Nations Bible

Matthew 6

Enga New Testament (2023 Edition) · Tap a verse to see its cross-references.

Daa Jepae Dupa Nisingi Dokonya Leamo Doko

1Jisasame lao pituu, “Endakali dupame kandena lao nyakamame endakali tipya dupa panao maitamino doko, nyakamanya Takange kaiti-kisa katenge dokome nyakama yole mende nanditana, kandao kalyepape. 2Mana tolatae miningi manemane pingima endakali dupame nyakama lalyimili lao masetala, lotuu andapi, taononya kaitini yakanepi, dupanya endakali daa jepae dupa panao maingima. Nambame nyakama kiningi langilyo: Dopa pingima endakali dupame nyakamanya yole doko nyepelyaminona, embame dopa napipi. 3Embame endakali daa jepae dupa kingi tolaetename maiyoo pituu, kingi koeyatename nakandena lao yalo pyoo maipi. Dopa pitinopa, yalo pyoo pingi dupa kandenge, embanya Takange dokome emba yole mende panao ditana” lea.

Loma Mana Lamaiyamo Doko

5“Embame loma sete gii dokopa, endakali mana tolatae miningi manemane pingima dupame loma singimali pyoo sala naeyape. Dupame lotuu andapi, taononya kaitini kembopi dupanya katao, endakali dupame kandena lao loma simu laka lao masingima. Nambame nyakama kiningi langilyo: Dopa pingima endakali dupanya yole dupa nyepelyamino. 6Dopana, embame loma salanya, embanya palenge panda dokonya pupala, kaita pai lape. Dopa petala, embanya Takange yalo pyoo katenge doko loma sepe. Dopa pitinopa, yalo pyoo pingi dupa kandenge, embanya Takange dokome emba yole mende panao dita.

7“Akali tata waka dupame loma londe pyoo silyami dokonya, dokaitanya gote dupame sekelyaminona lao masetala, loma soo pituu pii lelyami dutupaka lati singima. Dopa pingimana, nyakamame loma soo pituu dopa napyepape. 8Nyakamame tee laa naelyaminopa, nyakamanya Takange dokome nyakama daa jilyamo dupa masingina, akali tata waka dupame loma singimali pyoo nyakamame loma sala naeyalapape. 9Nyakamame dapa lao loma salapape: Naimanya Takange kaiti-kisa katenge, embanya kenge doko auu pyoo lapa lape. 10Embanya kingdom doko epena lape. Kaiti-kisa embanya masingili pingima, dopaka pyoo isa yuu dakenya pyepa lape. 11Indupa napenge nee dupa embame naima dipi. 12Naima koo pingilyamino dupanya yanu dupa kaelyamanona, embame naimanya koo dupanya yanu dupa kaeyakape. 13Koo pyepale lao makande pingi dupanya naima laminao napupi. Koo akali dokonya kinginya embame naima pyoo nyepe. Kingdom dokopi, kyeto dokopi, tii pipae dokopi, dutupa tanga-tangapi embanyaka. Doko kiningi. 14Nyakamame endakali dupanya koo dupa kame sakamaitamino doko, nyakamanya Takange kaiti-kisa katenge dokome nyakamanya koo dupa kame sakataka. 15Nyakamame endakali dupanya koo dupa kame sakamaiya naeyatamino doko, nyakamanya Takange dokome nyakamanya koo dupa kame sakala naeyatakana” lea.

Loma Soo Nee Nanao Katenge Dokonya Leamo Doko

16“Nyakamame loma soo nee nanao katao, mana tolatae miningi manemane pingima dupame pingimali pyoo, enomba kumala naeyalapape. Dokaita nee nanao kalyamini-lamo lao endakali dupame kandena lao, dokaita enomba kumapae paengema. Dopa pingima endakali dupame nyakamanya yole doko nyepelyaminona lao nambame nyakama kiningi langilyo. 17Emba loma soo nee nanao katatenopa, emba nee nanao kalyenona lao endakali waka dupame nakandenya, embanya Takange yalo pyoo katenge dokome iki kandena lao, embanya aiyomba weleme kai pyatala, embanya lenge-lyaapi wasa pyatala katape. Dopa pitinopa, yalo pyoo pingi dupa kandenge, embanya Takange dokome emba yole mende ditana” lea.

Oapi Epe Dupa Kaiti-Kisa Setenge Dokonya Leamo Doko

19“Isa yuu dakenya oapi epe setelyamino dupa neneme nao koeyasingi. Dupa kaa tao koengeaka. Pake nenge dupame anda kalupala pake nyingimakana, nyakamanya oapi epe dupa isa yuu dakenya setala naeyalapape. 20Kaiti-kisa oapi epe setelyamino dupa neneme nao koeyasala naenge. Dupa kaa tao koeyala naengeaka. Pake nenge dupame anda kalupala pake nanyingimakana, nyakamanya oapi epe dupa kaiti-kisa setalapape. 21Nyakamanya oapi epe dupa setenge panda dokonyaka nyakamanya mona yukuu setengemana” lea.

