Nations Bible

Mateus 6

Fúka Moodaanaki Kira Ufa Afaqínaasa Ufa · Toque num versículo para ver as referências cruzadas.

Amuqusinana qumee nimira ufa.

1Yisufa narí faiqi namufaqa faiqí anaasee faqa maaqi qimaseenoo qimanniminoo qinau. Innee qini ufa irimariasa Anutunara iriseeqa moo amaana saika fee aqoonausa dadaaqira fee mina auqarara sia aiqamausa nifusaa auqaaqa. Kukeeqasee reendeenamasee auqaaqa. Aiqamausa nifusaa mi ainainna auqainafa minara faiqí anaasee aiqamausa qiqafaaqeera miqinnaranoo. Miqinana Anutufa siamma innaarunai mina akiaqara ani feefauru amaqaannoo. Qumee kai aiqama ainaina narí Anutuna afusaa kai dadaaqinanoo Anutufa doo narí qafaida mina akiaqara ani feefauru innaarunai quqammamaqaannoo.

2Qaaraiki mariasa misa moo amiqira ainaina dadaaqinoo aqoonausee Anutunee nimiani qimaseenoo maqusa qambaana oonuree ukeena fuaqasee faiqí anaasee nifusaa dadaaqinaqa qiqafamaseeqa qimooqiaqeera qimariasa doo nariqa miqoo taikaida miqidaqa. Innee sia misa naanna raaqa. 3Innee moo amiqira ainaina dadaaqammamianeera qumee kai maqandanai amia, faiqí nifusaa qafee foora. 4Qumee kai amimarinanoo inni nikoofa aiqama qumee ainaina qafee marifa mina akiaqara ani feefauru quqammamaqaannoo.

Innaaru qira ufa oosana iroo ufafa.

5Innee innaaru qidaqa misa qaaraiki mariasa naanna sia raaqa. Misa amaana maqaki kikiqamafidaqa qimariasa maqusa qambaanai kikiqama fidaqa qimariasa innaaru qidaqa. Faiqí anaasee aiqama qiqafaaqee qidaqa miqidaqa. Qinee anoona ufa uqanna inni qimannimidaqa. Doo misa miqiana akiaqara doo faiqí nimooqirana kai maraidaqa. Miqoo taikaida miqidaqa. 6Innee innaaru qidaqa inneeqa maaqaki inneeqa kai keeqafinana kooqi ititaseenana qumee kai inneeqa nikoonara innaaru qifanoo, aiqama ainaina kukeeqarana faqa qafee marifa ani qafamaseenoo mina akiaqara amaqaannoo.

7Innee innaaru qidaqa aanaamuru mariasa naanna sia raaqa. Misa sia ufara randaidaqa ufa fannoo urirara kai urirara kai qidaqa. Misa Anutufa maasara amiqimmasee irianifeera qimasaida miqidaqa. 8Misa naanna sia raaqa. Inni nikoofa sia innee irammiriaqoo kai iridanoo. Ooqai mifa irimarifa maridanoo. Minara fifau ufa urirara kai urirara kai qidaqa sia innaaru qiaqa. 9Innee innaaru qirara maaqi qimasee innaaru qiaqa.

Oo innaarunai qikoofa faiqí anaasee aiqama ani auquara uriqaramasee naaquqaani.

10Ani innaarunai ququsa maa maqanasaa kambiqaani, innaarunai ani aiku asauku mariasa ani iriranamau kai andeeqasee fimariasa maridaqa maasa maa maqanasaa qaraasa misa naanna ramasee mi iriranamau kai fuaqaana.

11Anee maqee faasaana maasa qimanasaa narana qimia.

12Akaqausa maasa manda ainaina qimimariana maasa minnisaanana miqikai inana anee faqa maasa manda ainaina akiaqara maraqu qisa.

13Sia anee maasa rarisameeqeenana afeeka nimaniraqoo quqaqisaa. Manda fasiqa asaukuki marunnana anee Anutufa uqeereeqee kaqinni amiqiraqoo quqaqisaa.

14Yisufa mi ufanara kaifaa maaqi qimasee qimanniminoo qinau. Innee inneeqa niqoonausa faqa aanaamuru faqa manda oosana akiaqara mininnisaifanoo innaarunai nikoofa inni manda oosana akiaqara faqa minnisaannoo. 15Innee inneeqa niqoonausa faqa aanaamuru faqa manda ainaina sia mininnisaifanoo inni nikoofa miqi kai inoo sia innindi faqa mara aqunnisaannoo.

