Nations Bible

Mateo 5

Alyawarr Bible · Toca un versículo para ver sus referencias cruzadas.

Akngeyel renh-rnem arntarnt-areyel

1Jesus-el akngerrarl arek-penh, ra apwert irrwerl-warl alhek kwertengerl ikwerenh-rnem-akert. 2Ranem renh-rnem akalty-anthek.

3“Rernemarl ikwer-warl angkepirretyek arrkernelheyel, Akngeyel renh-rnem arntarnt-arem. Rernem Akngey-kenh-rnem ingkerrenh anem.

4Rernemarl amperrngirreyel, Akngeyel renh-rnem arntarnt-arem, arternpilemel.

5Rernem iterl-arelheyel rernemarl ahern-areny-rnem arwa aneyel, rernem ahern-areny ingkerrenhek atyetyart aneyenh.

6Akngeyel ingwer-rnem arntarnt-arem arrpemarl, rernemarl ikwer arraty-angkwarr awelheyel, arratyirretyek ikwerenh-angkwarr. Akngeyel ikwer-rnem iwerr mpwarem, itnweng mwerr-angker anthemel.

7Ingwer-rnem mwerrant-arey arntarnt-arerreyel, Akngeyel renh-rnem arntarnt-areyel ingkerrenh-anteyarl arrpemarl.

8Arraty-angkwarr aneyel-rnem, Akngey ikwer-rnem inkwerelhem.

9Aylperrepwenty atyetyart ilkwernem aheketyarl arrkngert angkeyel-rnem, Akngeyel renh-rnem alerey antweyel.

10Rernem arraty-angkwarr alhetyek arrkernelheyel. Ingwer-rnemel renh-rnem irrwerneyelarl, Akngeyel renh-rnem arntarnt-arem arrpemarl.

11Arrantherr atyeng-angkwarr alhetyek arrkernelheyel-rnem, ingwer-rnemel arrenhantherr irrwerneyelarl, Akngeyel arrenhantherr arntarnt-areyel arrpemarl. 12Irrkngerney anaynta! Akngeyel ngenh atnyen-aynteman, apmer aknganenty-itwek. Awank-akerrarl ingwerel-rnem Akngey-kenh angkakert-rnem irrwernek-apeny, aleyarl aynteyel arrpem.” |src="cn01700b.tif" size="col" ref="Matthew 5:12"

Angka thalt-akert, angka lyenenty-akert

13“Aker-warl thalt arrernem. Thalt-penh nthakenh apmwirrey-angenh, intengirrey-angenh, arleng-alenty mwerr ayntem. Thalt-weny aker anamerl intengirrem, ikweweny. Alakenh-anyem Akngey-kenh angka aynteyel. Akngey-kenh angkekety amentirrenty, rap aleth-antey apmwirreman, Akngey-kenh-angkwarr apentey-angenh. Ikwer-angkwarr akaltyirrenty, rernem arleng-alenty mwerr aneman.

14Lyenentyel arrtyernem-apeny, iwerr aketh arem. Ahern-areny ingkerrenhel arrenhantherr aketh-antey arem arrpemarl, nthenh-angkwarr alheman. Warl-rnem apwert irrwerl-itwek artelhenharl. Ingwer-rnemel anaynt arem arleng-they. Ingwer-rnemel arrenhantherr anaynt arem arrpemarl, rernem arraty-angkwarr apenteyelan. 15Lherrm ampenty, nthakenh ntwa tyampet-warl akwerney-angenh. Renh akethek-anem arrernetyek irrwerl-warl, ingkerrenhel anaynt aretyek. 16Arrantherr arraty-angkwarr apententy, ingwer-rnemel arrenhantherr aketh arem arrpemarl, rernem Akngey-kenh-angkwarrant apentem arrpemarl, ikwer inkwerelhemel.”

Moses-kenh angkakert

17“Angka Moses-kenh aynteyel, angka arrwekeleny angkakert-rnemel pip-warl ingkwernek aynteyel arrpemarl. Atyeng arrantherr iterreyel, ayeng angka ingwer-akert apetyentyek-athen, angka Moses-kenh arrwekelenyek iylpelirrentyek-athen. Angka nthakenh iparelhey-angenh. Ayengan apetyek atha Akngey-kenh angka irrkaty renhey-antey arrekantherr iletyek, angka Akngey-kenh arlperrtyiletyek, ywerreyek-atwety. 18Arraty innga atha arrenhantherr ileyel. Angka Akngey-kenh ywerrey-angenh, ahern-then alker-then ywerrey-alenty. 19Angka Moses-kenh arrwekeleny-kety amentirrenty, ingwer-rnem apmwel-aretharl akalty-anthenty, arrantherr apmwelhileyel Akngey-kenh-angkwarr. Angka Akngey-kenh arraty apententy, ingwer-rnem arraty akalty-anthenty, arrantherr Akngey-angkwarr mwerrarl aneyenh. 20Pharisee-kenh-rnem, artwa ilkwa Moses-kenh-rnem rernem apmwangkwarr apenteyel. Arrantherr arraty-angkwarr apenterl-ayntetyek. Arrangkwelan, angka Pharisee-kenh Moses-kenh apententy, arrantherr Akngey-kenh apmer-warl aylpey-angenh.”

