Nations Bible

Mateus 6

Godeya꞉ To Nafayo꞉ We · Toque num versículo para ver as referências cruzadas.

Kelego꞉lo꞉ma kalu asuwa꞉fa꞉no꞉ man sio꞉

1Ya꞉su eyo꞉ towo꞉ a꞉la꞉sio꞉. “Gio꞉ dinafa dowa꞉bi. Giliyo꞉ Godeya꞉ siwa꞉l amilo꞉ man digalo꞉ a꞉no꞉ dimida꞉likiyo꞉, kaluka꞉isaleya꞉ siwa꞉l amio꞉ bo꞉ba꞉kiyo꞉ dimida꞉so꞉bo. Giliyo꞉ a꞉la꞉dimidalega, Go꞉l Hebenelo꞉ sab a꞉ma꞉lo꞉ wa꞉l dimia꞉ib a꞉no꞉ sulu ha꞉nab.

2“A꞉la꞉gab ko꞉lo꞉ giliyo꞉ wa꞉feyo꞉ kaluwo꞉ asuwa꞉taki dimiakiyo꞉, kaluka꞉isale nolo꞉ bo꞉ba꞉kiyo꞉ dimida꞉so꞉bo. Kalu nolba꞉yo꞉ e nafa dimidabo꞉lo꞉b a꞉la꞉bo꞉ba꞉kilo꞉ asuwa꞉ta꞉sen o꞉leaumbo꞉ giliyo꞉ dimida꞉so꞉bo. Iliyo꞉ tolo꞉ wida꞉sen ayamio꞉lo꞉, to so꞉go꞉f a꞉namio꞉lo꞉, kaluka꞉isale nolba꞉yo꞉ inin man nafa dimidabo꞉lo꞉b a꞉la꞉ba꞉da꞉sa꞉ga꞉ ene wiyo꞉ wabuluma꞉ki, iliyo꞉ mada ho꞉le sa꞉lakiyo꞉, wa꞉feyo꞉ kaluwo꞉ a꞉na asuwa꞉ta꞉sen. Kalu a꞉la꞉do꞉ dimidab a꞉ma꞉yo꞉, wa꞉lo꞉ inino꞉ o꞉ma diab ko꞉m. 3Giyo꞉ wa꞉feyo꞉ kaluka꞉isaleyo꞉ asuwa꞉takiyo꞉, dagi ililiba꞉lo꞉ dimiab a꞉no꞉ dagi fo꞉fo꞉dolo a꞉no꞉ mo꞉asuluma꞉ki dimida꞉bi. 4A꞉la꞉galega, gilo꞉ dimidab a꞉no꞉ wo꞉no꞉le doma꞉ib. A꞉la꞉ta꞉ga꞉ gilo꞉ wo꞉no꞉lelo꞉ dimidabo꞉, Go꞉l eyo꞉ ba꞉dab ko꞉lo꞉, gemo꞉wo꞉ wa꞉lo꞉ mada dimia꞉ib.

Godemo꞉lo꞉ to sa꞉ma꞉no꞉ man wido꞉

5“Kalu nolba꞉lo꞉, iyo꞉ nafalo꞉b a꞉la꞉bo꞉ba꞉kilo꞉ dulugu sa꞉lan aumbo꞉, giliyo꞉ dulugu sa꞉la꞉so꞉bo. Iliyo꞉ tolo꞉ wida꞉sen ayamio꞉lo꞉, to so꞉go꞉f a꞉namio꞉lo꞉ kagayaki, kaluka꞉isale nolba꞉yo꞉ inino꞉ nafa dimidabo꞉lo꞉b a꞉la꞉bo꞉ba꞉ki, Godemo꞉ dulugu sa꞉la꞉sen. Giliyo꞉ Godemo꞉ dulugu sa꞉lakiyo꞉, ililo꞉ dulugu sa꞉lan aumbo꞉ dimida꞉so꞉bo. Niyo꞉ towo꞉ hendele so꞉lo꞉l. Kalu i a꞉no꞉ wa꞉lo꞉ o꞉ma di ko꞉lo꞉lab. 6Ko꞉sega giyo꞉ dulugu sa꞉lakiyo꞉, go꞉no꞉n galala꞉ya tina꞉ga꞉, togo꞉ uludufo꞉liki, Go꞉l wo꞉no꞉lelo꞉ a꞉lab emo꞉ dulugu sa꞉la꞉bi. A꞉la꞉galikiyo꞉ Go꞉l wo꞉no꞉lelo꞉ da꞉labdo꞉ ba꞉dan eyo꞉ gemo꞉wo꞉ wa꞉lo꞉ dimia꞉ib.

