Matthew 6
परमेश्वर उन वचन · Tap a verse to see its cross-references.
गुप्त दान इन शिक्षा
1“सावधान ईरी! नीव मंळसागोळी तोरसोर साटी तान न्याय इन क्याल्सा माळबाळेतीर, ईलारा नीव तान स्वर्गीय आप्प उन से येनु उच प्रतिफल ताकोम सकतीदिल.”
2“इदुरसाटी याग नीव दान माळी, रा तान मुंद सैनाई मुर्सुसबाळी, ह्यांग कपटी लॉकुर, सभागोळ अदिक गलीगोळ दा माळतार, ताकी लॉकुर आंदुर बळाई माळुल. ना नीम से खरा माताळतीन कि आंदुर तान प्रतिफल ताकोम कोंडार. 3लेकीन याग नीव दान माळी, रा जो नीम ऊम्मा कय माळतद, अद नीव तान डाक्या कय इक मालूम नळुगोळ बाळेतीर. 4कि नीम दान होचकु ईरूल, अदिक आग नीम आप्प जो होचकु नोळतान, नीमी प्रतिफल कोट्टान.”
प्रार्थना अन्द शिक्षा
5“याग नीव प्रार्थना माळीर, रा कपटीगोळ घाई आगबाळी, यतिकी लॉकुरी तोरसोर साटी सभागृह दा अदिक सळक इन मोळ मा निदुरकु प्रार्थना माळोद आंदरी वळ्लीद हततद. ना नीम से खरा माताळतीन कि आंदुर तान प्रतिफल ताकोम कोंडार. 6लेकीन याग नीव प्रार्थना माळी, रा तान कमरा दा होगी; अदिक कवाळ बंद माळकु तान आप्प उन से गुप्त दा प्रार्थना माळीर. आग नीम आप्प जो होचकु नोळतान नीमी प्रतिफल कोट्टान.”
7प्रार्थना माळाहोती गैरयहूदीगोळ घाई घळी-घळी माताळ बाळेतीर, यतिकी आंदुर सोचतार कि आंदुर्द हापाळ माताळदुर देल आंदुर्द केळकु आदीत. 8इदुरसाटी नीव आंदुर्द घाई आगबाळी, यतिकी नीम आप्प नीम बेळा से पयला अच जान्सतान कि नीम येन येन जरवतगोळ आव. 9इदुरसाटी नीव ईत्ता रीति देल प्रार्थना माळतोगी:
“हे नाम आप्प, नी जो स्वर्ग दा आय;
नीन हेसुर पवित्र मान्सकु आगुल.
10दुनिया दा नीन राज्य बरूल.
नीन इच्छा ह्यांग स्वर्ग दा पुरा आगताव, हांग अच पृथ्वी मा भी आगुल.
11नाम हागुल तिर्मुद रोट्टी ईंद नामी कोळ.
12अदिक यात्ता प्रकार देल नाव तान अपराधीगोळ माफ माळेव,
हांग अच नी भी नाम पापगोळी माफ माळ.
13अदिक नामी परीक्षा दा तरबाळ,
लेकीन बुराई देल ऊळ्स.”
14“इदुरसाटी अगर नीव मंळसागोळ्द अपराध माफ माळीर, रा नीम स्वर्गीय आप्प भी नीमी माफ माळ्यान. 15अदिक अगर नीव मंळसागोळ्द अपराध माफ माळतीदील, रा नीम स्वर्गीय आप्प भी नीमव अपराध माफ माळतीदील.”
उपास इन शिक्षा
16“याग नीव उपास माळीर, रा कपटीगोळ घाई नीम मार्रा मा उदासी ईरबाळुल, यतिकी आंदुर तान मार्रा हांग अच माळकु ईटतार, यतिकी लॉकुर आंदरी उपासी समसुल. ना नीम से खरा माताळतीन कि आंदुर तान प्रतिफल ताकोम कोंडार. 17लेकीन याग नीव उपास माळीर रा तान ताल्ला मा याण्णा ऊदी अदिक मार्रा तोळी, 18ताकी लॉकुर ईला लेकीन नीन आप्प जो गुप्त आन, नीनी उपासी जान्सुल ई दशा दा नीन आप्प जो गुप्त कर्मगोळी नोळकु, नीनी अऊर्द प्रतिफल कोट्टान.”
स्वर्गीय धन
19“तान साटी पृथ्वी मा धन जमा माळबाळेतीर, यल किळा अदिक जंग नाश माळताव, अदिक यल काळ्लुर तिजोरी वडुतार अदिक काळ्लपनी माळतार. 20लेकीन तान साटी स्वर्ग दा धन जमा माळी, यल न रा किळा, अदिक जंग नाश माळीत, अदिक यल काळ्लुर ना तिजोरी वळदार अदिक ना चोरी माळ्यार. 21यतिकी यल नीम धन आद अल नीम मन भी हतकु ईत्तीत.”
मय इन ज्योति
22“नीन मय इन दिंग्या कण्ण हुन: इदुरसाटी अगर नीन कण्ण निर्मल आव रा नीन सप्पा मय भी ऊजुळ इन घाई आदीत. 23लेकीन अगर नीन कण्ण बुरा ईरूल, रा नीन पुरा मय भी अंधकारमय आदीत; ईद कारण अद ऊजुळ जो नीन दा आद अगर अंधकारमय आद रा अद अंधार याट खोल आदीत!”
