Nations Bible

Genesis 47

Suha' Maseho: Kadadiam anna Pa'dandiam Bakahu · Tap a verse to see its cross-references.

Yakub umpellambi'i Firaun

1Umpasolam lima solasubunna Yusuf, anna le'ba'i umpellambi'i Firaun. Landa'i, ma'tula'um Yusuf naua: “Sulem ambeku anna solasubungku dio mai Kanaan, sitonda dombana, bekena, sapinna, anna ingganna kullena. Temo dioim Gosyen.” Iya umpa'paissangammi solasubunna lako Firaun.

3Nakutanaim Firaun naua: “Aka pengkähängammua'?” Natimba'im naua: “To ma'kambi'kam susi tomatuangki anna nene to kiponene. 4Sulekam la messihuhu inde aka mapana' kakobeam dio Kanaan. Anna pa'de polem humpu' naande patuboangki dio. Kela mala umpäbäikam tohho dio Gosyen.”

5Ma'kadam Firaun lako Yusuf naua: “Temo sulem ambemu anna solasubummu. 6Inde Mesir beba'ko. Päbäii tohho dioi Gosyen, aka etam handam mapianna ongeam inde Mesir. Anna muuaangannä' solasubummu handam manähäna ma'kambi' anna napahesannä' to la ungkambi' patuboangku.”

7Umpasola duka' ambena Yusuf lao napa'paissangam lako Firaun. Iya umpa'lambeammi Firaun Yakub. 8Nakutanaim Firaun naua: “Sanakam taummu ambe'?” 9Natimba'im Yakub naua: “Sahatu' tallu pulom taunna illaannä' pangngola-lalangam. Inde katuboangku naponnoi kamasussaam, anna kappo'di' ke dipasibandinni katuboanna nene to kuponene illaam pangngola-lalanganna.” 10Puhai, umpa'lambeam polepi Firaun Yakub, mane le'ba'i sule.

11Iya le'ba'um Yusuf umbeem ambena anna solasubunna handam mapianna litä' dio Mesir sikahuku' kota Rameses, situhu' pahentana Firaun. 12Napatoka asammi Yusuf la kinandena ambena anna solasubunna sola ingganna kasahapuanna, situhu' budanna änä'na.

Yusuf ma'takka' muoloi kakobeam

13Tuttuam mapana' kakobeam nasi'dingam hupatau susi dio Mesir susi dio Kanaan, nasuhum malamma pa'botto aka tä'um deem naande. 14Ingganna doi' pebaja'na to Mesir anna to Kanaan to sule mualli gandum, nahempum asam Yusuf anna napadioi banuanna Firaun. 15Tappana tappu' asanni doi'na tau dio Mesir anna Kanaan, suleim to Mesir umpellambi'i Yusuf melau naua: “Tappu'um doi'ki, sapo' beengkam kinande indana matekam.”

16Natimba' Yusuf naua: “Maka' tappu'unna' ia doi'mu olo'-olo'mua' beennä', anna kubeengkoa' kinande.” 17Iya umpebeennim olo'-olo'na lako Yusuf nasukasam kinande. Anna nabeenni kinande suka'na dahanna, dombana, sapinna, anna keledainna. Susim too anna malai deem naande taum eta too.

18Kende'i taum, sule pole oom hupatau lako Yusuf naua: “Tä' kibuniangam setonganna tappu'um doi'ki anna olo'-olo'ki aka muala asammi. Angga ham deem kiampuam, kaleki anna litä'ki. 19Pesäkäikanni indana matekam, tilaum toi litä'ki. Allikam sola litä'ki, kinande la umbeengkam, anna naposabua'kam Firaun. Beengkam banne kiambo' indana tohho bäbäi litä'ki anna malakam tubo.”

20Ingganna litä' dio Mesir naalli Yusuf, anna napuänganni Firaun. Ingganna to Mesir umbalu' asammi litä'na aka mapana' sugali' kakobeam. Susim too anna naampuam asammi litä' Firaun dio Mesir. 21Anna ingganna to Mesir naposabua' asam Yusuf. 22Angga ham tä' naalli Yusuf ingganna litä'na sando aka abana si nabeem ia kapahalluanna Firaun. Iam too anna tä'um ia umbalu' litä'na.

23Ma'kadam Yusuf lako hupatau naua: “Ikoa' anna litä'mu puham kualli, napuängam Firaun. Indem banne dibeengkoa' la muambo'a'. 24Angga hia ke kende'um la umbahe limaa'; sambaheam la umbeenna' Firaun, anna appa' baheanna la umpobannea' taum pole anna la umpotuboa' sola änä'mu anna ingganna tau illaam banuammu.” 25Mentimba'im naua: “Puhangkam umpesäkäi. Assala'na ungkamasei liukam, päbäi naposabua'kam Firaun.”