7“Giliyo꞉ Godemo꞉ dulugu sa꞉lakiyo꞉, Yu kaluka꞉isalema i a꞉ma꞉lo꞉ towo꞉ madalilo꞉ modo꞉ kudu sa꞉la꞉likilo꞉ sa꞉lan o꞉leaumbo꞉ sa꞉la꞉so꞉bo. Ili asulakiyo꞉, ililo꞉ to modo꞉ ko꞉lo꞉ sa꞉la꞉lab a꞉no꞉ Gode eyo꞉ mada da꞉ba꞉ib a꞉laki ga꞉sen. 8Gio꞉ i o꞉leo꞉ngo꞉wo꞉ dowa꞉so꞉bo. Mo꞉wo꞉ giliyo꞉ o꞉semo꞉ dabu ba꞉ba꞉ o꞉a꞉lab a꞉naka, kelego꞉ gililo꞉ asulab a꞉no꞉ Go꞉la꞉yo꞉ o꞉ma asululi ko꞉lo꞉lab. 9A꞉la꞉fo꞉ko꞉lo꞉ giliyo꞉ towo꞉ a꞉la꞉dulugu sa꞉la꞉bi.

“Do Gode, Hebenelo꞉ a꞉labo꞉ ge,

Gi wiyo꞉ mada malilo꞉le dofo꞉lab ko꞉lo꞉ kaluka꞉isale iliyo꞉ gi wi a꞉no꞉ wabuluma꞉ki ta꞉foma.

10Gi kaluka꞉isalelo꞉ bo꞉fo꞉mela꞉no꞉ ho꞉len a꞉no꞉ fa꞉la꞉doma꞉ki ta꞉foma.

Go꞉no꞉n asulo꞉ ko꞉lo꞉ Hebene amilo꞉ fa꞉la꞉do alifa꞉ o꞉leaumbo꞉,

henfelo꞉ wenamio꞉lo꞉ kaluka꞉isaleyo꞉ gilo꞉ asulab au kudu mena꞉ki ta꞉foma.

11O꞉gdo꞉ nililo꞉ ma꞉no꞉wo꞉ aumbo꞉ dimina꞉ki so꞉lo꞉l.

12Mogago꞉ nolba꞉lo꞉ nimo꞉lo꞉ dimida꞉lab amilo꞉ nililo꞉ ga꞉lila꞉sen o꞉leaumbo꞉,

giyo꞉ mogago꞉ nililo꞉ dimido꞉wo꞉lo꞉ hala꞉sa꞉ga꞉ ga꞉lilema.

13Nio꞉ mogago꞉lo꞉ dimidama꞉no꞉ a꞉namida꞉yo꞉ ha꞉nabena꞉ki, giyo꞉ nio꞉ tili dowa꞉bi.

Mogago꞉lelo꞉ dimida꞉sen Sa꞉da꞉na꞉ eyo꞉ nio꞉ yasa danela꞉ma꞉ib ko꞉lo꞉, giyo꞉ nio꞉ sili alifoma.

Godemo꞉ towo꞉ a꞉la꞉dulugu sa꞉la꞉bi.

14“Gio꞉ kalu noma꞉ gemo꞉lo꞉ mogago꞉ dimido꞉ a꞉no꞉ ga꞉lilalega, Go꞉l Hebenelo꞉ a꞉lab a꞉ma꞉yo꞉lo꞉ gi mogago꞉ a꞉no꞉ halaki ga꞉lila꞉ma꞉ib. 15Ko꞉sega gio꞉ kalu noma꞉ gemo꞉lo꞉ mogago꞉ dimido꞉ a꞉no꞉ mo꞉ga꞉lilalega, Go꞉l eyo꞉ gili mogago꞉wo꞉lo꞉ mo꞉ga꞉lila꞉ma꞉ib.

