Matthew 7
Angkentye Mwerre · Tap a verse to see its cross-references.
Angketyale tyerrtye arrpenhe-arle akurne akwele anemeke
1Jesus-ele apententye akngerre ikwerenhe areye akaltyele-anthetyame alakenhe, “Kenhe arrantherre apeke arrpenhe areye ilperneme, Ngkartele anteme arrenhantherrenhe ilperneme. 2Nhenge arrantherre apeke arrpenhe areyeke angkemele itnenhe akurne akeme, Ngkarte alakenhe-arle angkeme arrenhantherrenhe akurne akeme. Kenhe arrantherre akenhe tyerrtye arrpenhe areyeke angkemele itneke akangketyeke mpwaremele itnenhe ilpernetyakenhele kele arrenhantherrenhe Ngkartele-arle alakenhe akangketyeke mpwareme ilpernetyakenhele.
3“Iwenhenge-arle-ame arrantherre akurne-irreme arrpenhe areyeke apale angkemele itnenhe arratye-iletyeke akwele? Arrantherre itirrewarraye arrekantherre-urrke, urreke arrantherre arrpenhe areyeke akenge itirretyenhenge. The arrekantherre arratye ileke arrantherre itelarerrirretyeke arrantherre akurne mpwarerlenge kele Ngkarte-kenhe arrpenheke anteme angkemele arrantherre apeke renhe aremele akurne-irrerlenge.”
6Jesus-ele itnenhe akwete akaltyele-anthetyame, “Angkentye Mwerre Ngkarte-kenhe kwenhe atyeperre anthurre. Kele arlte arrpenheme arrantherre angkentye nhenheke angkemele kele tyerrtye arrpenhe areye akenhe akangkwe-irretyakenhe-arle. Kele itne apeke ipmentye-iweme iwenhe renhe itneke arrantherre-arle ilerlenge, itneke awethe iletyalaye. Nhenge tyerrtye itne akenhe akngwelye ahe akngerre-arteke, pike-pike-arteke-arlke. Arrantherre apeke akwete angkentye Ngkarte-kenhe itneke mwerre ilerlte-apemele itne-arle irlpe martelhentye-arle akangkwe-irretyakenhe, itne anteme arrekantherre ahele angkerremele, akngwelye nhenge ahe akngerrele tyerrtye uthneme, alakenhe athewe. Itne anteme akurne-ileme angkentye arrantherre-arle angkeme, tyerrtyele nhenge pike-pike merne anthemele imerte itne ahelhe urrkngeke akwernemele imerte ulthemele, alakenhe akwele itne angkentye renhe akurne-ilentye akngerre. Arrantherre akenhe Angkentye Mwerre Ngkarte-kenhe akwete itneke ilerle-apetyale anetyeke-arle, kele impetyeke ante, angkentye yanhe-arle atyeperre anthurrenge.”
Akwete anthurre Ngkarteke angketyeke, mwernte-irretyale
7Kele Jesus-ele itnenhe akaltyele-antheke alakenhe Ngkarteke angketyeke, “Kele, angwenhele apeke arne iwenhe-iwenheke renhe Ngkarteke akwete anthurre apayuthnerle-aneme re renhe ineme-arle. Kenhe angwenhe apeke arne iwenhe ikwere apale unthemele kele re renhe aretye-alheme-arle. Kenhe angwenhele apeke re arriwe renhe ltare-atwetye-alhemele, Ngkartele renhe altywere-ileme re Ikwere-werne alhetyeke renhe aretye-alhetyeke. Alakenhe ikwerenge anteme arrantherre Ngkarte renhe arne iwenhe-iwenhe apeke ikwere apayuthnerrirretyeke, kele Re arrenhantherrenhe anthetyenhe-arle. Kenhe arrantherre apeke Ikwere akwete-arle untherlte-anemele, Re kele arrekantherre imernelheme. Kenhe arrantherre apeke arriwe renhe akwete-arle ltare-atwerlte-aneme, kenhe Re kele arriwe renhe arrekantherre altywere-ileme-arle arrantherre-arle irrperrirretyenhenge. 9Kenhe arrantherre nthakenhe-arle irretyenhe nhenge alere arrekantherrenhele apeke merneke apayuthnerlenge? Arrantherre-ame renhe apwerte anthetyenhe? Arrangkwe! 10Nhenge re arrenhantherrenhe irrpenngeke apayuthnerlenge, renhe akenhe apmwe anthetyakenhe. Arrantherre renhe irrpennge-arle anthetyenhe arlkwetyeke. 11Kele arrantherre ampe arrekantherrenhe areye arne mwerre antherlte-aneme itne arrenhantherrenhe apayuthnerlenge, kele arrantherre-arle akurne akwete mpwarerlte-anemenge. Kele Akngeye arrekantherrenhe alkere akertnele-arle anemeke, arrantherre itirrewarremele iwenhe-arteke-arle Re aneke? Rarle nhenge mwerre anthurre aneme, arrekantherrenge mwerre akngerre ulkere. Re akenhe arne mwerre akngerre aywerrkele anthentye akngerre-arle arrantherre apayuthnerlenge.”
