Mateus 7
ସଃର୍ଗାର୍ ବାଟ୍ ନଃଉଁଆ ନିଅମ୍ · Toque num versículo para ver as referências cruzadas.
ବିନ୍ ଲକାର୍ ଦଃସ୍ ଦଃର୍ତାର୍
1“ତୁମିମଃନ୍ ଜଃନ୍କଃରି ବିଚାରେ ନଃହେଳାସ୍, ଇତାର୍ ଗିନେ ବିନ୍ ଲକାର୍ ବିଚାର୍ କଃରାନାୟ୍ । 2କାୟ୍ତାକ୍ବଃଲେକ୍ ଜୁୟ୍ ବିଚାରେ ବିଚାର୍ କଃରାସ୍, ସେ ବିଚାରେ ତୁମିମଃନ୍କେ ହେଁ ବିଚାର୍ କଃରା ଅୟ୍ଦ୍; ଆରେକ୍ ଜୁୟ୍ ନାହେଁ ନାହି ଦିଆସ୍, ସେ ନାହେଁ ତୁମିମଃନ୍କେ ହେଁ ନାହି ଦିଆ ଅୟ୍ଦ୍ । 3ଆର୍ କାୟ୍ତାକ୍ ତୁମାର୍ ବାୟ୍ର୍ ଆକାୟ୍ ରିଲା ସାନ୍ କୁଟା ଦଃକୁଲାସ୍, ମଃତର୍ ତୁମାର୍ ନିଜାର୍ ଆକାୟ୍ ଜୁୟ୍ ବଃଡ୍ ଆକିକୁଟା ଆଚେ, ସେରି କାୟ୍ତାକ୍ ବାବି ନଃଦେକୁଲାସ୍ ? 4ବଃଲେକ୍ ତୁମି କଃନ୍କଃରି ନିଜାର୍ ବାୟ୍କ୍ କଃଉଁ ହାରାସ୍, ‘ଆଉ ତର୍ ଆକାୟ୍ ରିଲା ସାନ୍ ଆକିକୁଟା ବାର୍କଃରି ଦଃୟ୍ନ୍ଦ୍,’ ଆର୍ ଦଃକା, ତୁମାର୍ ଆକାୟ୍ ବଃଡ୍ ଆକିକୁଟା ଆଚେ ! 5ରେ, ହେଟ୍କପଟ୍ୟାମଃନ୍, ଆଗ୍ତୁ ନିଜାର୍ ଆକାୟ୍ ରିଲା ବଃଡ୍ ଆକିକୁଟା ବାର୍ କଃରି ହଃକାଉଆ, ତାର୍ହଃଚେ ନିଜାର୍ ବାୟ୍ର୍ ଆକାୟ୍ ରିଲା ସାନ୍ ଆକିକୁଟା ବାର୍ କଃରୁକ୍ ନିକକଃରି ଦଃକୁ ହାର୍ସି ।”
6“ଜାୟ୍ରି ପବିତ୍ର ସେରି କୁକୁର୍ମଃନ୍କେ ଦିଆସ୍ ନାୟ୍, କଃନ୍ଅୟ୍ଲେକ୍ ସେମଃନ୍ ଲେଉଟିକଃରି ତୁମିକେ ଚାବ୍ତି । କି ତୁମାର୍ ମୁକ୍ତା ଗୁସ୍ରାମଃନାର୍ ମୁଏଁ ହଃକାଉଆ ନାୟ୍, କଃନ୍ଅୟ୍ଲେକ୍ ସେମଃନ୍ ସେ ସଃବୁ ସେମଃନାର୍ ହାଦେ ରଃମ୍ନ୍ଦି ହଃକାଉତି ।”
ମାଗା, ଲଳା, କଃହାଟେ ମାରା
7“ମାଗା, ତଃବେ ତୁମିମଃନ୍କେ ଦିଆ ଅୟ୍ଦ୍; ଲଳା, ତଃବେ ତୁମିମଃନ୍ ମିଳାଉଆସ୍; କଃହାଟେ ମାରା, ତଃବେ ତୁମାର୍ ଗିନେ କଃହାଟ୍ ଉଗାଳା ଅୟ୍ଦ୍ । 8ବଃଲେକ୍, ଜୁୟ୍ ଲକ୍ ମାଗେଦ୍, ସେ ହାୟ୍ଦ୍; ଜେ ଲଳେଦ୍, ସେ ମିଳାୟ୍ଦ୍; ଆର୍ ଜେ କଃହାଟେ ମାରେଦ୍, ତାର୍ ଗିନେ କଃହାଟ୍ ଉଗାଳି ଦିଆ ଅୟ୍ଦ୍ । 9ଆର୍ ତୁମାର୍ ବିତ୍ରେ ଇବାନ୍ୟା କୁୟ୍ ଉବା ଆଚେ, ଜେ ଅଃହ୍ଣାର୍ ହୟ୍ସି ରୁଟି ମାଗ୍ଲେକ୍ ତାକ୍ ଟେଳା ଦଃୟଃଦ୍ ? 10ଆରେକ୍ ମାଚ୍ ମାଗ୍ଲେକ୍ ତୁମି ତାକ୍ ସାହ୍ ଦଃୟ୍ଦ୍ ? 11ତୁମିମଃନ୍ କଃରାବ୍ ଅୟ୍ଲେକ୍ ହେଁ, ତୁମି ଜଃଡେବଃଳ୍ ଅଃହ୍ଣା ଅଃହ୍ଣାର୍ ହିଲାମଃନ୍କେ ନିକ ନିକ ଦାନ୍ ଦେଉଁ ଜାଣାସ୍, ତଃବେ ତୁମାର୍ ସଃର୍ଗାର୍ ଉବାଦି ତାର୍ ଲଃଗେ ମାଗ୍ତା ଲକ୍ମଃନ୍କେ କଃତେକ୍ ଅଃଦିକ୍ ନିକ ବଃଲ୍ରିମଃନ୍ ନଃଦେୟ୍ ।”
