Génesis 43
Gapapaiwa New Testament · Toca un versículo para ver sus referencias cruzadas.
Josepa varevaresina ivovirame ku Egypt.
1Keinan dobuna kamonai na patana da gomara irakata ma ibero kirakai. 2Vaghina ma Jeikap ina rakaraka yavata kii vavai Egypt dobunai ikavari igheghae na ikam yavui. Tuna kubiine Jeikap natunatuna ivonesi bo, “Kovovira da vavai gisina voghamana kubiita kona gimara.”
3Ma Juda ivona bo, “Tomowina ina sisiya bagibagina iverekai da ivona bo, ‘Kara maghighiku ke kona kitai da timi kikei kona rutinapiyei na vaghina.’” 4Tuna kubiine kuni vaghinei da tiki kikei yavata kana nae na vaghina, kanoru da kata vavai kana gimara kubiim. 5Ma mikeda ke kuni vaghinei na tokai ke kanoru, iyamna tomowina ivonekai da tikii kikei ke kana rutinaneyei na ke ina tavire da ina kitikai.
6Jeikap ivona bo, “Avi kubiine tomowina kovonei da timi kikei sago emakamakai? Weni nakanani koberai na taku nuwapoya kovereku.”
7Ma ivonapotei bo, “Tomowina ivi taravirevire bogiikai da tokai ma akii rakaraka ita akova bubuni. Ivona bo, ‘Ami mamai patana da emakamakai bo? Ma timi kikei sago emakamakai bo kegha?’ Ma ikikava katakovi da ita vonekai da tiki kikei kata rutini da yavata katoru. Ma ina vitarakiiyana kubiine na nota yagharinai kavona potei.”
8Juda ina mamai kurina ivona bo, “Tomowa kikei kevonatawei da taku yavata wekarakava kana nae da tam ma tokai natunatukai yavata yawayawata tamakai ma ke tarabobo. 9Ma taku averevere meyeku tuna ina yawasa kubiine. Mikeda ke ana viiya ana vovirei kurim na wavuna na taku ana kavara nonowei. 10Madegha enenae. Mikeda Benjamin ke kuta tarapapari, ma vivaghina kutaverekai na tokai namada mara ruwa kata nae ku Egypt ma kata vovira.”
11Vaghina ma i mamai Jeikap ivonesi bo, “Mikeda ami kayowana da nakanani taberai na vaghina. Ma ami puyo kokavaraneyei da tomowina kona verei. Okowa ghabughabuna, manigewa, gegura, vavai kii vovoghabughabu, mapa bogii ma bogiiyai, weni dobunai aviyavisina imatiyai tayamoyamoni na kiikiimatanisi kouwana ami ku kutu ma kona nae da kona puyoi. 12Ma nani manena ami ku kutu iuwana na kokavari da kona vere meyesi. Mikeda wawaya sago bera wapawapa iberai da iuwaname. Ma bade ku tepana mane koviiya da kata vavai kona gimari. 13Konae, timi kikei korutini ma yaghiyaghinai konoru nani tomowina kurina. 14Ma ‘God Rewapana Kirakiina’ kurina ainowi da ina berai da tomowina ini kamyuyuwemi ma ini vaghinei da varesimi sago ma Benjamin yavata kona vovirame. Ma ke ini vaghinei ma natunatuku ivi ruwa ani wapisi na vaghina, nuwapoya kamonai ana makai.”
15Vaghina ma Jeikap natunatuna nani puyosi iyuna ma mane ku tepana ikavari ma Benjamin yavata ivomiiri da inae ku Egypt da Josepa maghinonai imiiri. 16Ikitisi da Benjamin yavata na ina bigabiga wawayina ivonei bo, “Weni tomotomowisi kerutinisi kona nae aku ku numa. Siya sago kekiivunui ma kevokuyai. Ti na taku yavata madegha punai kana kam.”
17Vaghina ma ikikava ivonavonei na bigabiga wawayina iberai, irutinisi da inae Josepa ina ku numa. 18Ma varevaresina na ere yabuyabumanisi inenae, inotanotai bo, “Kunona tapisi tagimara ma ita mane na wawaya sago iuwaname ita ku kutu, nani berana kubiine iviinita wike ina ku numa tapisi. Ina kayowana da ina ravita ma ina berita da ti sleiv ma bade ita donki ina yuna da rapenai.”
19Varevaresina inekiibau da Josepa ina numa matuketinai na ivi sisiya bigabiga wawayina kurina. 20Ivona bo, “Akii bada, kevi yanekai. Kunona kapisi wike da vavai kata gimara, 21ma kavovovira da keta borinai kena kubiine ma kavopanani da peyarikai akii kutu kamosiyai na akii mane ikikava kagimagimara na peyarina nani. Tuna kubiine manesi na peyarina kaviini kavovira. 22Ma wekarakava na mane ku tepana kakavari da vavai kana gimara. Ma ke katakovi da iyai akii mane iuwaname akii ku kutu kamosi.” Ivona bo, “Ke katakovi da iyai akii mane iuwaname akii ku kutu kamosi.”|alt="Joseph’s Brother Finds Money In Sack" src="CO00737c.tif" size="col" loc="Gen 43:22" copy="© DCC" ref="Gen 43:22"
23Bigabiga wawayina ivona bo, “Vaghina, ke kona yabumana. Agunai ami God nani manena iuwana ami ku kutu, tuna God na ami mamai evovokavakavari. Ma akovi da rorova vavai kogimari na kovi mayei. Ami mane na taku mani aviiya.” Vaghina ma Simiyon ivotawei ma irutini ipisi kurisi.
