Nations Bible

Matthew 9

Enga New Testament (2023 Edition) · Tap a verse to see its cross-references.

Akali Papa Tambutae Mende Tolasiamo Doko

1Jisasa sipi dokonya pyakalyetala, endaki pete omotena, baanya siti dokonya pea. 2Pateamopa, akali mendapuame akali papa tambutae mende lapa toko dokonya soo baa katea dokonya epeami. Dokopa akali dokaitame tungi piamino doko Jisasame kandatala, papa tambutae doko lamaiyoo, “Nambanya ikiningi, embanya koo dupa kunao nepatae kalyenona, emba mona kenda nakaeyape” lea. 3Dopa leamopa, Mosesanya loo mana nyepae mendapuame nyakama-lapo lao pituu, “Akali dakeme Gote anda-anda semaiya naeyao lelyamona” leami. 4Dopa lao masoo leamino dupa Jisasame kandatala dokaita lamaiyoo, “Aipuma nyakamanya moname koo dopale dupa masilyami? 5Pii dalaponya anduku mee petala lapenge? ‘Embanya koo dupa kunao nepatae kalyenona’ lapenge dokope, pande, ‘Emba sakatatala kaita pae’ lapenge doko? 6Akalinya Ikiningi dokome isa yuu dakenya katao, endakalinya koo dupa kunao nepenge kyeto doko baa-kisa singi-lamo lao kanjepalena” lea. Dopa latala baame akali papa tambutae doko lamaiyoo, “Emba sakatatala, embanya lapa toko doko nyoo soo andaka puu” lea. 7Dopa leamopa akali doko sakatatala andaka pea. 8Dopa piamo doko endakali kambu piami dupame kandatala, kyeto dopale dupa Goteme endakali dupa maiya-lamo lao walu lao paka kaeyapala, Gote mambo piami.

Matyu Wii Lao Nyiamo Doko

9Jisasa baa yuu doko yakinatala pao pituu, akali Matyu lenge mende, takisa nyingi anda dokonya peteamo kandatala baa lamaiyoo, “Emba namba watao ipu” lea. Dokopa baa sakatatala Jisasa watao pea. Matyuame takisa nyoo pilyamo. (Matyu 9:9)|alt="tax collector sitting at table, man paying taxes" src="LB00309B.TIF" size="col" loc="9:9" copy="Louise Bass © The British & Foreign Bible Society, 1994." ref="9:9"

10Maitakao Jisasa baanya disaipolo dupa-pipa Matyuanya andaka nee nao peteaminopa, dokonya takisa nyingipi, koo pingipi longo mendapu ipupala, apata nee nao peteami. 11Peteaminopa Parasi dupame kandatala, Jisasanya disaipolo dupa lamaiyoo, “Nyakamanya mana lenge doko aipuma takisa nyingipi, koo pingipi dupa-pipa nee nao pilyape?” leami. 12Pii leamino doko sepala Jisasame dokaita lamaiyoo, “Endakali yaina napingi dupa dokosa yangyala naenge. Endakali yaina pyapae dupa dokosa yangingi. 13‘Endakali dupame kundi iki dimi laka lao masala naelyo. Endakali dupa kondo kaeyami laka lao masilyona’ lapae singi dokonya tenge doko nyakamame pupala mana nyalapape. Nambame endakali tolatae dupa wii lao nyalanya naepeo. Endakali koo pingi dupa mona kapilyina lao, wii lao nyalanya epeona” lea.