Aararee marina innaaru qira oosana mi ufafa.

16Innee narana minnisee naararee marinaqa innaaru qidaqa qaaraikimariasa naanna sia raaqa. Misa narana minnisee innaaru qiaqeera noori runusee doona akiiseeqa maridaqa faiqí anaasee sia narana naidammiafoo qiaqeera miqidaqa. Qinee anoona ufa uqanna inni qimannimidaga. Misa miqoo kai taikaida miqidaqa. 17Innee narana minnisee innaaru qiaqeera sia miqi iaqa. Innee nammari auqamasee qamunna amiqirana afisusee nikiaqa auqamaseeqa naanaidara qidana faiqí anaasee ani qafamasee maaqi qifara, maafa sia narana minnisaidanoo innaaru qidanoo miqi qiaqeera miqinnaranoo. Anutufa kai inni nikoofa aiqama qumeendaraa ainaina faqa qafee marifa mifa kai qafamasee mina akiaqara animmamaqaannoo.

Oosana oosana qumiasana innaarunai kai afeedira ufa.

19Innee maa maqa maaqanasaa sia aiqama qumiasana oosana oosana mareeqee quqaseeqa afeediaqa. Taafi aruani, atauku aruani, qooqoosa aukuani, ummuara fasiqa aniree ummuara mareefaara. 20Innaarunai kai qumiasana oosana oosana afeedi iseenana miqoo marinanoo sia taafi aruannoo sia qooqoosa aukuannoo sia ummuara fasiqa mareefara amiqira qoo kaqi mariannoo. 21Inni irirafa inni nimuqusa inniqa qumiasana mariqoo kai miqoo kai irirafa mariannoo. Minara innaarunai kai qumiasana afeediaqeera qidaqa. Inni irirafa miqoo kai mariannoo.

Afu afaaqa qoomarafoora maridanoo.

22Faiqí nifiriki niqafeemarifa afaaqa kaaqa qarafa maridanoo narí ainainara sia tatamaqifa kaqi paapaa idanoo nimimarifa. Faiqí moo fannoo oori akooqarafa narí ainaina kaaqa tatamaqimarifa maridanoo. Inni noori nifu miqifaqa innee asukunakinai mariafanoo.

Nifaaqasaaqaraa ainainara indee indee irana qaoo qira ufa.

24Moodaa fasiqa fannoo sia amana qaara rakisiraqanda moodaa kari ainainamma nimaqaannoo. Mifa indaaruqaa rakisiranara akooqaannoo moo rakisiranara aidiannoo. Sia miqinoo mifa moo rakisiranasaa atooqaannoo moo rakisirana minnisaannoo. Innee miqi kai iqa mariafaqa sia amana Anutunara faqa maqasaa qumiasanara faqa moodaanaki sia amana ainainamma nimaqeennaranoo.

25Minara qinee qimannimidaqa. Innee sia inneeqa kaqi mariranara nimuqusiaqa. Inni narana neemariana faqa nammari neemariana faqa qamunna afisimarianara faqa sia minara yai fee maraanau yai fee maraanau qiaqa. Qamunna narana oorudupirafa marinara sia minara irinanoo umaara raani. Anee sia kuqimariananoo kaqi mariannanara minara kai asasiaqa. Aneenna kaqi mariannanara mina akiaqara firaa ainaina maridanoo narana faqa nammari faqa qamunna faqa oorudupirafa maridanoo. 26Innee kaaqa qamunna naranara rimariasa qinee nindafaidaqa. Qufini sia narana ummaqidaqa sia aiqidaqa, sia afeedidaqa, kaqi narana naidaqa. Anutufa misa nimidanoo. Anutufa ufini ririmma kaqikaa ainaina dapi ainaina narana niminoo inani. Innee faiqí firaa ainaina mariafanoo uriqaraqa mariafanoo inni faqa nimiannoo. 27Amanee anee aneenna kuqirana amuqusiranannai aneenna marirana firarisamasee kisaaqasaa marinnaree. Sia amana. Doo nanaree fifau naranara ummaara raidanoo fee.