Ma꞉no꞉ mo꞉nakilo꞉ Godemo꞉lo꞉ to sa꞉ma꞉no꞉ mano꞉ wido꞉

16“Godemo꞉ sa꞉ma꞉nikiyo꞉ kalu nolba꞉yo꞉ ma꞉no꞉wo꞉ ele dia꞉tab a꞉namio꞉, kaluka꞉isale nolba꞉yo꞉ iyo꞉ ba꞉da꞉sa꞉ga꞉ ini wiyo꞉ wabuluma꞉ki, wo꞉lokan ililo꞉wo꞉ heselia꞉ga꞉ dowa꞉sen. Giliyo꞉ a꞉la꞉bo꞉ ga꞉so꞉bo. Niyo꞉ gimo꞉wo꞉ hendele so꞉lo꞉l. Kalu a꞉la꞉do꞉ gab a꞉ma꞉yo꞉ wa꞉lo꞉ tambo o꞉ma diab ko꞉m. 17Ko꞉sega gio꞉ ma꞉no꞉ ma꞉no꞉ elelo꞉ dia꞉tab a꞉namio꞉, kaluka꞉isale iliyo꞉ gio꞉ mo꞉bulubo꞉ba꞉kiyo꞉, wo꞉lokano꞉ hala꞉sa꞉ga꞉, misa꞉ fo꞉no꞉ suda꞉bi. 18Gilo꞉ dimido꞉wo꞉ kalu nolo꞉ mo꞉asuluma꞉kiyo꞉ a꞉la꞉dimida꞉bi. Ko꞉sega Go꞉l wo꞉no꞉lelo꞉ elen eyo꞉ ba꞉ba꞉ib. A꞉la꞉ta꞉ga꞉ Go꞉l wo꞉no꞉lelo꞉ da꞉labdo꞉ ba꞉dan eyo꞉ ba꞉da꞉sa꞉ga꞉yo꞉, gemo꞉wo꞉ wa꞉lo꞉ mada dimia꞉ib.

Kelego꞉ nafaleyo꞉ Hebene kegene dia꞉foma

19“Henfelo꞉ wenamio꞉ kelego꞉ nafa gililo꞉wo꞉ eyayaki, a꞉la꞉ta꞉ga꞉ waliba꞉ mogaila꞉sen. A꞉la꞉ta꞉ga꞉ afalo꞉ dian kaluwa꞉yo꞉ ayo꞉ bidila꞉sa꞉ga꞉, kelego꞉ a꞉no꞉ afale dia꞉sen. A꞉la꞉fo꞉ko꞉lo꞉ kelego꞉ nafaleyo꞉ henfelo꞉ wenamio꞉ kegene dila꞉so꞉bo. 20Ko꞉sega giliyo꞉ kelego꞉ nafayo꞉ ho꞉leno꞉ tambo Hebene doba꞉da꞉ kegene dila꞉ melea. Mo꞉wo꞉ Hebene hen a꞉namio꞉ kelego꞉ nafayo꞉ mo꞉eyayaki, a꞉la꞉ta꞉ga꞉ waliba꞉yo꞉ mo꞉mogaila꞉sen. A꞉la꞉ta꞉ga꞉ afa dian kaluwa꞉yo꞉ mo꞉bidilan ko꞉lo꞉ afalo꞉ mo꞉dia꞉sen ko꞉lo꞉lab. 21Gili kelego꞉ nafalelo꞉ da꞉lab a꞉namio꞉, asulo꞉ alan gililo꞉wo꞉lo꞉ a꞉na doma꞉ib.

22“Gi siko, do꞉mo꞉wa꞉ ho꞉len ko꞉lo꞉lab. Si gilo꞉wo꞉ nafa dowalega, gi do꞉mo꞉wo꞉ tambo ho꞉lea꞉fa꞉ib. 23Ko꞉sega si gilo꞉wo꞉ mogago꞉ dowalega, gi do꞉mo꞉wo꞉ tambo sololiab. A꞉la꞉fo꞉ko꞉lo꞉ gi do꞉mo꞉wa꞉ ho꞉len a꞉no꞉ sololi dowalega, sololi wema꞉yo꞉ mada alan doma꞉ib.

24“Nanog dian kalu imili nowo꞉ bo꞉fo꞉lowan kalu a꞉la꞉ya꞉ ha꞉g amio꞉ mo꞉doma꞉ib. A꞉la꞉galega, eyo꞉ bo꞉fo꞉lowan kalu nowo꞉mbo꞉wo꞉ ha꞉fo꞉ disa꞉laki, no o꞉lia꞉yo꞉ mo꞉bema꞉ib. Bo꞉fo꞉lowan kalu nowo꞉ ko꞉lo꞉ kudu ha꞉naki, nowo꞉ gola ba꞉ba꞉ib. O꞉leaumbo꞉ Gode asuluma꞉no꞉ tog o꞉lia꞉ mole alan asuluma꞉no꞉ tog a꞉no꞉lia꞉yo꞉ giliyo꞉ mada mo꞉kudu ha꞉na꞉no꞉ dowo꞉ ko꞉lo꞉lab.

