Mateus 10
Enga New Testament (2023 Edition) · Toque num versículo para ver as referências cruzadas.
12 Aposole Dutupa
1Jisasame baanya 12 disaipolo dutupa epena latala, dutupame imambu koo dupa watao pyao, endakali yaina tata waka-waka dupa pitakame pyapae dupa mee jakamaiyoo pina lao dutupa kyeto maiya. 2Baanya 12 aposole dutupanya kenge dupa: wambao doko Saimone kenge mende Pita lenge dokopi, Pita kaiminingi Andruapi, Sebedi ikiningi Jemesapi, Jemesa kaiminingi Jone lenge dokopi, 3Pilipapi, Batalomyuapi, Tomasapi, takisa nyingi Matyuapi, Alopiusa ikiningi Jemesapi, Lebiusa kenge mende Tadiusa lenge dokopi, 4Kena tange Saimone lenge dokopi, yandapipi dupanya kinginya Jisasa maiya akali Judasa Iskariota lenge dokopi, dutupa.
12 Aposole Dutupa Kalai Pyaa Pena Leamo Doko
5Jisasame 12 aposole dutupa kalai pyaa pena latala lamaiyoo, “Akali tata waka dupanya yuupi, Samaria tange dupanya taonopi, dupanya nyakama napupape. 6Israele dupa sipisipi alu petae joo kalyamino dupanya pupape. 7Pao pituu, ‘Kingdom kaiti-kisa singi doko tengesa ipatelyamona’ lao nyakamame lamaiyepape. 8Endakali yaina pyapae dupa saka nyalapape. Kopetali dupa auu pisalapape. Imambu koo dupa watao pyalapape. Nyakamame sambala naeyao mee nyilyamino dokonya meaka maiyepape. 9Nyakamame golopi, silipapi, kopapi mende matapunya manja naeyao mee pupape. 10Akali kalai pita dokome nee toma napenge. Dopana, nyakama kalai pyaa patami yuu dupanya, nokainapi, moko peepi, pangalipi, yonge pee isa pingi wakaowapi mende nyoo napupape. 11Nyakama taono-tamopi, yuu yakane-tamopi mendenya pupala, endakali tolatae epe mende kutao kandatala, doko-pipa iki katao etapala, pupenge gii dokonya baa yakinatala pupape. 12Nyakama anda dokonya kolandao pituu, mona yaepao kalyepape lao, anda dokonya palengema endakali dupa lamaiyepape. 13Anda dokonya palengema endakali dupame nyakama auu pyoo lanyetamino doko, nyakamanya mona yaepenge doko dupa-kisa sina kaeyalapape. Auu pyoo lanyala naeyatamino doko, nyakamanya mona yaepenge doko tange nyalapape. 14Yuu tange mendeme nyakama auu kaeyao lanyala naeyao, nyakamanya pii doko nasoaka pia-kandeno doko, andapi, taonopi dupa yakinatala pao pituu, nyakamanya mokonya yuu katata dupa lyanda lanya setapala pupape. 15Goteme endakali dupa yapatamo gii dokopa Sodomopa, Gomorapa tange dupa tanda andake maitaka doko, nyakamame yuu lyanda lanya setatami taono dokonya tange dupa tanda eteteaka andake maitana lao nambame nyakama kiningi langilyona” lea.