28Nanaree fifau qamunnara yai fee maraanau yai fee maraanau qidanee. Innee nandaki kaasau taatuqee tamookeena qafamasee minara iriaqa sia ainainidaqa sia qamunna akunusee afisidaqa. Anutufa taatuqee qamunnara foora afisuamaqaidanoo. 29Ooqai Sooroomoonafa mifa amiqira qamunna qaueesa reemaru qamunnana afisimarufa, koora ainaina faqa afisimarufa, sia mifa maa kaasau taatuqeena afufeenaara imarindee sia mina qamunna uriqararafa marinau, mina qamunna ureeqarafa marinau, doo saa qamunnara ummaara raranara doo minnisaaqa. 30Kaasau qusau ainaina Anutufa qamunnara foora nimidanoo. Sia mina kisaaqasaa marira ainainau nimidanoofau. Maqee kasidanoo duna ateekasee ida araseefandinna ainainafa maridanoo. Innee faiqí sia miqirausa. Innee kisaaqasaa inni aukuana marifara. Anutufa qusau ainaina ririmma qamunna nimidanoo inni faiqí fiqaramasee nimiannoo. Innee faiqí qamunna ainara kai nimuqusimarianara Anutunara kaqikaaqoo kai irirana Anutunasaa rusi mariafanoo, aaqaida miqimariafanoo.

31Innee sia nimukaina maaqiaqa nana qamunnee afisuanauree nana naranee naanauree, nana nammari fee naanauree. Sia miqi qiaqa. 32Anutuna ufa sia irimariasa misa miqi qidaqa. Innee sia misa naanna raaqa. Innee inni innaarunai nikoonara kai iriaqa. Mifa faasai inni narana inni qamunna ainainara faasamma iridanoo. 33Innee Anutuna ququsara faqa inni andeeqarafa Anutuna andeeqara fara foora marinaqa mi irirafa kai marinanoo niqinaaqa mara quqaseeqa fifanoo maasa narana aina faqa qamunna ainaina faqa Anutufa qimiannoo. 34Minara qinee inni qimannimidaqa maqeera kai iriaqa. Duna faasaana ainainara sia irinanoo ummaara raani. Duna narí kai narí aiqama kambiqaaninna ainainara rakisiannoo. Faasaambaasaana maqee ainainara kai iriqa fuaqa qidaqa.

Ilustração artística — interpretação, não registro histórico.

Você sabia?

Justiça em segredo e confiança

  • Este capítulo faz parte do Sermão do Monte. Um registro de eventos data esse sermão de 28 d.C. e registra que durou um único dia.Fontes: Sermon on the Mount · o próprio texto bíblico
  • Jesus diz para não tocar trombeta nas sinagogas e nas ruas ao dar aos necessitados, como fazem os hipócritas a fim de serem honrados. Ele também adverte contra orar nas esquinas para ser visto e contra jejuar com o rosto desfigurado; em vez disso, descreve orar num quarto interior com a porta fechada e jejuar com a cabeça ungida e o rosto lavado.Fontes: o próprio texto bíblico
  • Jesus diz que nem Salomão, em toda a sua glória, se adornou como um dos lírios do campo. Um verbete de dicionário explica que seu nome hebraico, Shelomoh, significa “Pacífico”, que ele era filho de Davi com Bate-Seba e que Natã o chamou de Jedidias, “amado do Senhor”; seu reinado está registrado em 1 Reis 1–11 e 2 Crônicas 1–9.Fontes: o próprio texto bíblico · Solomon

Notas escritas com auxílio de IA a partir de fontes abertas (Theographic Bible Metadata, CC BY-SA 4.0; Easton’s Bible Dictionary, domínio público) e revisadas antes de publicar.

Créditos e licença desta tradução
Fúka Moodaanaki Kira Ufa Afaqínaasa Ufa
Portions of the Holy Bible in the Binumarien language of Papua New Guinea
Buk Baibel long tokples Binumarien long Niugini
copyright © 1983, 2001, 2017 Wycliffe Bible Translators, Inc.
Language: Binumarien
Translation by: Wycliffe Bible Translators
This translation is made available to you under the terms of the
Creative Commons Attribution-Noncommercial-No Derivatives license 4.0.
You may share and redistribute this Bible translation or extracts from it in any format, provided that:
You include the above copyright and source information.
You do not sell this work for a profit.
You do not change any of the words or punctuation of the Scriptures.
Pictures included with Scriptures and other documents on this site are licensed just for use with those Scriptures and documents.
For other uses, please contact the respective copyright owners.
2013-08-10

Fonte: http://png.bible/bjr/ · eBible.org

Fale com a gente

Conte de onde você lê, como a Bíblia tem te ajudado ou o que podemos melhorar. Lemos todas as mensagens.