12Jesus angkeke, “Arrantherre ahentye-aneme tyerrtye arrpenhe areyele mwerre aywerrkele mpwaretyeke arrekantherre. Kele arrantherre-arlke akenhe akwete mwerre aywerrkele mpwaretyeke tyerrtye arrpenhe areyeke alakenhe-arle Moses uthene artwe angkentye Ngkarte-kenhe awemele ilerle-apentye akngerre areye uthenele-arle intelhe-ileke arrule anthurre, anwerne alakenhe mpwaretyeke.”
Iwerre urlpmeke unthemele renhe apentetyeke
13Jesus angkeke, “Ingkirrekele awerrirraye! Iwerre atherre kwenhe aneme tyerrtye areyele apentetyeke. Iwerre anyente arriwe anteke-akerte-arle aneme, iwerre arrpenhe akenhe urlpme anthurre-arle, arriwe urlpme-akerte. Kenhe iwerre anteke re akenhe impeltye anthurre-arle mwerre anthurre, iwerre ikwerenge akenhe tyerrtye atningke anthurre-arle irrpenheme arriwe antekenge. Kele iwerre re akenhe apmere akurne-werne-arle tyerrtye areye Ngkarte-ketyenge akngakemele irrare anerlte-anetyenhe. Kele iwerre urlpme re akenhe impeltye anetyakenhe-arle lterrke anthurre apentetyeke, tyerrtye urrpetye ware-arle akenhe arriwe urlpme ikwere irrpenheme iwerre renhe apentemele. Kele iwerre re akenhe alheme apmere mwerre akngerre ikwere-werne Ngkartenge-arle anyente-irreme-werne, akwetethe-arle akangkentye anerlte-aneme-werne. Kele, arrantherre iwerre urlpme ikwere irrpenhemele akwete urlpme renhe apentetyeke.”
Arrantherre ameke-arelhetyeke
15Jesus-ele atyewe ikwerenhe areye alkngarre-ileke alakenhe, “Ameke-arelhewarraye akwetethe yanhe areye-ketye urrtyirremele ilemenge itnarle angkentye Ngkarte-kenhe ilerlte-apeme akwele. Itne akngwelye artnwere-arteke yepe-yepe yenpeke irrpemenge yepe-yepe akwele anteme, itne-arle alengke-iwelheke iperre, apetyewarremele anteme yepe-yepe itnenhe uthnemele arlkwetyeke. 16Kele arrantherre itnenhe alhengke-arle-areme itne-arle mpwaremenge, arrantherre arerrirremele itne akurne atningke mpwarerlenge kele arrantherre itelareme-arle urrtyirrentye akngerre nhenhe areye. Merne ntange areye-akerte itelaraye, merne kripethe areye-arle arne lyeke-lyekenge lyapetyakenhe-arle, nhenge merne utyerrke arne ilpeyenge lyapetyakenhe-arle. 17Arrantherre itelareme arne mwerrenge-ante kwenhe merne ntange lyapeme mpenge-irremele ikwemeye-irremele, kenhe arne akurnenge akenhe merne akurne-arle aneme. Nhenge alakenhe-arlke arne mwerrenge merne akurne-arle lyapetyakenhe aneme, alakenhe anteye arne akurnenge merne mwerre lyapetyeke arrangkwe-arle. Awemele anteme akaltye-irraye angkentye nhenhe areyeke, angkentye Ngkarte-kenhe awemele ilerle-apentye akngerre areyele mwerre-ante-arle mpwareme, kenhe angkentye Ngkarte-kenhe akngarte-iwentye akngerre areyele akenhe akurne-ante-arle mpwarerlenge. 19Arrantherre itelareme artwe garden-eke-artweye, re areme arnele merne ntange akurne akwete atnyenerlenge, re ultakemele-arle ureke iweme. 20Alakenhe-arteke, arrantherre arerrirremele angkentye Ngkarte-kenhe awemele ilerle-apentye akngerre areyele akurne mpwarerlte-aneme kele arrantherre itelarerrirreme itne-arle urrtyirreme-arle angkentye Ngkarte-kenhe ileme.”
Jesus-arle angketyenhe rarle tyerrtye arrpenheme areyeke akutne-arle
21Jesus awethe angkeke, “Arrantherre itelareme arrpenhemele ayenge-arle akngerrepate ilemenge. Arrpenhe areye akenhe urrtyirremele ileme ayenge-arle akwele akngerrepate itnekenhe. Kenhe itne akenhe akangkwe-irretyakenhe awetyakenhe-arlke mpwaretyakenhe Ngkartele-arle itnenhe ilekeke. Alakenhenge anteme Ngkartele itnenhe atyewe aketyakenhe itnenhene arntarnte-aretye-arlke-akenhe akngerrepatele-arteke. 22The arrekantherre ileme arlte ingkernenge tyerrtye areye tnetyenhe Ngkartenge arrekwele-arle atningkele ayenge-arle akngerrepate ileme areye akenhe alakenhe-arle angketyenhe, ‘Akngerrepate! Arritnye ngkwinhe angkeke-arle iperre anwerne angkentye ngkwinhe tyerrtye areyeke ilemele, anwerne-arle arrentye areye aywepeke tyerrtye areye-ngentyele arritnye ngkwinhe ilemele, awethe ante, arritnye ngkwinhe ilemele, anwerne arne ilyernpenye atningke ngangkerele mpwareke.’ 23Kenhe ayenge akenhe itneke alakenhe-arle angkirtnetyenhe-arle, ‘Arrangkwe, the arrenhantherrenhe itelaretyakenhe-arle. Arrantherre akwetethe-arle akurne mpwaretyarte Ngkarteke. Atyenge-ketyenge alhaye!’”