26Susim too pa'ulalanna Yusuf muäto' diona bahe limanna bua pengkähä dio Mesir dibeem Firaun. Anna pangngätosam iam too naanda'i liu to Mesir sule lako temo. Angga ham litä'na sando tä' naampuam Firaun.

Pepakahi'dinna Yakub tappana mahuku' kamateanna

27Susim too Israel untadongkonni Gosyen dio Mesir. Mellängäm asam salu katuboanna sahapunna anna membea' pessubunna dio.

28Sapulo pitupi taunna tubo Yakub dio Mesir, nasuhum mala nalambi' sahatu' appa' pulo pitu taunna naolaam tubo. 29Tappana la mate kale, untambaim Yusuf, änä'na, anna napa'tula'i naua: “Maka' sule tama pa'kamasemu di kao, anda'i inde ahena too' apangku aka la ma'pindako. Anna mala umpasule lako liu pa'kamasemu tama kaleku, tä'ä' la ullamum inde Mesir ke mateä'. Aka kupemulu la dilamum sola tomatuangku dio ku'bu'na. La umbabaä' lako Kanaan anna ullamum dioä'.” Natimba' Yusuf naua: “La kupalako situhu' pa'elo'mu.”

31Ma'kada Yakub naua: “Pa'pindako keta la umpasule lakoi.” Ma'pindam Yusuf, iya menombam Yakub längäm Puang Allataala dio pengnguluam petindoanna.

Artistic illustration — an interpretation, not a historical record.

Did you know?

A Home in Goshen

  • Joseph settled his father and brothers in Goshen, the region Pharaoh called the best part of the land. The same district is also called the land of Rameses; it lay east of the Nile, apparently not far from the royal residence, though the region is now desert.Sources: the Bible text itself · Goshen · Rameses
  • When Pharaoh asked their occupation, Joseph’s brothers answered that they were shepherds, as their fathers had been, and they asked to stay in Goshen because the famine in Canaan had left no pasture for their flocks. Easton’s Bible Dictionary (1897) identifies the Pharaoh of Joseph’s day as probably Apopi, the last Hyksos king, and notes that shepherds were an abomination to the native Egyptians, while these Asiatic shepherds were welcomed by the Hyksos; some instead place Joseph in the reign of Thothmes III, long after the Hyksos.Sources: the Bible text itself · Pharaoh (of Joseph)
  • As the famine exhausted Egypt and Canaan, Joseph took payment first in money, then in livestock, and finally in land, so that the fields became Pharaoh’s and the people were reduced to servitude. He did not take the priests’ land, since Pharaoh already supplied their rations, and he established that a fifth of the produce belonged to Pharaoh.Sources: the Bible text itself

Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.

Places in this chapter

  • Canaan · 32.767, 35.333 · verses 1, 4, 13, 14, 15
  • Goshen · Today: Goshen 1 · 30.799, 31.834 · verses 1, 4, 6, 27
  • Egypt · 30.129, 31.308 · verses 4, 6, 11, 13, 14, 15, 20, 21, 26, 27, 28, 29, 30

Only places identified with high confidence are shown (90% or more according to the scholarly sources compiled by OpenBible). Period map: DARE (Digital Atlas of the Roman Empire), CC BY 4.0; modern map: © OpenStreetMap contributors; places: OpenBible.info (CC BY 4.0).

Credits and license for this translation
Suha' Maseho: Kadadiam anna Pa'dandiam Bakahu
The New Testament and Genesis in the Bambam language of Indonesia
Perjanjian Baru dan bagian dari Perjanjian Lama dalam bahasa Bambam dari Indonesia
copyright © 2004 Lembaga Alkitab Indonesia
Language: Bambam
Translation by: Wycliffe Bible Translators
This translation is made available to you under the terms of the
Creative Commons Attribution-No Derivatives license 4.0.
You may share and redistribute this Bible translation or extracts from it in any format, provided that:
You include the above copyright and source information.
You do not make any derivative works that change any of the actual words or punctuation of the Scriptures.
Pictures included with Scriptures and other documents on this site are licensed just for use with those Scriptures and documents.
For other uses, please contact the respective copyright owners.
2022-03-11

Source: http://ebible.org/ptu/ · eBible.org

Talk to us

Tell us where you read from, how the Bible has helped you, or what we could improve. We read every message.