Mateo 8
Ri utzilaj tzij re ri kanimajawal Jesucristo · Toca un versículo para ver sus referencias cruzadas.
Ri Jesús kukunaj jun achi kꞌo yabꞌil lepra che
1Ekꞌuchiriꞌ xqaj lo ri Jesús chwa ri juyubꞌ, lik ukꞌiyal winaq xeterej lo chirij. 2Tekꞌuchiriꞌ, xopon jun achi kꞌo ri yabꞌil lepra che, xuxuk ribꞌ chwach ri Jesús y xubꞌiꞌij che:
—Wajawal, we kaꞌaj ko la, josqꞌij la ri nucuerpo che wa yabꞌil —xchaꞌ.
3Ekꞌu ri Jesús xuchap pana rukꞌ ruqꞌabꞌ y jekꞌuwaꞌ xubꞌiꞌij che:
—Kuaj, chuꞌana bꞌa chom riꞌ racuerpo —xchaꞌ. Xew kꞌu xukꞌis ubꞌiꞌxikil waꞌ, na jampatana xsach ri yabꞌil kꞌo che rachi. 4Ekꞌu ri Jesús xubꞌiꞌij che:
—Chatapeꞌ, lik matzijoj che junoq riꞌin xatinkunaj. Jat chwach raj chakunel pa Rocho Dios chaꞌ rire karilo na jinta chi lepra chawe, y chayaꞌa chwach ri Dios ri qasaꞌn xtaqan kan ri Moisés che chaꞌ kaqꞌalajin chikiwach ri tikawex at kunutajinaq chik —xchaꞌ.
Ri Jesús kukunaj ri raj chak jun capitán aj Roma
5Echiriꞌ xopon ri Jesús pa ri tinamit Capernaúm, xopon jun capitán ke ri soldados aj Roma rukꞌ y xujeq lik kelaj che, 6jewaꞌ kubꞌiꞌij:
—Wajawal, ri waj chak lik yewaꞌ kꞌo chwa uwarabꞌal chiwocho. Rire xuꞌan sik y lik kꞌo pa kꞌax —kachaꞌ.
7Ri Jesús xubꞌiꞌij che:
—Riꞌin kinꞌek y kankunaj —xchaꞌ.
8Ekꞌu ri capitán xubꞌiꞌij che:
—Wajawal, riꞌin lik na taqal ta chwe kok la chiwocho. Xew bꞌiꞌij la: “Chatkunutajoq”, y rukꞌ ri chꞌaꞌtem la, kakunutaj ri waj chak. 9Ma e pachaꞌ riꞌin, in kꞌo puqꞌabꞌ jun taqanel y rire ebꞌuyaꞌom ukꞌiyal soldados panuqꞌabꞌ. We kambꞌiꞌij kꞌu che junoq “Jat”, keꞌek; o kambꞌiꞌij che junoq chik “Chatpetoq”, kapetik. Yey we kambꞌiꞌij che juna waj chak “Chaꞌana waꞌ”, kuꞌano —xchaꞌ.
10Ri Jesús echiriꞌ xuta waꞌ, lik xkam ranimaꞌ che y jewaꞌ xubꞌiꞌij chike ri eteran chirij:
—Paqatzij wi kambꞌiꞌij chiwe: Na nuriqom tane chikixoꞌl raj Israel junoq lik kꞌo unimal kubꞌulibꞌal ukꞌuꞌx pachaꞌ wa jun achi. 11Kambꞌiꞌij kꞌu chiwe: Lik e kꞌi ri kepe pa relebꞌal lo ri qꞌij y e kꞌi ri kepe putzaqibꞌal ri qꞌij y kebꞌok chwa ri mexa pa waꞌim rukꞌ ri Abraham, rukꞌ ri Isaac y rukꞌ ri Jacob chupa rutaqanik ri Dios kꞌo chilaꞌ chikaj. 12Noꞌj taq kꞌu ri kakichꞌobꞌo taqal chike kakikꞌul rutaqanik ri Dios ruma e ratz-uchaqꞌ kan ri Abraham, riꞌ kebꞌesax bꞌi y kekꞌaq bꞌi pa ri qꞌequꞌm; chiriꞌ kꞌu riꞌ kebꞌoqꞌ wi y kaqichꞌichꞌ ruwi keꞌ —xchaꞌ.
13Ekꞌuchiriꞌ, xubꞌiꞌij ri Jesús che ri capitán:
—Oj chi ocho la, ma jelaꞌ kuꞌanaꞌ pachaꞌ ri xkubꞌiꞌ kꞌuꞌx la che —xchaꞌ. Chupa kꞌu laꞌ la joqꞌotaj xkunutaj ri raj chak.
Ri Jesús kukunaj ruchu-ujiꞌ ri Pedro
14Ri Jesús xopon chirocho ri Pedro. Chiriꞌ kꞌu riꞌ xril ruchu-ujiꞌ ri Pedro kꞌo chwa uwarabꞌal y lik kꞌo aqꞌ chirij. 15Ekꞌu ri Jesús xuchap ruqꞌabꞌ y jekꞌulaꞌ xikꞌow ri aqꞌ chirij. Ekꞌuchiriꞌ, rixoq xyaktajik y xujeq kebꞌunimaj.