Kenda Longo Mendapu Ipatana Leamo Doko
16“Nyakama sipisipi jepae dupa nambame yana kapu dupanya kainanya pupa lelyo. Dopana, kanopato dupame waa katengemali pyoo, nyakamame waa katao kalyepape. Yaka maiyolee dupame ema napyoo, mende koeyasala naeyao petengemali pyoo nyakama kalyepape. 17Endakali dupame nyakama anjetala laminao pao, kanjole dupa-kisa kotimi lata, dokaitanya lotuu anda dupanya nyakama konjame pyata pitamina, endakali dopale dupa wandyoo kalyepape. 18Nyakamame namba watao paelyamino latala, endakali dupame nyakama laminao pupala kiŋipi, gapenapi dupanya enombanya katasetami. Dopa pitaminopa, nyakamame kandelyaminopi, silyaminopi dupa kiŋipi, gapenapi, akali tata wakapi dupa panao lamaiyepape. 19Endakali dupame nyakama anjetala laminao kote anda dupanya pataminopa, nyakamame aipa lao kote lamanape, pii aki lamanape lao masepae longo nyala naeyalapape. Kote lapenge gii dokopa nyakama pii lapenge dupa dita. 20Nyakamame pii latami dupa, nyakama tangeme masoo laa naeyatami. Nyakamanya Takangenya Spirita dokome ditamopa latami. 21Kaiminingi mendeme kaiminingi mende pyao kumasina lao anjoo maita. Takange dupame nyakamanya wane dupa dopaka pina lao anjoo maitami. Wane dupame nyakamanya endangi takangepi dupa yandapipi jetala, pyao kumasina lao maitamiaka. 22Nyakamame nambanya kenge doko lao panelyamino latala, endakali dupa pitakame nyakama imbu kaeyatami. Dopaka doko, endakali mende kyeto joo katao, baa etata gii dokonya tuu latamo doko, baa Goteme pyoo nyeta. 23Dopana, endakali dupame taono mendenya nyakama tanda dyoo koeyasiami-kandeno dokopa, nyakamame taono doko yakinatala mendenya paka pupape. Israele yuu dokonya taono dupa pitakanya nyakamame kalai pyoo etala naeyataminopa, Akalinya Ikiningi doko ipatana lao nambame nyakama kiningi langilyo.
24“Mana nyingi dokome baanya mana lenge doko ita naminingi. Kalai akali dokome baanya akali andake doko ita naminingiaka. 25Mana nyingi doko baanya mana lenge dopale katatamo doko yaka. Kalai akali doko baanya akali andake dopale katatamo doko yakaka. Anda tange doko kenge Belesabulu maingima endakali dupame baanya tata dupa kenge etete koo mendapu maitamiakana” lea.
Gote Iki Paka Kaeyapengena Leamo Doko
26“Sanga pyatae silyamo dupa gii mendepa lopapae seta. Yame pyatae silyamo dupa gii mendepa lopapae setamopa, endakali dupame kandatami. Dopana, nyakamame endakali dupa paka nakaeyalapape. 27Nambame yuu iminjimupa pii langilyo dupa, tii pitamopa nyakamame lamaiyepape. Pii kakateame langipupa kaleme silyamino dupa, nyakamame anda ketae dupanya katao wii lao lamaiyepape. 28Yonge doko pyao kumasingima endakali dupame imambu doko kapa pao pyao kumasala naeyapengena, dupa nyakamame paka nakaeyalapape. Yongepa, imambupa lapota ele panda koo dokonya koeyasepenge akali doko nyakamame paka kaeyalapape. 29Muni konde mendaimi iki yaka pimbinakae lapoma salimi lengema. Dopaka doko, nyakamanya Takange dokome nakandelyamopa, yaka dupanya mendaipi mende yuunya isa pyakatala kumala naenge. 30Dopaka pyoo, nyakamanya aiyomba iti dupa pitaka mendai-mendai lao Goteme itaki pyapae. 31Dopana, yaka pimbinakae longo dupa nyakamame ita minao kalyaminona, paka nakaeyalapape” lea.
Kraisa Tatana Lao, Lao Panenge Dokonya Leamo Doko
32“Endakali mendeme baa namba tatana lao, endakali waka dupanya enombanya lao panatamo doko, baa namba tatakana lao, nambanya Takange kaiti-kisa katenge dokonya enombanya nambame lao panatoaka. 33Dopaka doko, endakali mendeme baa namba tata daana lao, endakali waka dupanya enombanya latamo doko, baa namba tata daakana lao, nambanya Takange kaiti-kisa katenge dokonya enombanya nambame latoakana” lea.