Ahel iltenty-akert

21“Moses-kenh angka arrwekeleny angka alakenh ayntenh, ‘Ra ingwer ipmek atwenty, renh angkep atweyenh arrpemarl.’ 22Athan arrenhantherr ileyel, ‘Ingwerentyel apek iltenty, arlta ingkernel Akngeyel renh ayerneyenh arrpemarl. Arrantherr ingwer-rnem apmwa antwenty, rwa aknganenty arrwekel ikwer mpwelheyel arlta ingkernel.’

23Ngethen ingwerenty-then ahel mpwelanth ilterrekarl-penh, nga ikwer-warl alhetyek-tangkwel, sorry antwelhetyek, tyaty-warl aylpey-angenh, Akngey renh tyenkerr anthey-alenty. Ahenp-antey alhey-angenh. Ikwer-penh-anem ntwa Akngey renh tyenkerr anthey-alpem-anem, mwerrant-atherr anetyek. Alakenh-anyem Akngey-angkwarran mwerrant-arey anetyek.

25Arrkent arwa ilterrey-angenh. Angketangkwel arratyilerrey mwerr-angkwarr, ra ngenh court-warl akngekerr, court-arenyel ngenh tyayl-warl akwernekerr. 26Fine ilkwa ntwa payemeley-angenh, nthakenh nga tyerrelhey-angenh.”

Anew inetyek

27“Akngey-kenh angka alakenh aynteyel: ‘Ingwer-kenh anewikw nthakenh ikngwey-angenh.’ 28Athan arrenhantherr arraty ileyel, angka awerr innga. Nga arelh ingwerek ahenty anenty ikngwetyek-arrpantey, ngap apmwangkwarr iterreyelan. 29Ntwa apek apmwangkwarr mpwareyel anngel. Ntwa apek annga atherr-akert apmwangkwarr mpwareyel-kety, mwerr ntwa annga anyent tyerrelhemel iwetyek, ngap Akngey-kenh apmer-warl aylpeman, annga anyent-akert. 30Ntwa apek apmwangkwarr mpwareyel itepel. Ntwa apek itep atherr-akert apmwangkwarr mpwareyel-kety, mwerr ntwa itep anyent akelhem iwemer, mwerr-angkwarr Akngey-kenh apmer-warl aylpetyek.”

Ratherr iwerretyek

31“Angka arrwekeleny alakenh aynteyel: ‘Mwerr arelh ikwerenh iwem. Artwa pip-warl itna inkwernelhemel, arelh ikwerenh pip renh anthemel, arelh ra pip renh aremel, artwa renh iwey-alentyan.’ 32Athan arrenhantherr arraty ileyel, angka atyenh awerr. Arelh ra artwa ingwer-angkwarr antelhenty, kel alakenh mwerr iwemarl. Arrangkwarl, arelh ngkwenh ntwa iwenty apmwel-areth, Akngey-angkwarr apmwa aynteyel.”

Ingkart itnewemel irrtywerremel angkey-angenh

33“Arrwekeleny-kenh aynteyel arrpemarl, ‘Ingkart itnewemel irrtywerremel ilelhey-angenh, Ingkartel arem.’ Arraty ntwa angkayntetyek. 34Angka atyenhan awerr, atharl arrenhantherr ileyel. Alkenh itnewey-angenh, irrtywerremel ilelhey-angenh. 35Ahern itnewey-angenh arrpemarl, ikwerenh arrpemarl. Jerusalem itnewey-angenh arrpemarl, apmer ilkwa atyetyart impen ikwerenh arrpemarl. 36Irrtywerremel ilelhey-angenh, arratyant nga ilelhetyek. 37Yaw apek, arrangkw apek, alakenh arraty innga nga ilelhetyek. Ingwer-angkwarr nga ilelhenty, arrenty-kenh-angkwarrarl.”

