Nations Bible

1 Samuel 2

Nyanyapa Arrku Gun-nika Gun-molamola Janguny: Minypa Jesus Christ Guna-ganyja Arrburrwa Gun-geka Rum · Tap a verse to see its cross-references.

Yana Jiny-marrkapchinga Nula Wangarr

1Yana a-wengganana Wangarr, jiny-yinagata nula, “Ngaypa burr-guya ngu-marrkapchinga nula Wangarr, ngu-molamola ngu-nirra ngardawa nipa nyanma! Ngaypa ng-gurdachinga burrwa aburr-ngaypa aburr-bachirra apula! Ngu-worlworlchinga ngardawa Wangarr a-gunggajinga apula!

2Gala ana-nga an-molamola warrpam minypa nipa Waykin A-nirra. Gala ana-nga an-nerranga minypa nipa, gala ana-nga jaga a-ganana arrburrwa minypa an-ngayburrpa Wangarr.

3Ganapa wana nyiburr-negiya. Ganapa gun-bachirra buburr-wengga. Wurra nipa Wangarr marn.gi ana-gorrburrwa nyiburr-yinagatiya nyiburr-nirra rrapa a-yinmiya barra ana-gorrburrwa.

4An-gata mardakarrich mun-nigipa bunarra mu-rrumiya nula, wurra an-gata an-nyarlkuch nipa gugu an-derta a-nirra a-bamburda.

5Aburr-gata aburr-nga balaja mbi-barra, aburr-durtchinga aburr-workiyana, birripa gugu balaja mu-marr jama aburr-jirra barra mbi-ma. Wurra aburr-gata aburr-werrmiyana aburr-workiyana, birripa gala aburr-yinmiya barrwa aburr-werrmiya. Rrapa jin-gata mu-ngoyurra jin-nyagara gipa burr-menga gu-ngarda yerrcha abirri-jirrapa abirri-jirrapa abirri-jirrapa an-ngardapa. Wurra jin-gata mu-ngoyurra bin-dimarra, aburr-yigipa gu-ngarda yerrcha gipa gugu gun-nyagara, rrapa nipa wargugu jinyu-nirra.

6Nipa an-gata Wangarr mardakarrich rrapa mola wanngu an-gunega. Nipa wupa nyanma gu-borrwuja rrapa an-gugaliya a-juwiya a-workiya, rrapa barrwa nipa wupa a-jarrkarraja.

7Nipa Wangarr an-nerranga an-gugaliya gerra an-nyagara a-nenga, rrapa an-nerranga an-gugaliya nipa Wangarr a-wucha a-workiya gerra gun-jaranga nula. Nipiya Wangarr an-gugaliya gun-nga nula an-delipa a-nenga a-workiya, rrapa gu-werranga wana a-nenga a-workiya.

8Aburr-gata aburr-nyagara gerra, birripa minypa wargugu aburr-nirra minypa gun-nerra gu-nirra burrwa gu-workiya. Wurra Wangarr a-gunggajinga burrwa a-workiya, gu-molamola burr-barnjinga a-workiya, aburr-nirra aburr-workiya wugupa burrwa bunggawa yerrcha. Ngardawa gun-guniya rrawa Wangarr gun-nika rrapa nipa gu-jarlapuna.

9Nipa jaga a-ganaja burrwa aburr-gata marr aburr-balcharra nula, wurra aburr-gata gala marr aburr-balcha nula, birripa an-munya gu-maya barra aburr-ni. Ngardawa an-gugaliya gala a-yinmiya nipa wupa nyanma an-molamola a-ninya.

10Wangarr burr-yika aburr-bachirra nula birripa aburr-juwa barra. Nipa minypa maykarran a-wengga barra burrwa. Nguburr-gurdiya warlaman gun-nardiya rrawa mirrka ngubu-barnja barra nula, nuwurra nipa a-yinmiya barra arrburrwa. Rrapa Wangarr an-nika nipa arr-wuna an-ngayburrpa Bunggawa, nipa rrapa wana an-babalapa a-ni barra.”.

Jiny-yinagata jiny-yena Yana. 11Ganapiya, lika Yilkána rrapa abirriny-yigipa abirriny-gumarrbipa nuya rrapa aburr-werranga aburr-yigipa gu-ngarda yerrcha aburr-jekarra Rama, wurra nipa Jemyul gata a-ni Jaylow. Nipa jama a-ji nula a-workiyana Waykin A-nirra, rrapa an-gata Yilay an-nigipa marn.gi an-gunega.