12“ବଃଲେକ୍ ଲକ୍ମଃନ୍ ତୁମାର୍ ସଃଙ୍ଗ୍ ଜଃନ୍କା ବେବାର୍ କଃରତ୍ ବଃଲି ମଃନ୍ କଃରୁଲାସ୍, ତୁମିମଃନ୍ ହେଁ ସେମଃନାର୍ ସଃଙ୍ଗ୍ ସେବାନ୍ୟା ବେବାର୍ କଃରା, କାୟ୍ତାକ୍ବଃଲେକ୍ ଇରି ହଃକା ମସାର୍ ବିଦି ଆର୍ ବାବ୍ବାଦିମଃନାର୍ ଦଃର୍ମ୍ସାସ୍ତର୍ ସିକ୍ୟାର୍ ସଃତ୍ ଅଃର୍ତ୍ ।”
ସାକୁଳ୍ ବାଟ
13“ସାକୁଳ୍ ଦୁଆର୍ ଅୟ୍ ବିତ୍ରେ ହୁରା; କାୟ୍ତାକ୍ବଃଲେକ୍ ନାସ୍ କଃରୁକେ ନେତା ନଃର୍କାର୍ ଦୁଆର୍ ଅଃସାର୍ ଆର୍ ବାଟ ବଃଡ୍, ଆରେକ୍ ସେ ଦୁଆର୍ ଦଃୟ୍ ହୁର୍ତା ଲକ୍ ଗାଦେକ୍ । 14ଆର୍ ଅଃମ୍ବର୍ ଜିବନ୍ ବାଟ୍କେ ନେତା ଦୁଆର୍ ସାକୁଳ୍ ଆର୍ ବାଟ କଃସ୍ଟ୍, ଆରେକ୍ ସେରି ବେଟ୍ ହାଉତା ଲକ୍ ଉଣା ।”
ଗଃଚ୍ ଆର୍ ତାର୍ ହଃଳ୍
15“ବାମାଉତା ମିଚ୍ ବାବ୍ବାଦିମଃନାର୍ ତଃୟ୍ହୁଣି ଜଃଗ୍ରାତ୍ ଅୟ୍ରିଆ; ସେମଃନ୍ ମେଣ୍ଡା ବେସ୍ ଦଃରି ତୁମାର୍ ଚଃମେ ଆସ୍ତି, ମଃତର୍ ସେମଃନ୍ ମଃନ୍ ବିତ୍ରେ ଗଟେକ୍ ଗଟେକ୍ ଗଃଦବାଗ୍ ହର୍ । 16ସେମଃନାର୍ କାମ୍ ଦଃକି ତୁମି ସେମଃନ୍କେ ଚିନୁ ହାରାସ୍ । କାଟାବୁଟାୟ୍ ଅଙ୍ଗୁର୍ ଜୁବ୍ଳା ନଃହେଳେ କି କାଟାକଳି ଗଃଚେହୁଣି ଡୁମ୍ବୁର୍ ହଃଳ୍ ନଃହେଳେ । 17ସେବାନ୍ୟା ସଃବୁ ନିକ ଗଃଚେ ନିକ ହଃଳ୍ ହଃଳେଦ୍, ମଃତର୍ କଃରାବ୍ ଗଃଚେ କଃରାବ୍ ହଃଳ୍ ହଃଳେଦ୍ । 18ନିକ ଗଃଚେ କଃରାବ୍ ହଃଳ୍ ନଃହେଳେ, କି କଃରାବ୍ ଗଃଚେ ନିକ ହଃଳ୍ ନଃହେଳେ । 19ଜୁୟ୍ ଗଃଚେ ନିକ ହଃଳ୍ ନଃହେଳେ, ସେ ଗଃଚ୍କେ କାଟି ଜୟେ ହଃକା ଅୟ୍ଦ୍ । 20ବଃଲେକ୍ ସେରଃକମ୍ ବାମାଉତା ବାବ୍ବାଦିମଃନାର୍ କାମ୍ ଦଃକି ସେମଃନ୍କେ ତୁମି ଚିନୁ ହାରାସ୍ ।”
ମୁଁୟ୍ ତୁମିମଃନ୍କେ ନଃଜାଣି
21“ଜୁୟ୍ ଲକ୍ମଃନ୍ ମକ୍ ‘ମାପ୍ରୁ, ମାପ୍ରୁ’ ବଃଲି କଃଉତି, ସେମଃନ୍ ବିତ୍ରେ ସଃବୁଲକ୍ ସଃର୍ଗ୍ ରାଇଜେ ଜଃଉଁ ନଃହାର୍ତି, ମଃତର୍ ଜୁୟ୍ ଲକ୍ମଃନ୍ ମର୍ ସଃର୍ଗାର୍ ଉବାର୍ ଇଚା ହୁରୁଣ୍ କଃର୍ତି, ସେମଃନ୍ ହଃକା ସଃର୍ଗ୍ ରାଇଜେ ଜଃଉଁକେ ହାର୍ତି । 22ସେ ଇସ୍ୱରାର୍ ବିଚାର୍ ଦିନ୍ ଗାଦେକ୍ ଲକ୍ ମକ୍ କଃଉତି, ‘ଏ ମାପ୍ରୁ, ଏ ମାପ୍ରୁ, ଅଃମିମଃନ୍ କାୟ୍ ତର୍ ନାଉଁଏ ଇସ୍ୱରାର୍ ବାବ୍ବାଣି କୟ୍ନଃରିଲୁ ? ଆରେକ୍ ତର୍ ନାଉଁଏ କାୟ୍ ବୁତ୍ମଃନ୍କେ ଚାଡାୟ୍ ନଃରିଲୁ ? ଆର୍ ତର୍ ନାଉଁଏ କାୟ୍ ଅଃମିମଃନ୍ ଗାଦେକ୍ କାବାଅଃଉତା କାମ୍ କଃରି ନଃରିଲୁ ?’ 23ସଃଡେବଃଳ୍ ମୁଁୟ୍ ସେମଃନ୍କେ କୟ୍ନ୍ଦ୍, ‘ମୁଁୟ୍ ତୁମିମଃନ୍କେ ନଃଜାଣି । ଏ ଅଃଦଃର୍ମିମଃନ୍, ମର୍ ଲଃଗେହୁଣି ଦୁର୍ ଅଃଉଆ ।’”
