Nations Bible

Matthew 6

IPILI NUTESAMENE · Tap a verse to see its cross-references.

Wandakali Tipia Tupa Moyalapape Leane Oko

1Wuane lalu, Jisasato pii mindi tako pua loto, wandakali minditupa-mane mana koo mindi minuto, wandakali waka tupa minakasa wato, wandakali epene tika-pene gulo atalaini leaipia. Wandakali-mane utupanena gene tupa laiyu leakale nembo toto, utupane-mane lotu andakapi, asiningapi, utupanena poto, biakulu mindi peyoto, wandakali tipia tupa moyo minditaka mayaini. Mayai-kola, wandakali waka tupamane utupanena mana okone andoto, utupanena gene tupa laiyu lalaini okone angu utupanena yole yalane lo, nambato pii enene mindi yakama langeyo. Yakamato minakasa alaini wandakali utupanena mana okone wato mina na-piyapape. Jia. Wandakali waka tupamane yakamana mana epene tupa andeakale nembo toto, yakamato mana epene utupane wandakali waka tupana wenonga mineaindo, yakamana ayiane ati kenga ateya okomane yakamana mana epene minulai utupanena yole mindi yakama gii napulu-peyako. Wandakali-mane yakama epene ya lo andeakale nembo toto, yakamana mana epene tupa wandakalina wenonga mina na-piyape.

3Nimbato too pua moyo minditaka maindo, nimbana ayiane okomane nimbana mana epene okone andoto, yole mindi nimba gulupeya-ko. Nimbato wandakali tipia tupa moyo minditaka mindi maule-angi, nimbana mana epene okone too pitane ateakale nembo tape. Wuane nembo toto, nimbana kii tika okomane wandakali tipia tupa moyo minditaka maule okone nimbana kii koya okomane anda napeakale lo too pua moyo maipe. Jisasato wuane leaipia.

Yakamato Pote Loto, Wua Lalapape Leane Oko

5Wuane lalu, Jisasato pii mindi tako pua loto, minakasa alaini wandakali tupamane pote leyai-angi, wandakali waka tupamane utupane andapiai lakae lo nembo toto, utupane-mane lotu anda tupanapi, asia kembo tupanapi, utupanena atoto, pote lo atalaini leaipia. Wandakali waka tupamane utupanena mana okone andalaini okone angu minakasa alaini wandakali utupanena yole gulo yalane loto, nambato pii enene mindi yakama langeyo. 6Nimbato pote lole-angi, wandakali utupane-mane piyaini pua napipe. Jia. Nimba palilini lumu okona kolandaka loto, asia tuma puato, Ayiane Gote oko ando pote lape. Nimbato too pua pote lole-kola, balato nimbana mana okone andoto, yole mindi nimba gulupeya.

7Wandakali yame waka tupamane pote loto, pii kambua leyama mambele, Goteto ale olopeya nembo toto, pii tene andane napalene kambua lalaini. Yakamato pote lolai-angi, wandakali utupane-mane piyaini pua na-piyapape. Jia. 8Yakamato minditaka gii lo tee nalolai-kola teke, yakamana ayiane Goteto yakamanga minditaka jia eya tupa wamba ini nembo talane-ko. Yakamato wandakali yame waka tupana mana tupa wato mina na-piyapape. Jia.

9Yakamato pote lolai-angi, wua lalapape: Nanimana ayiane ati kenga atene oko, nimbana gene oko tika pua yakale. 10Nimbato nanima moyo ando atape. Ati kenga ateyai tupamane nimbato nembo tele pua piyaini. Wuane pua teke, yuu okona wandakali-mane piyapa lape. 11Nanima tomo andipa namakale gipe. 12Nanimato wandakali wakana koo tupa apialamane pua teke, nimbato nanimana koo piyamane tupa apia-gipe. 13Koo tupamane nanima minu makande pulu epolaini. Nimbato ando atape. Koo tupamane nanima minu koyoyale peaindo, nimbato nanima moyape. Yakamato wuane loto, pote lalapape leaipia.

14Wandakali-mane yakamanga koo pulai-kola, yakamato utupanena koo tupa apia-maiyaindo, yakamana ayiane okomane yakamana koo pulaini tupa apia-gulupeya teke. 15Balato wuane pulupeya tekeko, yakamato wandakali waka tupana koo pulaini tupa apia-mai napeaindo, yakamana ayiane ati kenga ateya okomane yakamana koo pulaini tupa apia-gii napulu-peyako. Yakamato wandakali waka tupana koo tupa apia-maiyapape. Jisasato wuane leaipia.