Ri Jesús kebꞌukunaj ukꞌiyal yewaꞌibꞌ
16Echiriꞌ xok raqꞌabꞌ, xekikꞌam lo chwach ri Jesús ukꞌiyal tikawex e kꞌo pakiqꞌabꞌ itzel uxlabꞌixel. Ekꞌu ri Jesús rukꞌ ruchꞌaꞌtem xebꞌeresaj bꞌi taq ri itzel uxlabꞌixel chike y xebꞌukunaj konoje ri yewaꞌibꞌ. 17Xuꞌan waꞌ chaꞌ e kuꞌana ri utzijom kan ri qꞌalajisanel Isaías echiriꞌ xubꞌiꞌij:
Rire xukꞌam bꞌi ri qayabꞌil,
y xukꞌam bꞌi ri qakꞌaxkꞌolil Is. 53:4
xchaꞌ.
Ri kakaj keterej chirij ri Jesús
18Ri Jesús echiriꞌ xrilo ukꞌiyal winaq kisutum rij, xebꞌutaq rutijoꞌn chaꞌ keqꞌax chꞌaqa yaꞌ.
19Ekꞌu laꞌ la joqꞌotaj xopon rukꞌ ri Jesús jun achi aj kꞌutunel re ri tzijpixabꞌ y xubꞌiꞌij che:
—Lal tijonel, riꞌin kinterej bꞌi chiꞌij la tobꞌ pachawi keꞌek wi la —xchaꞌ.
20Ri Jesús xukꞌul uwach:
—Ri yak kꞌo kijul y ri tzꞌikin kexikꞌikꞌ che ruwa kaj kꞌo kisok; noꞌj Ralaxel Chikixoꞌl Tikawex na jinta ne uluwar tobꞌ xa pa kuxlan wi —xchaꞌ.
21Kꞌo chi jun chike rutijoꞌn xubꞌiꞌij che ri Jesús:
—Wajawal, yaꞌa la luwar chwe kanwoyꞌej kakam na ri nuqaw y kanmuq kanoq; tekꞌuchiriꞌ, kinterej chiꞌij la —xchaꞌ.
22Ekꞌu ri Jesús xukꞌul uwach:
—Riꞌat chat-terej lo chwij; chayaꞌa kan chike ri ekaminaq chwach ri Dios chaꞌ e rike kemuquw ri katz-kichaqꞌ kekamik —xchaꞌ.
Ri Jesús kuqꞌatej ri kaqjiqꞌ chwi ri mar
23Ekꞌuchiriꞌ, xok ri Jesús pa jun barco y rutijoꞌn xebꞌek rukꞌ. 24Tekꞌuchiriꞌ, xpe jun nimalaj kaqjiqꞌ chwi ri mar y xujeqo kanoj ri barco che yaꞌ. Yey ri Jesús kawarik.
25Ekꞌu rutijoꞌn xeꞌkikꞌosoj y xkibꞌiꞌij che:
—¡Qajawal! ¡Chojkolobꞌej la, ma kojkamik! —xechaꞌ.
26Ri Jesús xukꞌul uwach:
—¿Suꞌchak lik kixiꞌij iwibꞌ? Riꞌix lik xa jubꞌiqꞌ ri kubꞌulibꞌal ikꞌuꞌx wukꞌ —xchaꞌ.
Ekꞌuchiriꞌ xyaktajik, xuqꞌatej ri kaqjiqꞌ y ri yaꞌ. Xtaniꞌ kꞌu riꞌ ri kaqjiqꞌ y ri yaꞌ xyeniꞌik.
27Rutijoꞌn lik xkam kanimaꞌ che y xkibꞌiꞌij: «¿Saꞌ ruwach waꞌ waꞌchi? ¡Ma tobꞌ ne e ri kaqjiqꞌ y ri yaꞌ kakikoj utzij!» xechaꞌ.
Ri kebꞌ achijabꞌ aj Gadara e kꞌo pakiqꞌabꞌ itzel uxlabꞌixel
28Echiriꞌ xopon ri Jesús chꞌaqa mar pa ri luwar re Gadara, xoꞌlkꞌul kuma kebꞌ achijabꞌ ebꞌelinaq lo chuxoꞌl taq muqubꞌal ke animaꞌ. Kikabꞌichal e kꞌo pakiqꞌabꞌ itzel uxlabꞌixel y lik itzel kiwachlibꞌal, ma kuma rike na jinta junoq kikꞌow chiriꞌ.
29E taq kꞌu riꞌ waꞌ xkijeqo lik ko kesikꞌinik, jewaꞌ xkibꞌiꞌij:
—¿Suꞌchak koꞌlmina ibꞌ la qukꞌ, Jesús, Lal Ukꞌajol ri Dios? ¿Petinaq kami la re kojya la pa kꞌax echiriꞌ kꞌamajaꞌ ne kopon ri qaqꞌij? —xechaꞌ.