Loma Soo Nee Nanao Katenge Dokonya Tipa Piamino Doko

14Gii dokopa Jonenya disaipolo dupa Jisasa katea dokonya ipupala baa lamaiyoo, “Naimapi, Parasipi dupame paa longosa loma soo nee nanao katengena, embanya disaipolo dupame aipuma dopa napingimape?” leami. 15Dopa leaminopa Jisasame dokaita lamaiyoo, “Akali mende enda kelyapala watapae pyao, baanya tata dupa-pipa kalyamo gii dokopa, baanya tata dupame ee lao katengemape? Gii doko palitamopa, akali enda kelyenge doko nyoo patataminopa, baanya tata dupame loma soo nee nanao katatami. 16Yonge pee atingi mende tii telyamopa, lapalapa kangupae enenge mendeme kii pimbala naenge. Kii pimbatamino doko, enenge doko inungunyeta dokome, atingi doko etete kanguu koeyaseta. 17Endakali dupame waene enenge kamuu penge meme yanungimi wasepae atingi mendenya pyandala naengema. Kamuu pyandatamino doko, penge doko kanguu koeyasetamopa, waene dupa kai lao pata. Waene enenge doko penge enengenyaka kamuu pisilyaminopa, waenepa, pengepa dolapo lapota koeyala naengena” lea.

Isingi Akali Mendenya Wanenge Sakatasiamo Doko

18Jisasame pii dutupa lamaiyoo kateamopa, isingi akali mende Jisasa katea dokonya ipao luma lakapala, baa lamaiyoo, “Nambanya wanenge doko epapu kumatelyamona, embame baa-kisa kingi setateno doko, baa lenge talapomona, kingi setala ipupoko” lea. 19Dopa leamopa Jisasa sakatatala, baanya disaipolo dupa-pipa akali doko watao peami. 20Dokopa enda mende yuu gii dii lao andaka nao paliu, ee kana 12 pitaka petenge dokome, Jisasanya yonge peenya iki watandatopa, baanya yaina doko etalapomona lao masia. Dopa lao masetala, Jisasanya maita-kaita ipupala, Jisasanya yonge pee punanya kingimi watandea. 22Dokopa Jisasa kapilyetala, enda doko kandatala baa lamaiyoo, “Wanenge, embame namba tungi pyapi dokome, embanya yaina doko etelyamona, emba mona kenda nakaeyape” lea. Dopa lea gii dokopaka, enda dokonya yaina doko etea. 23Dokopa isingi akali dokonya andaka Jisasa pao kolandatala kandeamopa, endakali mendapu kumanda pituu pulupapu pyao ee wee leaminopa, endakali kambu pyao peteami dupa yamataka lao ee leami. 24Ee leaminopa baame dokaita lamaiyoo, “Wanaku doko kumala naeyalamo. Baa luu palelyamona, nyakama pupa” lea. Dopa leamopa, endakali dupame baa lamba lao gii kaeyami. 25Dokopa Jisasame endakali kambu doko kamaka watao pyalyetala, baa wanaku kumapae doko sia dokonya pea. Pupala wanaku doko kinginya minao sakatasiamopa, baa sakatea. 26Dopa pia dokonya atome doko yuu makisa singi dupa pitakanya lao taeyami.

Lenge Monda Mendalaponya Lenge Auu Pisakamaiyamo Doko

27Jisasa yuu doko yakinatala peamopa, akali lenge monda mendalapome wii lao, “Dapita Ikiningi, embame nalimba kondo kaeyapoko!” lao baa watao peambi. 28Jisasa andaka kolandatala peteamopa, lenge monda dolapo baa petea dokonya epeambi. Epeambinopa Jisasame dolapo lamaiyoo, “Nyakamba nambame yaka nisalapenona lao masilyambipi?” lea. Dopa leamopa dolapome baa lamaiyoo, “Kamongo, embame kiningi nalimba nisalapenona” leambi. 29Dokopa Jisasame akali dolaponya lengenya watandatala lamaiyoo, “Nyakambame namba tungi pilyambino dokonya, nyakambanya masilyambinoli pilyamona” lea. 30Dopa leamopa akali dolaponya lenge dolapo auu pyoo teambi. Dokopa Jisasame akali dolapo kyeto joo lamaiyoo, “Nyakamba-kisa pilyamo dake endakali waka mendeme setana, lamaiya naeyalapape” lea. 31Dopaka doko, Jisasame pia dupa pitaka akali dolapome yuu makisa singi dupa pitakanya lao taeyambi. Jisasame akali lapomanya lenge auu pisakamailyamo. (Matyu 9:29-30)|alt="Jesus heals two blind men inside house, no other people" src="LB00312B.TIF" size="col" loc="9:29-30" copy="Louise Bass © The British & Foreign Bible Society, 1994." ref="9:29-30"

