Psalms 40
God Nuye Kunwok · Tap a verse to see its cross-references.
God Nawu Kanbidyikarrmen.
1Ngaye wanjh ngahdjaldi bu ngadjalmadbun nawu Yawey. Bu ngaye nganburrbom dja mak nungka ngandjalkayhmibekkang. 2Nungka nganbebkeng kudjorlokbeh kanjdji kore ngabongdi bu darnkih ngarrowimeninj. Nungka nganbebkeng kore kunkihbeh bu ngaye ngayibmeninj dja ngankurrmeng kore kunbolkrayek ba bu ngare kunmak rowk. 3Nungka nganwong mankerrnge mankong bu ngawayini dja ngaburlume nawu God kadberre rowk. Dja mak birriwern bininj bedda kabirrikurdunan, wanjh kabirriburlume dja kabirrikurrmerren kore Yawey nuye.
4Bininj nawu kabirrikurrmerren kore Yawey wanjh bedda kabirridjalnjilngmakmen. Minj bedda kabindiwoybukwon bininj nawu kabirriburlumerren dja mak kabirrimarneboddan yiman nabubuyika gods.
5Ngudda nawu Yawey God ngardduk, yingan yidjalkurduyimeng kunwern kore yirrurrkmirrikenh kunkimuk kundulkarre dorrengh ngadberre. Ngudda kanyingkihmarnekarremarnbom bu kunwern! Minj nangale nabuyika god yiman ngudda. Minj nangale bininj ngunmayaliburrbun, dja mak minj nangale kawernhburrbun ngudda yikurduyime kore kundulkarre. Djal kunwern duninjh.
6Bolkkime ngaye ngadjalwohburrbom kore ngudda minj ngad yidjare ngundiwon dja ngundimarnekinje mayh bu ngarridi yiwarrudj. Ngudda nawu kanbukkang bu ngaye ngaborlhmengkenh kore ngudda minj yidjare nawu mayhbubuyika ngaye woyi kore kunwarrekenh ngardduk. 7Ngaye nawu marneyimeng, “Yina! Ngaye ngamwam ngahdi kore djurra manbu kabimbuyindi bu nganyolyolme. Kuhni wanjh kayime: 8‘Ngaye nganjilngmak bu ngakurduyime kore ngudda yidjare, ngudda nawu God ngardduk. Manbu mankarre ngudda ke kanbukkang yiman kahbimbuyindi rowk kore kukange ngardduk.’ ”
9“Wanjh ngaye ngayolyolme bininj bedberre nawu ngudda ke kore ngarrimirnderri. Ngaye nawu djal mulewam bu kunmekbekenh ngudda kanngehke ngadberre. Ngudda Yawey nawu yiburrbun bu minj ngaye ngawokngurdmeninj, dja bonj, ngaye djalmulewan. 10Ngaye minj ngawarlkkayinj manbu kunwok manmak ngudda ke kore kukange ngardduk. Ngaye ngabenmarneyime nawu ngarridjalwern bininj ngarrimirndemornnamerrinj ba bu ngudda kanmarnebengmidjdan kunwarre ngadberre, nawu kanngehke. Ngudda nawu kandjalmarnedjare dja mak minj kanbawon ngadberre dja munguyh. Mahni rowk ngayolyolmeng bedberre bininj. Ngaye minj ngabenmarnewarlkkayi mahni kunwok manbu ngudda ke.”
11“Ngudda Yawey, kankongibu nawu ngudda kanmarnedjare, dja yuwn bu kanbawon. Ngudda nawu kanmarnedjare dja mak yidjalkurduyime kore yingan yiwokkurrmerrinj, wanjh kunmekbekenh kunu ngaye kanngehkeng. 12Bolkkime manbu kunyid manwern kawernmerren ngardduk. Dja kunwarre ngardduk wanjh wernmerrinj, warridj ngannjilngwarrewon, yiman kayime kore nganyibebme, minj ngayawoyhbolknan. Ngaye ngadjalwernkangebarrhme dja mak ngakuyinjdowe.”
13“Ngudda Yawey, ngaye manjbun bu kanngehke, dja mak kanbidyikarrmen werrk. 14Bininj nawu kabirridjare bedda ngandibun, wanjh yibenmarnbu ba bu kabirriyemingalme djal kabirridjalbarabun. Dja bedda nawu kabirridjare ngandinjlingwarrewon, wanjh yibendjalmunkewemen ba bu bedda kabirrikelerlobmerren kunyemi dorrengh. 15Yikahwi bininj nawu ngandiborrkbun dja mak ngandidjekmiwon, wanjh ngadjare ngudda yibenngurdkemen.”
16“Bininj nawu ngudda ngundiyawan nakka wanjh yibenmarnbu ba bu kabirrinjilngmak. Bininj nawu ngudda ngundidjalmarnedjare, nawu yibenngehkeng, ngaye ngadjare bedda kunu kabirrihdjalyime munguyh, ‘Nawu Yawey Nadjalwernhkimuk Duninjh!’ 17Ngaye nawu ngadjalmarladj dja mak ngayawarren. Ngudda nawu God ngardduk, yidjalwernhwohrnan duninjh, dja bonj, ngudda kanburrbun! Ngudda yidjalkudji nawu kanbidyikarrme dja mak nawu kanngehke. Mah, werrknin kanngehkemen!”
Did you know?
Deliverance, Obedience, and Prayer for Help
- Psalm 40 combines thanksgiving for past rescue with an urgent plea for help. It begins by celebrating deliverance from a pit of despair and miry clay, but later transitions into a prayer for protection against surrounding troubles and adversaries.Sources: the Bible text itself
- The text stresses that inner devotion and obedience are valued above ritual sacrifices. The psalmist declares that God did not require burnt or sin offerings, but rather a willing servant who delights in doing divine will with the law written within the heart.Sources: the Bible text itself
- The author repeatedly highlights the duty of public testimony before the great assembly. Rather than keeping divine faithfulness, righteousness, and loving devotion private, the psalmist speaks openly to the gathered community.Sources: the Bible text itself
Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.
Credits and license for this translation
God Nuye Kunwok The Holy Bible in the Kunwinjku language of Australia copyright © 2018 Bible Society of Australia Language: Kunwinjku (Gunwinggu) This translation is made available to you under the terms of the Creative Commons Attribution-Noncommercial-No Derivatives license 4.0. You may share and redistribute this Bible translation or extracts from it in any format, provided that: You include the above copyright and source information. You do not sell this work for a profit. You do not change any of the words or punctuation of the Scriptures. Pictures included with Scriptures and other documents on this site are licensed just for use with those Scriptures and documents. For other uses, please contact the respective copyright owners. 2026-04-02
Source: http://ebible.org/gup/ · eBible.org