ଗଃର୍ ତିଆର୍ କଃର୍ତା ଦୁୟ୍ ଲକ୍
24“ତଃବେ ଜୁୟ୍ଲକ୍ ମର୍ ଇ ସଃବୁ କଃତା ସୁଣେଦ୍ ଆର୍ ମାନେଦ୍, ସେ ଟେଳା ଉହ୍ରେ ଗଃର୍ ବାନ୍ଦ୍ଲା ବୁଦିଆ ଲକ୍ ହର୍ ଅୟ୍ଦ୍ । 25ବଃର୍ସା ଅୟ୍ଲି, ହୁର୍ ଆୟ୍ଲି, ବାଉବଃତାସ୍ ଆୟ୍ଲି ଆର୍ ସେ ଗଃର୍କେ ଦଃକା ମାର୍ଲି । ମଃତର୍ ସେ ଗଃର୍ ନଃବେସୁଳ୍ଲି, କାୟ୍ତାକ୍ବଃଲେକ୍ ସେରି ଚଃଚ୍ରା ଉହ୍ରେ କୁନାଦି ଅୟ୍ରିଲି ।”
26“ଆର୍ ଜୁୟ୍ଲକ୍ ମର୍ ଇ ସଃବୁ କଃତା ସୁଣି ନଃମାନେ, ସେ ବାଲି ଉହ୍ରେ ଗଃର୍ ବାନ୍ଦ୍ଲା ନିର୍ବୁଦିଆ ଲକ୍ ହର୍ ଅୟ୍ଦ୍ । 27ବଃଡ୍ ବଃର୍ସା ଅୟ୍ଲି, ହୁର୍ ଆୟ୍ଲି, ବାଉବଃତାସ୍ ଆୟ୍ଲି ଆର୍ ସେ ଗଃର୍କେ ଦଃକ୍ୟା ମାର୍ଲି, ଆର୍ ସେ ଗଃର୍ ବାଙ୍ଗି ଅଦ୍ରିଗଃଲି । ଆରେକ୍ ତାର୍ ଦଃସା ବଃଡେ ବୟ୍ଙ୍କାର୍ ଅୟ୍ଲି ।”
ଜିସୁର୍ ଅଃଦିକାର୍
28ଜିସୁ ଇ ସଃବୁ କଃତା କୟ୍ ସଃର୍ଲା ହଃଚେ, ଲକ୍ମଃନ୍ ତାର୍ ସିକ୍ୟା ସୁଣି କାବା ଅୟ୍ଲାୟ୍ । 29କାୟ୍ତାକ୍ବଃଲେକ୍ ସେ ସେମଃନାର୍ ଗୁରୁମଃନାର୍ ହର୍ ସିକ୍ୟା ନଃଦେୟ୍, ଅଃଦିକାର୍ ହାୟ୍ଲା ଲକାର୍ ହର୍ ସେମଃନ୍କେ ସିକ୍ୟା ଦେତିରିଲା ।

Você sabia?
O juízo, o caminho estreito e um alicerce firme
- O registro do evento data o início do Sermão da Montanha em 28 d.C. e sua duração em um dia. Este capítulo termina com as multidões admiradas com o ensino de Jesus, porque ele ensinava como quem tem autoridade, e não como os escribas deles.Fontes: Sermon on the Mount · o próprio texto bíblico
- Jesus adverte que o juízo que alguém pronuncia, e a medida que essa pessoa usa, voltarão sobre ela. Ele descreve alguém que repara no cisco no olho do irmão, mas não percebe a trave no próprio olho, e diz que a trave precisa ser removida primeiro.Fontes: o próprio texto bíblico