Muumaa Mende Nisiamo Doko

32Akali dolapo peambinopa, endakali mendapuame imambu koo paleta, akali muumaa mende laminao Jisasa katea dokonya epeami. 33Ipateaminopa, akali doko-kisa imambu koo palea doko Jisasame watao pyateamopa, muumaa doko pii lea. Pii leamopa, endakali kambu piami dupa walu latala lao pituu, “Israele yuu dakenya yuu mendaipi mende kalai dapale mende nakandeamana” leami. 34Dopaka doko, Parasi dupame lao pituu, “Imambu koo dupanya isingi dokonya pupu lapae dokome imambu koo dupa baame watao pilyamona” leami.

Endakali Dupa Kondo Kaeyamo Doko

35Jisasame sitipi, yuu yakanepi dupa pitakanya paeyao, dokaitanya lotuu anda dupanya mana lamaita, kingdom kaiti-kisa singi dokonya lao wai pii epe doko lamaita pia. Dokopa endakali yaina tata waka-waka dupame pyapae dupa pitaka baame mee jeta pyakamaiya. 36Sipisipi setao katenge mende daa jilyamopa, sipisipi dupa nisepae nanyepala kenda soo katengemali pyoo, endakali kambu dupa kenda soo kateamino kandatala, Jisasame dokaita kondo kaeya. 37Kondo kaeyapala baanya disaipolo dupa lamaiyoo, “Nee longo wambu petamupa, kalai akali kuki kalyamino. 38Dopana, nee mandyoo mau pyapenge kalai akali mendapu peena lao, ee tange Kamongo doko kyeto joo loma salapape” lea.

Artistic illustration — an interpretation, not a historical record.

Did you know?

Mercy, Healing, and New Wine

  • Matthew, son of Alphaeus, was a publican, or tax collector, at Capernaum. Jesus, coming up from the side of the lake, passed the custom-house where Matthew sat and said, “Follow me.” He had formerly been known as Levi; that same day he gave a great feast, described as a farewell, for Jesus, the disciples, and probably many of his old associates.Sources: Matthew · the Bible text itself
  • Those who ask why they and the Pharisees fast so often, while Jesus’ disciples do not, are disciples of John the Baptist. John is called the forerunner; he was of priestly descent, his father Zacharias a priest of the course of Abia and his mother Elisabeth one of the daughters of Aaron.Sources: John the Baptist · the Bible text itself
  • One chronology places the healing of the paralyzed man, the call of Matthew, the question about fasting, and the parable of the wineskins in AD 28.Sources: Healing the Man with Palsy · Jesus Calls Matthew · Fasting Question · Parable of the Winseskins

Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.

Places in this chapter

  • Sea of Galilee · 32.819, 35.590 · verse 1

Only places identified with high confidence are shown (90% or more according to the scholarly sources compiled by OpenBible). Period map: DARE (Digital Atlas of the Roman Empire), CC BY 4.0; modern map: © OpenStreetMap contributors; places: OpenBible.info (CC BY 4.0).

Credits and license for this translation
Enga New Testament (2023 Edition)
The New Testament in the Enga language of Papua New Guinea, 2023 Version
Enga Baibolo Epapu Kapilyetae Doko
Nupela Testamen long tokples Enga long Niugini
copyright © 2014-2023 Wycliffe Bible Translators, Inc.
℗ Wycliffe Bible Translators, Inc.
Language: Enga
Dialect: Kaina (Central)
Translation by: Wycliffe Bible Translators
This translation is made available to you under the terms of the
Creative Commons Attribution-Noncommercial-No Derivatives license 4.0.
You may share and redistribute this Bible translation or extracts from it in any format, provided that:
You include the above copyright and source information.
You do not sell this work for a profit.
You do not change any of the words or punctuation of the Scriptures.
Pictures included with Scriptures and other documents on this site are licensed just for use with those Scriptures and documents.
For other uses, please contact the respective copyright owners.
2023-09-13

Source: http://png.bible/enq2/ · eBible.org

Talk to us

Tell us where you read from, how the Bible has helped you, or what we could improve. We read every message.