Tomo Nanene Konda Alaini Mana Oko

16Wuane lalu, Jisasato pii mindi tako pua loto, minakasa alaini wandakali tupamane pote kambua lamakale nembo toto, ole ukupini mindilapo tomo nanene konda olai-angi, tomo nanene ateyai lo wandakali waka tupamane andeakale nembo toto, utupane-mane wenonga yo epoko piyaini leaipia. Wandakali waka tupamane utupanena mana okone andalaini okone angu utupanena yole gulo yalane lo nambato pii enene mindi yakama langeyo. Utupane-mane wuane piyaini tekeko, yakamato pote kambua lamakale nembo toto, ole ukupini mindilapo tomo nanene kondolai-angi, wandakali utupane-mane piyaini pua na-piyapape. Jia.

17Nimbato pote kambua lokale nembo toto, oto ukupini mindi tomo nanene kondalu atole-angi, nimbato wuane pule oko wandakali waka tupamane anda napeakale nembo toto, nimbana lee-inga wasa-wasa peyalu, nimbana kawa itininga wele epene mindi gae lo aiya wato, mo kuai laya ape. Ole ukupini mindilapo nimbato pote kambua lokale nembo toto, tomo nanene kondalu atole-angi, wandakali-mane anda na-piyaini ayiane okomane angu nimbana mana okone andoto, yole mindi nimba gulupeya. Jisasato wuane leaipia.

Ati Kenga Tawe Minditaka Epene Tupa Mo Yomowa Atalapape Leane Oko

19Wuane lalu, Jisasato pii mindi tako pua loto, yakamato yuu okona tawe minditaka epene tupa mo yomowa ateaindo, puya-puya tupamane minditupa nalu, minditupa ipakula tolopeya leaipia. Pake mialane akali tupamane yakamana anda tupa keao loto, minditupa pake molopeyai tekeko, yakamato ati kenga tawe minditaka epene tupa mo yomowa ateaindo, mindimane pake mia napulu-peyai. Puyapuya-mane nanolo-peyai. Ipakula taa napulu-peyako. Yakamato yuu okona tawe minditaka epene tupa mo yomowa ata na-piyapape. Jia. Yakamato ati kenga tawe minditaka epene tupa mo yomowa atalapape. Jisasato wuane leaipia.

Lene Oko Umbaini Okona Lamu Yale Gulo Atalane Oko

22Wuane lalu, Jisasato pii mindi tako pua loto, lene oko umbaini pitakana lamu gulene. Lamu mindimane kuai lo tii peando, minditaka yola tupa nimbato kuai lo andolopele. Wuane pua teke, nimbana lene kuai lo teando, nimbato pitaka taka kuai lo andolopele. 23Wuane tekeko, nimba lee koo ateendo, nimbana umbaini utumane undupi pangosa wete atene gulo atolopele. Goteto tii-pene oko nimba gula-kola, nimbato anda napeendo, nimba undupi-lene andane wete okona atolopele. Jisasato wuane leaipia.

Nembo Kambua Tolaini Leane Oko

24Wuane lalu, Jisasato pii mindi tako pua loto, wandakali mindimane akali andane lapona piape pimawua ateando, balato akali andane mindi epelewa yamapane yoto, balana piape kuai lo pimaulu-peya leaipia. Akali okonena piape kuai lo pimawuato, akali andane mindoko koo ya lo embo wete wato, masia malu-peyako. Mindimane akali andane lapona piape akali ata napepe-pene. Tene okonena, yakamato Gote-la, muni-la, okonelapo lapotakana piape akali guleaindo, mana okone kuai nalolo-peya.

25Yakamato eka tupa andalapape. Eka utupane-mane ee mindi na-piyaini. Dee, utupane-mane tomo minditupa matili namakale loto, mandu epoto, yakamana anda tupana yata aa na-piyaini tekeko, yakamana ayiane ati kenga ateya okomane utupane tomo neakale maiyane. Wandakali yakamato eka tupa sia minu, utupanena lipinga yale ateyai. Goteto yakamana umbaini oko waa puato, yakama saka ataya yaepia. Piape pitete-pene okone wamba ini puato, andipa balato pitete wato, tomopi, tonapi yakama gii napene kondolo-peyape. Jia. Goteto mali ana atola lo giyane tupa atalu, wandakali mindi bala tanena tai-lene okomane ana mindikipi mindi katulo kimbu pua ata napulu-peyako. Yakamato umbaininga tona pulane tupapi, tomo ipa nolane tupapi, utupane ani tawe mia-makalepe lo nembo kambua tatawa atolaini.