Ayeye apmere artentye akngerre atherre-akerte
24Jesus angkeke, “Awerrirraye! Tyerrtye angwenhele ayenge-arle awemeke nthakenhe-arle angkeke-arle iperre, renhe anteme aywerrkele mpwaremele, artwe-artekele-arle ilthe ikwerenhe apwerte athirnteke-arleke arteke. Nhenge artwe nhenhe itelarentyele-arle apwerte athirnte angwareke apmere arteke re apwerteke-arleke mwantyele arteke, rarle lterrke anekenge. 25Ikwerenge-ntyele kwatye akngerre apetyeke imerte anhemele, lherenge-arlke kwatye urewe akngerre anteke-irreke kele apmere re akenhe atnyetyakenhe akwete-arle anerlenge. Rlke akngerrele-arlke werneke apmere renhe ankerte-iwemele, kele atakelhetyakenhe akwete-arle anerlenge, artwe rarle apwerte athirnteke artekenge apmere ikwerenhe, mwerre akwete tneke akngelhetyakenhe-arlke. Alakenhe arrantherre apeke angkentye atyinhe awerrirreke-arle iperre, renhe anteme aywerrkele mpwaremele, kele arrantherre atnyetyakenhe, kele lterrke-arle aneme arrekantherre apeke akurne-irrelenge. 26Kele tyerrtye angwenhele apeke aweke-arle iperre nthakenhe-arle ayenge angkeke imerte ipmentye-iwemele-arle rarle artwe arrpenhe apmere artentye akngerre-arteke-arle. Artwe nhenhele akenhe arerte apeke lhere itereke-arle apmere ikwerenhe arteke ahelhe urrkngele-arle. 27Ikwerenge-ntyele kwatye akngerrele anheke, lherele kwatye urewe akngerre anteme irreke anteke-irremele. Kwatye ikwerenge akenhe rlke akngerrele-arlke werneke apmere renhe ankerte-iwemele, iparrpe anthurre apmere re atakelheke imerte atnyemele uyerretyeke-ante.”
Jesus ilernpenye angkeme
28Jesus-arle angkentye nhenhe areyeke angkeke iperre tyerrtye renhe-arle aweke itne arnterre anthurre apatewarreke, rarle nhenge ilernpenye anthurrele angkerlenge. 29Alakenhe-arle nhenge Jesus-elarle tyerrtye areye akaltyele-anthetyarte, re itneke angkentye ileke Ngkartele-arle renhe anthekenge. Kenhe angkentye Moses-kenhe akaltyele-anthenhe-anthenhe areyele tyerrtye itnenhe akaltyele-anthetyarte, itne itneke angkentye itnekenhe-arrpe iletyarte, angkentye itnekenge-arrpe ware.

Did you know?
Judgment, the narrow way, and a firm foundation
- The event record dates the start of the Sermon on the Mount to AD 28 and its duration to one day. This chapter ends as the crowds are astonished at Jesus’ teaching, because he taught as one who had authority, and not as their scribes.Sources: Sermon on the Mount · the Bible text itself
- Jesus warns that the judgment a person pronounces, and the measure that person uses, will be turned back on them. He pictures someone who notices a speck in a brother’s eye yet misses a beam in their own, and he says the beam must be removed first.Sources: the Bible text itself
- The chapter calls doing to others as you would have them do to you the essence of the Law and the Prophets. It contrasts a wide gate and broad way that leads to destruction, which many enter, with a small gate and narrow way that leads to life, which few find, and it compares hearing these words and acting on them to a house built on rock rather than on sand.Sources: the Bible text itself
Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.
Credits and license for this translation
Angkentye Mwerre Portions of the Holy Bible in the Central and Eastern Arrente language of Australia copyright © 2002-2014 Wycliffe Bible Translators Language: Eastern Arrente (Arrernte, Eastern) This translation is made available to you under the terms of the Creative Commons Attribution-Noncommercial-No Derivatives license 4.0. You may share and redistribute this Bible translation or extracts from it in any format, provided that: You include the above copyright and source information. You do not sell this work for a profit. You do not change any of the words or punctuation of the Scriptures. Pictures included with Scriptures and other documents on this site are licensed just for use with those Scriptures and documents. For other uses, please contact the respective copyright owners. 2019-05-14
Source: http://ebible.org/aer/ · eBible.org