Mona Setao Katena Lao Naepeona Leamo Doko
34“Endakali dupa isa yuu dakenya mona setao katena laanya namba epeena lao masala naeyalapape. Endakali dupa mona setao katena lao naepeo. Nambame konjuwa minao epeo. 35Ikiningipa takangepa wakale pyaloo pingipi, wanengepa endangipa wakale pyaloo pingipi, aeyangepa wakale pyaloo pingipi, mana doko nambame sakatasalanya epeo. 36Tenge dokonya, endakali mendenya tata etete dupame baa yandapipi jetami. 37Endakali mendeme baanya endangipa, takangepa mende moname etete auu kaeyapala, yongeme iki namba auu kaeyatamo doko, baa kapa pao namba tata nakatata. Endakali mendeme baanya ikiningipi, wanengepi mende moname etete auu kaeyapala, yongeme iki namba auu kaeyatamo doko, baa kapa pao namba tata nakatataka. 38Endakali mendeme baanya poko ita doko nyoo soo, namba watao naipatamo doko, baa kapa pao namba tata nakatataka. 39Endakali mendeme baa lete katatoana lao masetala katapenge kaitini kutatamo dokome baanya lete katenge doko yakinata. Endakali mendeme namba masetala, baanya lete katenge doko yakinata dokome baanya lete katenge doko kandao nyetana” lea.
Yole Nyetamina Leamo Doko
40“Endakali mendeme nyakama auu kaeyao lanyilya dokome, namba lanyilyamosaka pingi. Endakali mendeme namba auu kaeyao lanyilya dokome, namba puu lea Akali doko lanyilyamosaka pingi. 41Propeta mende baa propeta-lamona latala endakali mendeme lanyetamo doko, propeta dupa Goteme yole pita dopaka pyoo baa yole pita. Endakali tolatae mende baa tolatae-lamona latala endakali mendeme lanyetamo doko, endakali tolatae dupa Goteme yole pita dopaka pyoo baa yole pita. 42Endakali mendeme endakali anasale joo katengema datupanya mende nambanya disaipolo mende-lamona latala, endaki kii napae kapo mendai iki kamuu maita dokonya yole doko alu napyoo, sulu setana lao nambame nyakama kiningi langilyona” Jisasame lea.

Você sabia?
Os doze enviados em missão
- Simão, chamado Pedro, e seu irmão André — o primeiro par nomeado entre os doze — eram pescadores de Betsaida, na costa ocidental do mar da Galileia. Tiago e João, citados em seguida, eram filhos de Zebedeu, um pescador da Galileia que tinha os próprios barcos e empregados.Fontes: o próprio texto bíblico · Simon Peter · Andrew · Zebedee
- Mateus, identificado na lista como o cobrador de impostos, era filho de Alfeu e antes era conhecido como Levi; recolhia impostos em Cafarnaum, e o nome Mateus significa “dom de Deus”. Tomé, nomeado ao lado dele, também era chamado Dídimo, o equivalente grego do nome hebraico, que significa “gêmeo”. Bartolomeu significa “filho de Tolmai” e, em geral, se supõe que seja a mesma pessoa que Natanael.Fontes: o próprio texto bíblico · Matthew · Thomas · Bartholomew
- Jesus adverte que o dia do juízo será mais tolerável para Sodoma e Gomorra do que para uma cidade que recusar os doze apóstolos. O Dicionário Bíblico de Easton (1897) descreve essas cidades da planície de Sidim como destruídas pelo fogo e proverbiais pela maldade, e as situa, provavelmente próximas uma da outra, perto da extremidade norte do que hoje é o mar Morto.Fontes: o próprio texto bíblico · Sodom · Gomorrah
Notas escritas com auxílio de IA a partir de fontes abertas (Theographic Bible Metadata, CC BY-SA 4.0; Easton’s Bible Dictionary, domínio público) e revisadas antes de publicar.
Créditos e licença desta tradução
Enga New Testament (2023 Edition) The New Testament in the Enga language of Papua New Guinea, 2023 Version Enga Baibolo Epapu Kapilyetae Doko Nupela Testamen long tokples Enga long Niugini copyright © 2014-2023 Wycliffe Bible Translators, Inc. ℗ Wycliffe Bible Translators, Inc. Language: Enga Dialect: Kaina (Central) Translation by: Wycliffe Bible Translators This translation is made available to you under the terms of the Creative Commons Attribution-Noncommercial-No Derivatives license 4.0. You may share and redistribute this Bible translation or extracts from it in any format, provided that: You include the above copyright and source information. You do not sell this work for a profit. You do not change any of the words or punctuation of the Scriptures. Pictures included with Scriptures and other documents on this site are licensed just for use with those Scriptures and documents. For other uses, please contact the respective copyright owners. 2023-09-13
Fonte: http://png.bible/enq2/ · eBible.org