परमेश्वर अदिक धन
24“यावारा मंळसा येढ्ढ स्वामीगोळ्द स्यावा माळ सकालुन, यतिकी आव ऊंद मंळसा से दुश्मनी अदिक दुसरा मंळसा से प्यार ईट्यान, या ऊंद से मेल मिलाप माळ्यान अदिक दुसरा मंळसा अक नीच जानस्यान. नीव परमेश्वर अदिक धन येढ्ढु स्यावा सांगुळल्या माळ सकालीर.”
25“इदुरसाटी ना नीम से अनतीन कि तान जीवा अन्द साटी ईद चिन्ता माळबाळी कि नाव येन तिनदेव अदिक येन कुळदेव; अदिक तान मय इन साटी फळक्यागोळ्द चिन्ता माळबाळी. येन जीव भोजन देल, अदिक मय फळक्यागोळ देल अनमोल हैलेच? 26आकाश ईनव पक्षीगोळी नोळी! अव ना बींजा हचताव, ना कोयताव, अदिक ना तान तिना जागा दा संगरूस्कु ईटताव: तरी भी नीम स्वर्गीय आप्प अवरी पाल्सतान. येन नीम किमत अऊर से यक्कुल हैलेच? 27नीम दा टु हिंग याव आन, जो चिन्ता माळकु तान जिंदगी दा ऊंद घळी भी वाळुस सकतान?”
28“अदिक फळक्यागोळ साटी येती चिन्ता माळतीर? आळी दाकळव फूलगोळ मा ध्यान माळी कि अव ह्यांग वाळुसताव; अव ना रा मयनत माळताव, ना तान साटी फळक्यागोळ माळताव. 29तरी भी ना नीम से अनतीन कि सुलैमान राजा भी, तान पुरा जीवन दा अऊर दा टु यारदु घाई कपळागोळ हाक्कु ईला ईरोन. 30इदुरसाटी याग परमेश्वर मैदान इन काड्डा अक, जो ईंद आद अदिक नाळ बेक्की दा झोक्सकु आदीत, हिंग कपळा हाकसुसतान, रा हे अल्पविश्वासीगोळा, आव नीमी ईऊर से वळ्लीद येती हाकसुसतिदिल?
31“इदुरसाटी नीव विचार माळकु ईद अनबाळी कि नाव येन तिनदेव, या येन कुळदेव, या येन हाक्केव. 32यतिकी गैरयहूदी ई सप्पा वस्तुगोळ्द खोज दा ईरतार, पर नीम स्वर्गीय आप्प जान्सतान कि नीमी ई सप्पा वस्तुगोळ्द जरवत आद. 33इदुरसाटी पयले नीव परमेश्वर उन राज्य अदिक आऊन न्याय इन खोज माळी रा ई सप्पा वस्तुगोळ भी नीमी सिक्केदव. 34इदुरसाटी नाळ इन चिन्ता माळबाळी, यतिकी नाळ इन दिन तान चिन्ता खुद माळ कोंडीत; ईंद इन साटी ईंद इन दा दुख काफी आद.

Did you know?
Secret righteousness and trust
- This chapter is part of the Sermon on the Mount. An event listing dates that sermon to AD 28 and records it as lasting one day.Sources: Sermon on the Mount · the Bible text itself
- Jesus says not to sound a trumpet in the synagogues and streets when giving to the needy, as the hypocrites do in order to be honored. He also warns against praying on street corners to be seen and against fasting with a disfigured face; instead, he describes praying in an inner room with the door shut, and fasting with an anointed head and a washed face.Sources: the Bible text itself
- Jesus says that not even Solomon in all his glory was adorned like one of the lilies of the field. A dictionary entry explains that his Hebrew name, Shelomoh, means “Peaceful,” that he was David’s son by Bathsheba, and that Nathan called him Jedidiah, “beloved of the Lord”; his reign is recorded in 1 Kings 1–11 and 2 Chronicles 1–9.Sources: the Bible text itself · Solomon
Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.
Credits and license for this translation
परमेश्वर उन वचन The Holy Bible in the Holiya language of India: परमेश्वर उन खरा वचन copyright © 2020 The Word for the World International Language: Gohllaru (Holiya) Contributor: The Word for the World International परमेश्वर उन वचन हाळोद नियम, 2025 The Old Testament Books in Holiya Language The Word for the World International This translation is made available to you under the terms of the Creative Commons Attribution Share-Alike license 4.0. You have permission to share and redistribute this Bible translation in any format and to make reasonable revisions and adaptations of this translation, provided that: You include the above copyright and source information. If you make any changes to the text, you must indicate that you did so in a way that makes it clear that the original licensor is not necessarily endorsing your changes. If you redistribute this text, you must distribute your contributions under the same license as the original. Pictures included with Scriptures and other documents on this site are licensed just for use with those Scriptures and documents. For other uses, please contact the respective copyright owners. Note that in addition to the rules above, revising and adapting God's Word involves a great responsibility to be true to God's Word. See Revelation 22:18-19. 2025-07-11
Source: http://ebible.org/hoy/ · eBible.org