Ahaz, and Hezekiah.Sources: the Bible text itself · Isaiah
Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.
Places in this chapter
- Gadara · Today: Umm Qais · 32.656, 35.679 · verse 28
Only places identified with high confidence are shown (90% or more according to the scholarly sources compiled by OpenBible). Period map: DARE (Digital Atlas of the Roman Empire), CC BY 4.0; modern map: © OpenStreetMap contributors; places: OpenBible.info (CC BY 4.0).
Credits and license for this translation
Angkentye Mwerre Portions of the Holy Bible in the Central and Eastern Arrente language of Australia copyright © 2002-2014 Wycliffe Bible Translators Language: Eastern Arrente (Arrernte, Eastern) This translation is made available to you under the terms of the Creative Commons Attribution-Noncommercial-No Derivatives license 4.0. You may share and redistribute this Bible translation or extracts from it in any format, provided that: You include the above copyright and source information. You do not sell this work for a profit. You do not change any of the words or punctuation of the Scriptures. Pictures included with Scriptures and other documents on this site are licensed just for use with those Scriptures and documents. For other uses, please contact the respective copyright owners. 2019-05-14
Source: http://ebible.org/aer/ · eBible.org