30E kꞌo kꞌu ukꞌiyal aq kewaꞌ lo chinimanaj. 31Ekꞌu ri itzel uxlabꞌixel lik xebꞌelaj che ri Jesús:
—We kojesaj bꞌi la, yaꞌa la luwar chiqe kojok bꞌi kukꞌ ri aq —xechaꞌ.
32Ekꞌuchiriꞌ, xubꞌiꞌij ri Jesús chike:
—Jix riꞌ —xchaꞌ. Taq ri itzel uxlabꞌixel xebꞌel bꞌi chike rachijabꞌ y xebꞌok kukꞌ ri aq. Tekꞌuchiriꞌ, konoje ri aq xeꞌkikꞌaqa bꞌi kibꞌ chwi jun siwan, xebꞌeꞌtzaqa kꞌa chupa ri mar y chiriꞌ xejiqꞌ wi.
33Ekꞌu ri e chajinel ke ri aq xebꞌanimajik. Y echiriꞌ xebꞌopon pa ri tinamit, xkijeq utzijoxik ronoje ri xkikꞌulumaj ri aq y ri xuꞌan ri Jesús chike ri kebꞌ achijabꞌ echiriꞌ xebꞌeresaj pakiqꞌabꞌ ri itzel uxlabꞌixel. 34Konoje kꞌu ri winaq re ri tinamit xepe pa kꞌo wi ri Jesús. Echiriꞌ xkil uwach, lik xkitzꞌonoj che chaꞌ kel bꞌi chiriꞌ pa taq ri kiluwar.

¿Sabías que…?
Curaciones, fe y el mar
- Capernaum, la ciudad a la que Jesús entra en este capítulo, era una ciudad de Galilea que no se menciona en el Antiguo Testamento. El Easton's Bible Dictionary (1897) dice que llegó a ser “su propia ciudad” después de que dejó Nazaret, e incluye la súplica del centurión y la curación en la casa de Pedro entre los hechos situados allí.Fuentes: Capernaum · el propio texto bíblico
- Jesús dice que muchos vendrán del oriente y del occidente para compartir el banquete con Abraham, Isaac y Jacob en el reino de los cielos. El Easton's Bible Dictionary (1897) presenta a Abraham como hijo de Taré y heredero de las promesas, a Isaac como el único hijo de Abraham con Sara, y a Jacob —también llamado Israel— como el hijo gemelo menor de Isaac y Rebeca.Fuentes: el propio texto bíblico · Abraham · Isaac · Jacob (Israel)
- Mateo presenta las curaciones de aquella noche como cumplimiento de lo dicho por medio del profeta Isaías: “Él tomó nuestras dolencias y cargó con nuestras enfermedades.” El Easton's Bible Dictionary (1897) identifica a Isaías como hijo de Amoz, que profetizó durante los reinados de Uzías, Jotam, Acaz y Ezequías.Fuentes: el propio texto bíblico · Isaiah
Notas escritas con ayuda de IA a partir de fuentes abiertas (Theographic Bible Metadata, CC BY-SA 4.0; Easton’s Bible Dictionary, dominio público) y revisadas antes de publicarse.
Lugares de este capítulo
- Gadara · Hoy: Umm Qais · 32.656, 35.679 · versículo 28
Solo aparecen lugares identificados con alta confianza (90 % o más según las fuentes académicas reunidas por OpenBible). Mapa de la época: DARE (Digital Atlas of the Roman Empire), CC BY 4.0; mapa actual: © colaboradores de OpenStreetMap; lugares: OpenBible.info (CC BY 4.0).
Créditos y licencia de esta traducción
Ri utzilaj tzij re ri kanimajawal Jesucristo New Testament in Achi Rabinal; acr (GT:acrN:Achi) copyright © 2009 Wycliffe Bible Translators, Inc. Language: Achi Dialect: Rabinal Translation by: Wycliffe Bible Translators, Inc. Copyright Information © 2009, Wycliffe Bible Translators, Inc. All rights reserved. This translation text is made available to you under the terms of the Creative Commons License: Attribution-Noncommercial-No Derivative Works. ( http://creativecommons.org/licenses/by-nc-nd/3.0/ ) In addition, you have permission to port the text to different file formats, as long as you do not change any of the text or punctuation of the Bible. You may share, copy, distribute, transmit, and extract portions or quotations from this work, provided that you include the above copyright information: You must give Attribution to the work. You do not sell this work for a profit. You do not make any derivative works that change any of the actual words or punctuation of the Scriptures. Permissions beyond the scope of this license may be available if you contact us with your request. The New Testament in Achi © 2009, Wycliffe Bible Translators, Inc. All rights reserved. This translation is made available to you under the terms of the Creative Commons Attribution-No Derivatives license 4.0. You may share and redistribute this Bible translation or extracts from it in any format, provided that: You include the above copyright and source information. You do not make any derivative works that change any of the actual words or punctuation of the Scriptures. Pictures included with Scriptures and other documents on this site are licensed just for use with those Scriptures and documents. For other uses, please contact the respective copyright owners. 2014-04-18
Fuente: http://ebible.org/acrNNT/ · eBible.org