24Ivi sisiya ikovi na bigabiga wawayina irutinaruwesi Josepa ina ku numa kamona ma okowa iveresi da kaesi ita kowa ma bade i donki kii vavai iveresi da iti kanisi. 25Ma tomotomowisi namada iakovi da madegha punai na nani numanai ita kam, tuna kubiine i puyo ivovunagha da Josepa ita nekiibau na ita puyoi.
26Josepa inekiibau na i puyo iyuna da inae ku maghinona da irunoma ma ipuyoi. 27Ma ivi tarakiiyanesi da ti na vaghina bo kegha, ma muriyai na ivona bo, “Ami mamai imagura kirakai na kovi sisiyei avi yanei, tuna ikikava? Tuna yawayawasina bo?” Josepa ina sisiya na vidamadamana wawayina ivi damani varevaresina kurisi.
28Ma ivonapotei bo, “Akii mamai na am bigabiga. Ma tuna na vaghina ma yawayawana.” Vaghina ma varevaresina irunomei ivi matakira da ivopepetei.
29Josepa ikitavirevire da Benjamin ikitai, tuna na tina kikei vaghata ma ivona bo, “Timi kikei kovivi sisiyei na vaghina weni bo?” Ma ivona bo, “Natuku, God ini biibiinim.” 30Tina kikei ikitai na nuwapoya ivowa kirakiiyei da yaghiyaghinai ikiibau ina ku tupayaragha irui da nani dobunai itou.
31Josepa itou ikovi na maghighina ikowai ma ikiibau da ivi potepote meyei ma sisiya iterei da ina bigabiga vavai ita riyei.
32Vavai ivorereghi da Josepa ina kina kava kana vavai na bogiiyai ma varevaresina ti bogiiyai ma Egypt damsi yavata ikamkam na bade bogiiyai. Nakanani irereghi, iyamna Egypt damsi inota meyesi da ti na ighe kirakai tuna kubiine na ke kovokovoghina da Hibru damsi yavata ita kam patapata. 33Ma bade Josepa varevaresina ivorereghisi da i tupuwa nununai imakai, iyaroko vaghina da inae ku murimuri vaghina. Nakanani ikitakitai na ivi deye kirakiiyei. 34Ma kii vavai na bigabiga inae da Josepa ina kema tepanai iyuyuna ma ivereveresi da ikamkam. Ma Benjamin na ivi kam kirakiiyei ke varevaresina viya nakanani. Ma vaghina Josepa yavata nuwabiibiiyai ikam ma iuma patapata.

¿Sabías que…?
Los hermanos regresan con Benjamín
- Cuando se acabó el grano traído de Egipto, Judá, el cuarto hijo de Jacob con Lea, habló por los hermanos y se comprometió a cargar con la culpa toda su vida si Benjamín no regresaba. Antes había intercedido para que se perdonara la vida de José, y tomó la delantera en los asuntos de la familia.Fuentes: Judah (patriarch) · el propio texto bíblico
- Benjamín era el hijo menor de Raquel, nacido en Efrata, en el camino entre Betel y Belén; su madre murió al darlo a luz. Con su último aliento lo llamó Ben-oni, “hijo de mi dolor”, nombre que su padre cambió por Benjamín. Él y José eran los dos hijos de Raquel, y al ver al “hijo de su propia madre”, José se fue a un cuarto aparte a llorar.Fuentes: Benjamin (patriarch) · Joseph (son of Jacob) · el propio texto bíblico
- En la comida sirvieron a José, a sus hermanos y a los egipcios por separado, porque los egipcios no comían con los hebreos; el relato dice que eso les era detestable. El mayordomo de la casa también sacó a Simeón, a quien José había retenido en Egipto como rehén.Fuentes: el propio texto bíblico · Simeon
Notas escritas con ayuda de IA a partir de fuentes abiertas (Theographic Bible Metadata, CC BY-SA 4.0; Easton’s Bible Dictionary, dominio público) y revisadas antes de publicarse.
Lugares de este capítulo
Solo aparecen lugares identificados con alta confianza (90 % o más según las fuentes académicas reunidas por OpenBible). Mapa de la época: DARE (Digital Atlas of the Roman Empire), CC BY 4.0; mapa actual: © colaboradores de OpenStreetMap; lugares: OpenBible.info (CC BY 4.0).
Créditos y licencia de esta traducción
Gapapaiwa New Testament The New Testament in the Gapapaiwa Language of Papua New Guinea Nupela Testamen long tokples Gapapaiwa long Niugini copyright © 2009-2018 Wycliffe Bible Translators, Inc. Language: Gapapaiwa Translation by: Wycliffe Bible Translators This translation is made available to you under the terms of the Creative Commons Attribution-No Derivatives license 4.0. You may share and redistribute this Bible translation or extracts from it in any format, provided that: You include the above copyright and source information. You do not make any derivative works that change any of the actual words or punctuation of the Scriptures. Pictures included with Scriptures and other documents on this site are licensed just for use with those Scriptures and documents. For other uses, please contact the respective copyright owners. 2022-11-07
Fuente: http://png.bible/pwg/ · eBible.org