Henfelo꞉ kelego꞉wo꞉ asula꞉so꞉bo

25“Gio꞉ tog a꞉la꞉yo꞉ mo꞉kudu ha꞉na꞉ib ko꞉lo꞉, go꞉no꞉n doma꞉no꞉wo꞉ alano꞉ kele asula꞉so꞉bo. Gio꞉ ma꞉no꞉ o꞉lia꞉ ho꞉n o꞉lia꞉yo꞉ o꞉b ma꞉no꞉wa꞉le a꞉la꞉bo꞉ asula꞉so꞉bo. A꞉la꞉ta꞉ga꞉ do꞉mo꞉ amio꞉ o꞉b ka꞉ma꞉no꞉wa꞉le a꞉la꞉bo꞉ mada kele asula꞉so꞉bo. Mo꞉wo꞉ Mela꞉no꞉ wa꞉la꞉b kelego꞉wo꞉ ma꞉no꞉ na꞉seno꞉ ko꞉mba. A꞉la꞉ta꞉ga꞉ do꞉mo꞉ amilo꞉ so꞉g sa꞉ga꞉lema꞉no꞉wo꞉ wa꞉la꞉b kelego꞉wo꞉ o꞉mba. 26Gio꞉ o꞉ba꞉ iwalulo꞉ dalale sab a꞉no꞉ asuluma! Iliyo꞉ e gelakiyo꞉ mo꞉tili dowan. A꞉la꞉ta꞉ga꞉ iliyo꞉ fowo꞉ tula꞉sa꞉ga꞉yo꞉ ayamio꞉ mo꞉kegene dila꞉sen. Ko꞉sega Go꞉l Hebenelo꞉ a꞉lab a꞉ma꞉yo꞉ imo꞉wo꞉ maiya꞉kiyo꞉ mea꞉sen. A꞉la꞉fo꞉ ko꞉sega Godeya꞉ siwa꞉l amio꞉ o꞉ba꞉yo꞉ kaluka꞉isale gili mada tinio꞉ ko꞉lo꞉lab. 27Gilo꞉ kele asulab a꞉ma꞉yo꞉, gi mela꞉no꞉ a꞉namio꞉ ofa꞉si imilig nowo꞉ gigili dia꞉fa꞉iba꞉le? 28Giliyo꞉ so꞉go꞉ o꞉b ka꞉ma꞉no꞉wa꞉le a꞉la꞉likilo꞉ kele asulait ko mo꞉wo꞉ ha꞉? Gio꞉ mamo fa꞉la꞉dowa꞉lab a꞉no꞉ asuluma! Iyo꞉ nanogo꞉ mo꞉dian, a꞉la꞉ta꞉ga꞉ ene helebeso꞉g ka꞉ma꞉no꞉wo꞉lo꞉ mo꞉dubia꞉sen. 29Tamin amio꞉ misa꞉ kalu alan Solomon e ego꞉le dowaki, helebeso꞉go꞉ nafale momada꞉sen. Ko꞉sega mamo momado꞉ nafale a꞉ma꞉yo꞉, Solomona꞉lo꞉ momado꞉ a꞉no꞉ mada tininila꞉. 30Mamo a꞉no꞉ ho꞉leno꞉ abolda꞉su dota꞉ga꞉ onaliab amio꞉, deya sandifa꞉ib. Ko꞉sega Gode eyo꞉ mamo a꞉no꞉ momade alitaki tili dowa꞉sen. A꞉la꞉fo꞉ko꞉lo꞉ Gode eyo꞉ gio꞉lo꞉ dinafa momade alitaki tili dofo꞉mela꞉ib. Tilidabu gililo꞉wo꞉ mada ha꞉lu ko꞉lo꞉ a꞉lab. 31A꞉la꞉fo꞉ko꞉lo꞉ giliyo꞉ we aumbo꞉ kele asula꞉so꞉bo. ‘Nio꞉ ma꞉n o꞉lia꞉ ho꞉n o꞉lia꞉yo꞉ o꞉ba dia꞉sa꞉ga꞉ ma꞉no꞉wa꞉le? A꞉la꞉ta꞉ga꞉ nio꞉ so꞉go꞉ waga dia꞉ga꞉ ka꞉ma꞉no꞉wa꞉le?’ A꞉la꞉bo꞉ kele asula꞉so꞉bo. 32Ha꞉la꞉ kaluka꞉isale iliyo꞉ kelego꞉ a꞉no꞉ ko꞉lo꞉ dia꞉no꞉ a꞉la꞉likiyo꞉ kele sab. Ko꞉sega kelego꞉ gililo꞉ kele dowab a꞉no꞉ Go꞉l Hebenelo꞉ a꞉lab a꞉ma꞉yo꞉ o꞉ma asululi ko꞉lo꞉lab. 33Ko꞉sega kelego꞉wo꞉ giliyo꞉ mada dimo꞉losa꞉ a꞉la꞉do꞉ mada asula꞉ma꞉no꞉ wa꞉la꞉bo꞉ we. Giliyo꞉ Godeya꞉ enedo꞉ bo꞉fo꞉lab a꞉ma꞉ ha꞉ga dowaki, ene man digalo꞉le a꞉no꞉ ko꞉lo꞉ asulaki kudu hamana. A꞉la꞉dimidalikiyo꞉ ma꞉no꞉ ma꞉no꞉ o꞉lia꞉ so꞉g ka꞉ma꞉no꞉ o꞉lia꞉yo꞉lo꞉ gimo꞉wo꞉ mada dimia꞉ib.