Yilay Bijirri-yika Walkurpa Yerrcha

12Abirri-guna Yilay bijirri-bokamurra, bitipa abirri-werra, gala mola abirri-borrwujarna Wangarr. 13Gun-birripa gun-guwarr an-guna junggay an-guyinda, minypa wurra gama gorlk aburr-boya gurda aburr-workiya, minyjak jibi-yalpurda nula Waykin A-nirra, rrapa an-gata junggay an-nika an-mujama ana-boy nipa jin-gata jin-garla jiny-bongbongja jiny-ji, rrapa minypa murna a-jirra ana-guyinda gulinga ana-ga, rrapa ana-ngardapa ana-goma a-garra wupa japalana ana-guyinda, ganapiya. Gun-gata jin-nga nipa gulinga ana-guyinda jina-ga ana-warrcha, nipa jin-gata wupa junggay jin-nika jin-garla. Birripa junggay yerrcha aburr-yinagata jin-garla jibu-menga aburr-workiyana wolawola aburr-guna Yichrayal yerrcha yi-gata aburr-bona aburr-workiyana Jaylow. 15Wurra abirri-guna Yilay bijirri-bokamurra junggay yerrcha, mu-ngoyurra burlurla gala mu-rronggarnapa wurra an-bitipa an-mujama nipa ana-bona ana-workiyana, a-wena nula an-gata ana-nga mu-yalpuna, a-yinagata nula, “Ny-yu barra jin-garla an-guna junggay barra nipa gu-bol jiny-yalpa. Nipa gala jal a-ni jiny-bay bugula gu-guyinda jin-donga, wurra jin-jurrkurda jal a-nirra barra nipa gu-bol jiny-yalpa.” 16Rrapa minyja an-gugaliya a-yinanga a-wena, “Burdak bawa, burlurla mu-ngoyurra mu-rro barra, ngardawa mun-japurra Waykin A-nirra mun-nika, lika nuwurra jin-garla ny-ma jiny-yinmiyapa nginyipa jal nyi-ni,” wurra nipa a-yinagata, “Ngika! Gun-nardiya nguna-wupa! Wurra minyja gun-nyagara, ngaypa barra ngiy-gaypa.”

17Abirri-yinagata Yilay bijirri-yika walkurpa yerrcha werra abirri-negiyana nula abirri-workiyana Wangarr. Minypa gun-gata wurra gama gorlk jin-garla jibi-yalpuna nula aburr-workiyana, wurra bitipa abirri-gata gun-nerra gubirri-negarra abirri-workiyana.

Jemyul A-barrngumurra A-workiyana Mun-japurra Mirikal

18Gun-gatiya Jemyul jama a-ji nula a-workiyana Wangarr, nipa a-barrngumurra a-workiyana mun-japurra mirikal linan (linen) mbi-jarlapuna. Rrapa jemberr gu-ni gu-workiyana, Yilkána birripa aburr-bona gurda aburr-workiyana, balaja rrapa minyjak abu-wuna aburr-workiyana Wangarr, rrapa nipa Yana mirikal muna-ganyja nula jina-workiyana Jemyul mun-nika nipa mu-rracha nula. 20Rrapa nipa Yilay a-japurrmayana burrinyjula a-workiyana Yilkána rrapa Yana, rrapa a-wena nula a-workiyana Yilkána, a-yinanga nula, “Wangarr biy-wu barra, gu-ngarda yerrcha barra jin-guna burr-ma nggula, minypa an-nginyipa walkur nginyipa ny-yuna Wangarr.” A-yinagata nula a-workiyana, lika aburr-jekarra aburr-workiyana rrawa.

21Rrapa Wangarr a-gunggajinga achila Yana, nipa burr-menga nula Yilkána abirri-jirrapa rrapa an-ngardapa mu-wurra yerrcha rrapa abirriny-jirrapa mu-gama yerrcha. Rrapa Jemyul wana a-ni a-bamuna gatiya Wangarr gun-nika bala nipa jama a-ji a-workiyana.