- O capítulo chama de essência da Lei e dos Profetas fazer aos outros o que se gostaria que lhe fizessem. Ele contrasta uma porta larga e um caminho espaçoso que leva à destruição, pelo qual muitos entram, com uma porta pequena e um caminho estreito que leva à vida, que poucos encontram, e compara ouvir essas palavras e praticá-las a uma casa construída sobre a rocha, e não sobre a areia.Fontes: o próprio texto bíblico
Notas escritas com auxílio de IA a partir de fontes abertas (Theographic Bible Metadata, CC BY-SA 4.0; Easton’s Bible Dictionary, domínio público) e revisadas antes de publicar.
Créditos e licença desta tradução
ସଃର୍ଗାର୍ ବାଟ୍ ନଃଉଁଆ ନିଅମ୍ The New Testament in the Bodo Parja language of India copyright © 2020 The Word for the World International Language: ବଡ଼ ପରଜା (Bodo Parja) Contributor: The Word for the World International ସଃର୍ଗାର୍ ବାଟ୍ ନଃଉଁଆ ନିଅମ୍ The New Testament in Bodo Parja Language The Word for the World This translation is made available to you under the terms of the Creative Commons Attribution license 4.0. You may share and redistribute this Bible translation or extracts from it in any format, provided that: You include the above copyright and source information. If you make any changes to the text, you must indicate that you did so in a way that makes it clear that the original licensor is not necessarily endorsing your changes. Pictures included with Scriptures and other documents on this site are licensed just for use with those Scriptures and documents. For other uses, please contact the respective copyright owners. Note that in addition to the rules above, revising and adapting God's Word involves a great responsibility to be true to God's Word. See Revelation 22:18-19. 2023-04-06
Fonte: http://ebible.org/bdv/ · eBible.org