34“A꞉la꞉fo꞉ko꞉lo꞉ alilo꞉ dia꞉no꞉ a꞉no꞉ kele asula꞉so꞉bo. Alilo꞉ a꞉no꞉, ali a꞉ma꞉no꞉ doma꞉ib. Hida꞉yo꞉ ho꞉len imilig a꞉ma꞉lo꞉wo꞉, ho꞉len a꞉ma꞉no꞉ ka doma꞉ib.”

Ilustração artística — interpretação, não registro histórico.

Você sabia?

Justiça em segredo e confiança

  • Este capítulo faz parte do Sermão do Monte. Um registro de eventos data esse sermão de 28 d.C. e registra que durou um único dia.Fontes: Sermon on the Mount · o próprio texto bíblico
  • Jesus diz para não tocar trombeta nas sinagogas e nas ruas ao dar aos necessitados, como fazem os hipócritas a fim de serem honrados. Ele também adverte contra orar nas esquinas para ser visto e contra jejuar com o rosto desfigurado; em vez disso, descreve orar num quarto interior com a porta fechada e jejuar com a cabeça ungida e o rosto lavado.Fontes: o próprio texto bíblico
  • Jesus diz que nem Salomão, em toda a sua glória, se adornou como um dos lírios do campo. Um verbete de dicionário explica que seu nome hebraico, Shelomoh, significa “Pacífico”, que ele era filho de Davi com Bate-Seba e que Natã o chamou de Jedidias, “amado do Senhor”; seu reinado está registrado em 1 Reis 1–11 e 2 Crônicas 1–9.Fontes: o próprio texto bíblico · Solomon

Notas escritas com auxílio de IA a partir de fontes abertas (Theographic Bible Metadata, CC BY-SA 4.0; Easton’s Bible Dictionary, domínio público) e revisadas antes de publicar.

Créditos e licença desta tradução
Godeya꞉ To Nafayo꞉ We
The New Testament, Genesis, and Ruth in the Kaluli language of Papua New Guinea
Sampela hap Buk Baibel long tokples Kaluli long Niugini
copyright © 1998-2022 Wycliffe Bible Translators, Inc.
Language: Kaluli
Translation by: Wycliffe Bible Translators
This translation is made available to you under the terms of the
Creative Commons Attribution-Noncommercial-No Derivatives license 4.0.
You may share and redistribute this Bible translation or extracts from it in any format, provided that:
You include the above copyright and source information.
You do not sell this work for a profit.
You do not change any of the words or punctuation of the Scriptures.
Pictures included with Scriptures and other documents on this site are licensed just for use with those Scriptures and documents.
For other uses, please contact the respective copyright owners.
2025-03-12

Fonte: http://png.bible/bco/ · eBible.org

Fale com a gente

Conte de onde você lê, como a Bíblia tem te ajudado ou o que podemos melhorar. Lemos todas as mensagens.