Yilay Gelama Gelama Bijirri-barra Abirri-yigipa Walkurpa Yerrcha

22Yilay nipa gugu bama a-ngarlchinga rrapa a-nyarlchinga a-bamuna, rrapa nipa a-galiyana nipa bijirri-bokamunga abirri-yinmiyana burrwa Yichrayal aburr-bapurrurr, rrapa abirri-yinmiyana mu-gama yerrcha burrbu-menga, burrbu-malapuna aburr-yu aburr-gatiya gatiya jama aburr-ji aburr-workiyana bala gu-ngana Wangarr gun-nika gun-japurra. 23Rrapa nipa a-yinagata butula, “An-nga nula nyirri-yinagata nyirri-workiya? Ngardawa wurra gama gorlk nyirrbu-ngurrjinga rrapa janguny guna-jeknga, ngaypa ng-galiyarra ana-gotula gun-nerra jama nyirri-jirra burrwa nyirri-workiya. 24Wurra walkur yerrcha, gun-narda birri-bawa! Ngardawa gun-gata ng-galiyarra ngu-workiya Wangarr burr-yika nyirrbu-yopurda aburr-workiya gun-narda gun-nerra warrpam. 25Minyja an-gugaliya werra a-nega an-nerranga an-gugaliya, Wangarr barra a-gunggaja nula, wurra minyja ana-gugaliya werra a-nega Wangarr, ana-nga barra a-gunggaja nula an-gata an-gugaliya?” A-yinagata Yilay a-wena butula abirri-yigipa walkurpa yerrcha, wurra bitipa gala abirri-galiyarna nula, ngardawa Wangarr gu-borrwurra nipa barra bijirri-bu.

26Wurra nipa an-gata Jemyul wana a-ni a-bamuna, rrapa jal aburr-ni nula gu-galiya yerrcha rrapa Wangarr.

Janguny Burrwa Yilay Aburr-baparrurr

27Rrapa an-ngardapa an-gata Wangarr gun-nika janguny gu-ngurrjinga a-workiyana, nipa a-bena nula Yilay, a-yinagata nula, “Wangarr guna-jerrmarra nggula janguny minypa gun-guna: Nipa a-yinagata, ‘Ngaypa ngu-bena burrwa nyanyapa nggu jungurdapa nggu an-guyinda gun-gata rrawa Yijipt (Egypt) aburr-ni aburr-mujama burrwa Beruw (Pharoah) birripa. 28Minypa ana-goyburrpa Yichrayal yerrcha nyiburr-jaranga nyiburr-baparrurr, wurra ngaypa ngu-menga an-nginyipa mu-ngoyurra an-guyinda Eyran (Aaron) ana-goyburrpa baparrurr, nipa barra junggay a-ni apula a-workiya. Minypa nipa a-bona a-workiyana, gun-ngaypa belabila gu-guyinda minyjak jiny-yalpuna apula a-workiyana, rrapa mun-molamola mu-ngolkuja burr-guta mu-yalpuna apula, rrapa mun-japurra mirikal a-barrngumurra a-workiyana rrapa nguna-wengganana a-workiyana. Rrapa ngaypa ngu-wuna, nyanyapa nggu jungurdapa nggu an-guyinda jiny-barra a-workiyana jin-nerranga minyjak jin-gata birripa Yichrayal yerrcha ngunabu-wucha aburr-workiya. 29Wurra ny-jurda nginyipa, an-nga nula jurrkjurrk nyi-nirra aburr-guna Yichrayal yerrcha ngunabu-wucha aburr-workiya ngaypa gipa ngu-barnjinga burrwa joborr? An-nga nula ny-yagurrmunga butula ny-yorkiya abirri-nginyipa walkur? Yama nyiburr-gurkujarna apula? Wurra burlurla jin-dimanga ana-goyburrpa ngunabu-gaypurda nyiburr-workiya jin-garla aburr-ngaypa gu-galiya yerrcha Yichrayal yerrcha ngunabu-wucha aburr-workiya.’

30“Ganapiya, lika an-gatiya Ay-ninyarrapa Ay-workiya Wangarr Yichrayal yerrcha an-birriya, nipa a-weya nggula a-nirra, a-yinaga, ‘Ngaypa gochila ngubirri-dana nyanyapa nggu jungardapa nggu, ana-goyburrpa nyiburr-baparrurr nyiburr-ngaypa nyiburr-mujama barra nyiburr-ni nyiburr-workiya, minypa ana-goyburrpa nyiburr-barrnguma gurda rrapa nyiburr-bengga nyiburr-workiya ngaypa ngu-mibilapa. Wurra gun-guniya gugu ngaypa ng-gunaga Wangarr ngu-weya nggula ngu-nirra, ngaypa gala mola ngu-yinmiya. Wurra jarra aburr-gata aburr-nga marr aburr-balcharra apula, ngaypa barra ngu-mola ngu-ni barra burrwa. Wurra aburr-gata ngoyurra aburr-yerryerrmiya apula, ngaypa barra nguburr-dalaja barra. 31Minyja galiya: Gun-guna gugu guna-bamburda ngaypa barra ngiy-bu barra nginyipa, rrapa aburr-nginyipa aburr-baparrurr burr-guta nguburr-bu barra. Minypa gala ana-nga barra bama a-ngarlcha nginyipa ny-baparrurr, wurra ngika wupa. 32Nginyipa barra wargugu nyi-ni barra rrapa ny-yerra nyi-ni barra, ngardawa aburr-werranga Yichrayal yerrcha ngaypa ng-gunggaja barra burrwa rrapa gun-molamola nguburr-wu barra, wurra nginyipa ny-baparrurr gala barra ana-nga bama a-ngarlcha barra. 33Rrapa ana-nga ana-gotipa nyirri-baparrurr ngaypa gala ngu-bu wurra burdak jama a-ji apula, wurpa lika nipa burr-guya a-rruwuja barra rrapa wargugu a-ni, ngardawa aburr-gata ana-goyburrpa nyiburr-baparrurr gu-mari aburr-juwapa barra aburr-workiya.