Angkep atwey-angenh

38“Angka arrwekeleny aynteyel: ‘Ingwerentyel annga atwenty, ntwa renh annga angkep atweynetyek arrpemarl. Ingwerel ngenh arntek renh atwenty, renh arntek atwem arrpemarl.’ 39Ayengan arrekantherr-warl angkem, ngenh apek arreyl anyent-ampeny atwenty, renh angkep atwey-angenh, aleth-antey atwerrerl-anekerr. Nga menty anthelhetyek ra ngenh arreyl ingwer-angkwarr-anemarl atwenty. 40Ingwerentyel kwet ngkwenhek ayernenty, ntwa kwet renh alhewer anthem arnkwa ingwer-then anthem. Akngey-kenh-angkwarr alakenh aynteyel. 41Ingwerentyel ngenh ilanthenty, ikwer-angkwarr alhetyek, nga ikwer-angkwarr alha anper-antey, ikwer awelhemel. Angath-antey alhey-angenh. 42Ingwerentyel ngenh amernek ayernenty angayakwel, ntwa renh amern anthetyekan. Ampwal ilek-ilek renh anthetyek arrpemarl.”

Ingwer-rnem arntarnt-aretyek, ikwer-rnem amperrngirretyek

43“Ingwer-rnemel ileyel, ikwer-rnem-kenh arntarnt-arayntetyek. Angka atyenhan awerr, atharl arrenhantherr ileyel, alakenh aynteyel, ingkerrenh arntarnt-arayntetyek alethang-rnem-then arntarnt-arayntetyek. Ingwerentyel ngenh irrwernenty, ntwa Akngey ayernetyekan ikwer, renh arntarnt-aretyek. 45Arrantherrap Akngey-kenh-rnem ingkerrenharl aneman, arrantherrap alakenh mwerrant-arey anetyek. Akngeyel ingkeny arrernek ingkerrenhek, apmwernemek-then mwerr-rnemek-then, ilek-ilek ra anthek, kwaty anthek, amern ingkerrenh lyapelhiletyek, aker-then anteril-ayntetyek atherrkeny. 46Ahern-areny-kenh alakenh aynteyel, ngkwenh-rnemant arntarnt-arayntetyek apmelerreny. Apmwamwam man kapmentek iney-angker-rnem rernem arntarnt-arayntetyek arrpemarl, apmelerreny. Akngey-kenh ingwer-angkwarr aynteyel, ingkerrenh arntarnt-arayntetyek. Alakenh Akngeyel anwenhantherr angkep antheman. 47Ingwer-rnem Akngey apentey-angenh-rnem rernem ikwer-rnemekant inkwerelheyel. Alakenh-apeny-weny anayntetyek mwerr-angkwarr. 48Arrantherr mwerr innga anayntetyek, Akngey irrwerl-areny aneyel-apeny.”

Ilustración artística: una interpretación, no un registro histórico.

¿Sabías que…?

El Sermón del Monte

  • Al ver a las multitudes, Jesús subió al monte, se sentó y comenzó a enseñar a sus discípulos. Ese discurso se conoce como el Sermón del Monte. Una nota cronológica sitúa su inicio en el año 28 d. C. y le asigna una duración de un día.Fuentes: el propio texto bíblico · Sermon on the Mount
  • Al enseñar sobre los juramentos, Jesús dice que no se jure por Jerusalén, porque es la ciudad del gran Rey. En el original, el nombre está en dual y significa posesión de paz o fundación de paz. Esa forma probablemente alude a los dos montes sobre los que se construyó la ciudad, Sion y Moriah, o, como algunos suponen, a la ciudad alta y la ciudad baja; también se la llamaba ciudad de Dios y ciudad santa.Fuentes: el propio texto bíblico · Jerusalem

Notas escritas con ayuda de IA a partir de fuentes abiertas (Theographic Bible Metadata, CC BY-SA 4.0; Easton’s Bible Dictionary, dominio público) y revisadas antes de publicarse.

Lugares de este capítulo

  • Jerusalem · 31.777, 35.234 · versículo 35

Solo aparecen lugares identificados con alta confianza (90 % o más según las fuentes académicas reunidas por OpenBible). Mapa de la época: DARE (Digital Atlas of the Roman Empire), CC BY 4.0; mapa actual: © colaboradores de OpenStreetMap; lugares: OpenBible.info (CC BY 4.0).

Créditos y licencia de esta traducción
Alyawarr Bible
Portions of the Holy Bible in the Alyawarr language of Australia
copyright © 2009 Wycliffe Bible Translators
Language: Alyawarr
This translation is made available to you under the terms of the
Creative Commons Attribution-Noncommercial-No Derivatives license 4.0.
You may share and redistribute this Bible translation or extracts from it in any format, provided that:
You include the above copyright and source information.
You do not sell this work for a profit.
You do not change any of the words or punctuation of the Scriptures.
Pictures included with Scriptures and other documents on this site are licensed just for use with those Scriptures and documents.
For other uses, please contact the respective copyright owners.
2023-11-10

Fuente: http://ebible.org/aly/ · eBible.org

Habla con nosotros

Cuéntanos desde dónde lees, cómo te ha ayudado la Biblia o qué podemos mejorar. Leemos todos los mensajes.