28Anu peakale yakamato tona ani tawe mia-makalepe lo nembo kambua teyaipe. Yakamato palawa dini epene yati-pene siapusa liya tupa nembo talapape. Utupane yakama tane piape pii, yati pii, mindi na-piyaini. Jia. Goteto utupane kuai lo wete yati piya maiyane. 29Utupane mee lialaini tekeko, palawa dini utupanena yati epene wetete okomane kiŋi Solomone balana tona yati-pene epene wete wamba pua ateane tupa sia miniya lo nambato yakama langeyo. 30Palawa dini utupane angini mindi jia. Palawa dini utupane andipa angu epene lialaini. Anate-lene wandakali-mane palawa utupane yokowa apoto, yangalaini. Goteto palawa dini utupanena yati wayumane piya maiyu, wandakali yakamana yati tona tupa gii napene kondolo-peyape. Jia. Goteto yakamana tona gii napene kondolo-peya nembo teaindo, yakamato balanga wayumane tungi peyo bilipi lo ata napulai-kola pulupeya.

31Gotena pii ale naene aitene wandakali tupamane tomo ipa nolane tupapi, umbaininga pulane tona tupapi, utupane ani tawe mia-makalepe lo nembo kambua too atalaini. Utupane-mane wuane nemboto atalaini tekeko, Gotena wandakali yakamato okonetaka pitaka miape-pene lo yakamana ayiane ati kenga ateya okomane nembo teya-ko. Yakamato tomo ipa nolane tupapi, tona pulane tupapi, utupane ani tawe mia-makalepe lo nembo kambua tatawa ata na-piyapape. Jia.

33Wuane nembo natene, Goteto yakama moyo ando ateakale nembo toto, balana mana tika-pene tupa wato minuyale mandeke pua atalapape. Yakamato wuane pua ateaindo, balato yakamana tomo ipa nolane tupapi, tona pulane tupapi, utupane pitaka yakama gulupeya. 34Ole dindi lo kenda-pene waka-waka tupa epalane tekeko, kenda-pene anati epolopeya tupa anati teke nembo tapa-peneko. Anati kenda-pene mindi epolane nembo toto, andipa yakamato nembo kambua tatawa ata na-piyapape. Jisasato wuane leaipia.

Artistic illustration — an interpretation, not a historical record.

Did you know?

Secret righteousness and trust

  • This chapter is part of the Sermon on the Mount. An event listing dates that sermon to AD 28 and records it as lasting one day.Sources: Sermon on the Mount · the Bible text itself
  • Jesus says not to sound a trumpet in the synagogues and streets when giving to the needy, as the hypocrites do in order to be honored. He also warns against praying on street corners to be seen and against fasting with a disfigured face; instead, he describes praying in an inner room with the door shut, and fasting with an anointed head and a washed face.Sources: the Bible text itself
  • Jesus says that not even Solomon in all his glory was adorned like one of the lilies of the field. A dictionary entry explains that his Hebrew name, Shelomoh, means “Peaceful,” that he was David’s son by Bathsheba, and that Nathan called him Jedidiah, “beloved of the Lord”; his reign is recorded in 1 Kings 1–11 and 2 Chronicles 1–9.Sources: the Bible text itself · Solomon

Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.

Credits and license for this translation
IPILI NUTESAMENE
The New Testament and portions of the Old Testament in the Ipili Language of Papua New Guinea
Nupela Testamen na sampela hap long Olpela Testamen long tokples Ipili long Niugini
Copyright © 2008-2023 Bible Society of Papua New Guinea
℗ Faith Comes by Hearing
Language: Ipili
Translation by: Wycliffe Bible Translators
This translation is made available to you under the terms of the
Creative Commons Attribution-Noncommercial-No Derivatives license 4.0.
You may share and redistribute this Bible translation or extracts from it in any format, provided that:
You include the above copyright and source information.
You do not sell this work for a profit.
You do not change any of the words or punctuation of the Scriptures.
Pictures included with Scriptures and other documents on this site are licensed just for use with those Scriptures and documents.
For other uses, please contact the respective copyright owners.
2023-10-09

Source: http://png.bible/ipi/ · eBible.org

Talk to us

Tell us where you read from, how the Bible has helped you, or what we could improve. We read every message.