34“‘Minyjiya. Abirri-nginyipa walkurpa yerrcha Wopni rrapa Biniyach, bitipa gun-ngardapiya ngorrngurra abirri-juwa barra, barra nginyipa ny-borrwa gun-narda geka ngu-wena nggula gun-burral. 35Rrapa ngaypa ngu-jerrjerrjiya barra nula an-nerranga, nipa junggay a-ni barra apula rrapa gun-burral jama a-ji barra apula. Minypa gun-nga ngaypa jal ngu-ni nipa a-yirda barra jama a-ji. Rrapa ngaypa ngu-wu barra an-gata aburr-yigipa gu-galiya yerrcha, birripa barra gu-japurra aburr-barrnguma barra gurda aburr-workiya rrapa aburr-bengga barra aburr-workiya nipa ana-mibilapa bunggawa ngaypa ng-garrana. 36Rrapa an-gata ana-nga a-ni ana-gotipa nyirri-baparrurr, nipa barra a-ngiwija barra nula an-guna junggay ngaypa ngu-barnjinga, minypa a-ngiwija barra nula rrupiya o balaja o jama. Minypa a-yinda barra nula, “Japurra ngapa ny-jirra, a-lay! Ngaw minyja jama nguna-wu barra balaja ngu-bay!” ’” Ganapiya. Gun-narda wupa janguny gu-bena nula Yilay.

Artistic illustration — an interpretation, not a historical record.

Did you know?

Hannah's Song and the Priesthood at Shiloh

  • Eli's sons, Hophni and Phinehas, violated sanctuary customs by demanding raw meat before the fat was burned on the altar and by using a three-pronged fork to seize meat directly from the cooking pots. Their aggressive demands treated the Lord's sacrifices with contempt.Sources: the Bible text itself · Hophni · Phinehas
  • While serving before Eli at Shiloh, the young boy Samuel wore a linen ephod. Each year when his parents came to offer the annual sacrifice, his mother Hannah brought him a small robe she had made for him.Sources: the Bible text itself · Samuel · Hannah
  • A man of God announced judgment against the house of Eli for profaning the sacrifices and honoring his corrupt sons above God. The prophecy warned that Eli's priestly line would be cut short, marked by the sign that both Hophni and Phinehas would die on the same day.Sources: the Bible text itself · Eli · Hophni

Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.

Places in this chapter

  • Shiloh · Today: Khirbet Seilun · 32.056, 35.290 · verse 14
  • Egypt · 30.129, 31.308 · verse 27

Only places identified with high confidence are shown (90% or more according to the scholarly sources compiled by OpenBible). Period map: DARE (Digital Atlas of the Roman Empire), CC BY 4.0; modern map: © OpenStreetMap contributors; places: OpenBible.info (CC BY 4.0).

Credits and license for this translation
Nyanyapa Arrku Gun-nika Gun-molamola Janguny: Minypa Jesus Christ Guna-ganyja Arrburrwa Gun-geka Rum
The New Testament and portions of the Old Testament in the Burarra language of coastal Arnhem Land in Northern Australia
copyright © 2008-2023 Wycliffe Bible Translators
Language: Burarra
NT: 2008; OT portions: 2023
This translation is made available to you under the terms of the
Creative Commons Attribution-Noncommercial-No Derivatives license 4.0.
You may share and redistribute this Bible translation or extracts from it in any format, provided that:
You include the above copyright and source information.
You do not sell this work for a profit.
You do not change any of the words or punctuation of the Scriptures.
Pictures included with Scriptures and other documents on this site are licensed just for use with those Scriptures and documents.
For other uses, please contact the respective copyright owners.
2026-09-09

Source: http://ebible.org/bvr/ · eBible.org

Talk to us

Tell us where you read from, how the Bible has helped you, or what we could improve. We read every message.