Lenge Doko Yongenya Lama Dokona Leamo Doko

22“Lenge doko yongenya lama doko. Emba lenge mendai iki tao katateno doko, embanya yonge doko pitaka tii pipaeme tumbatamopa katate. 23Dopaka doko, emba lenge lapo tao katateno doko, embanya yonge doko pitaka iminjetaeme tumbatamopa katate. Emba-kisa tii pipae silyamo lao sekelyeno doko angi iminjetae-tamo doko, iminjetae doko etete andake mende setana” lea.

Kamongo Lapomanya Kalai Pyakamaiya Naeyapengena Leamo Doko

24“Endakali mendeme kamongo lapomanya kalai pyakamaiya naeyapenge. Lapomanya kalai pyakamaitamo doko, baame mende doko maka kaeyapala, mende doko auu kaeyata. Daa-tamo doko, mende doko mona setapala, mende doko maka kaeyata. Dopana, nyakamame Gotepa, munipa dolapo lapotanya kalai pyakamaiya naeyapengena” lea.

Auu Pyoo Katapuli Lao Masingi Dokonya Leamo Doko

25“Tenge dokonya nambame nyakama dapa langilyo: Nyakama auu pyoo katamana lao masetala, nyakamame neepi, endakipi dupa anja-tae namanape, yonge pee anja-tae pimanape lao masepae longo nyala naeyalapape. Lete katenge doko nee nenge dopale daa. Yonge doko yonge pee pingi dopale daaka. 26Nyakamame yaka ketae paenge dupa kanjepape. Dupame ee pokala naengema. Dupame nee mandyoo setenge anda dupanya nee nyoo setala naengemaka. Dopaka doko, nyakamanya Takange kaiti-kisa katenge dokome dupa nee maingi. Nyakamame yaka dupa ita minao kalya naelyamipi? 27Nyakamanya mendeme auu pyoo katapuli lao masepae longo nyete dokome, embanya lete katenge dokonya yuu gii mendai waipa setepe? 28Aipuma nyakamame yonge pee anja-tae pimanape lao masepae longo nyilyami? Eenya palao dii dupa dopa pyoo andengena lao masalapape. Dupame kalai mende napingima. Yonge peepi mende wasala naengemaka. 29Dopaka doko, Solomoneme baanya yati tata epe dupa pitakame yati pia dupanya, palao dii auu pilyamo dopale mendeme baa yati napiana lao nambame nyakama langilyo. 30Palao taita kepao yangapenge, indupa dii pilyamo dupa Goteme yati pisingi. Dopa pingina, yongenya pipenge dupa Goteme nyakama ditana, aipuma nyakamame baa kuki tungi pilyami? 31Nyakamame neepi, endakipi dupa anja-tae namanape, yonge pee anja-tae pimanape lao masepae longo nyala naeyalapape. 32Akali tata waka dupame dopale dupa kutingima. Dopaka doko, nyakamanya Takange kaiti-kisa katenge dokome nyakama daa jilyamo dupa pitaka kandenge. 33Dopana, nyakamame Gotenya kingdom dokopa, baanya mana tolatae dokopa, dolapo wambao kutalapape. Dopa pitaminopa, nyakama nyepenge dupa pitaka baame dita.

34“Nyakamame taitanya lao masepae longo nyala naeyalapape. Taita kenda ipata dupa taita sepenge. Indupa kenda ipata dupa indupaka sepengena” Jisasame lea.

Artistic illustration — an interpretation, not a historical record.

Did you know?

Secret righteousness and trust

  • This chapter is part of the Sermon on the Mount. An event listing dates that sermon to AD 28 and records it as lasting one day.Sources: Sermon on the Mount · the Bible text itself
  • Jesus says not to sound a trumpet in the synagogues and streets when giving to the needy, as the hypocrites do in order to be honored. He also warns against praying on street corners to be seen and against fasting with a disfigured face; instead, he describes praying in an inner room with the door shut, and fasting with an anointed head and a washed face.Sources: the Bible text itself
  • Jesus says that not even Solomon in all his glory was adorned like one of the lilies of the field. A dictionary entry explains that his Hebrew name, Shelomoh, means “Peaceful,” that he was David’s son by Bathsheba, and that Nathan called him Jedidiah, “beloved of the Lord”; his reign is recorded in 1 Kings 1–11 and 2 Chronicles 1–9.Sources: the Bible text itself · Solomon

Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.

Credits and license for this translation
Enga New Testament (2023 Edition)
The New Testament in the Enga language of Papua New Guinea, 2023 Version
Enga Baibolo Epapu Kapilyetae Doko
Nupela Testamen long tokples Enga long Niugini
copyright © 2014-2023 Wycliffe Bible Translators, Inc.
℗ Wycliffe Bible Translators, Inc.
Language: Enga
Dialect: Kaina (Central)
Translation by: Wycliffe Bible Translators
This translation is made available to you under the terms of the
Creative Commons Attribution-Noncommercial-No Derivatives license 4.0.
You may share and redistribute this Bible translation or extracts from it in any format, provided that:
You include the above copyright and source information.
You do not sell this work for a profit.
You do not change any of the words or punctuation of the Scriptures.
Pictures included with Scriptures and other documents on this site are licensed just for use with those Scriptures and documents.
For other uses, please contact the respective copyright owners.
2023-09-13

Source: http://png.bible/enq2/ · eBible.org

Talk to us

Tell us where you read from, how the Bible has helped you, or what we could improve. We read every message.