Nations Bible

Proverbs 31

Fúka Moodaanaki Kira Ufa Afaqínaasa Ufa · Tap a verse to see its cross-references.

1Maa ufausa karaambaiqa Reemueerana anoofa qimaqoofa maridanoo.

2Anee qini didira qimaaku qinee aniara innaaru qiafana kambiqoonafa mariananoo. Qinee nana ufa fee ani qimamianauree.

3Sia aneenna afeeka aanaaseesaa taikaa. Sia aneenna munnimma aiqama aanaaseesaa taikaa. Anaaseeuqa karaambaiqauqa faqa narimaria ainainausa maridaqa.

4Reemueera maa ufana iria. Karaambaiqauqa sia uainna nammari naaqa. Sia afeeka nammariara indaandi qiaqa.

5Misa mina nammasee sandufa qaunifoora. Faiqí nimeemaanai oorudupiqa mariasa ufa sia irisee mandaikamma nimaqeefoora.

6Afeeka nammari faiqí qusasaa kuqifaninausa ainaina maridanoo. Firaa ummaaraki mariasa ainaina maridanoo.

7Kuqifandinausa amana namaseeqa narí kudikiranara aunuaqa. Misa namaseeqa noori runiranara aunuqaqa.

8Anee ufa qiranaki ufa mammaqi mariasa aneenna kai dadaaqi andeeqannisaa. Anee dadaaqirana siaisa ufa qiranaki dadaaqiaqa.

9Anee ufa qiranaki misa dadaaqira ufa qinana andeeqara rakisirafa marinnaranoo. Anee kudi fasiqauqa faqa ainaina siaisa faqa itita nimaqainaqa andeeqaranaki mariaqa.

10Amiqira anaasee andeeqara irirana faqaa anaasee mararafa kaaqa kadaapi maridanoo. Mina feefauru amiqira oonda faqa uraaqararafa kaaqa firaa feefauru maridanoo.

11Mina afaaqi irirafa mi aanaaseenasaa kai mundinoo marifanoo sia moo ainainara sarau iannoo.

12Mi anaaseefa mari kamuqoo narí afaaqi amiqi amiqi kaimma amaqaidanoo.

13Mi anaaseefa sipsipa asausinnai faqa amiqira sandannai faqa moomoo qamunna auqidanoo.

14Mi anaaseefa sipara foora nianaindaraa narana maree anidanoo.

15Kananaana eendai findinoo narí maaqaki mariasa narana suqasee narí ainainira maanaaqauqa auqee fandinna saikanara qimannimidanoo.

16Mi anaaseefa amiqira maqa qafamasee feefauridanoo. Narí ainaina nimisee maraqai munnimmanannai feefaurummaseenoo narí asaukunnai anukamasee adiafaa ira ainaina uainna ummaqidanoo.

17Mi anaaseefa oori minaki munduseenoo amudaanai qimasee ainainidanoo. Mifa afeeka anaasee kaaqa amudaanai qimarifa maridanoo.

18Mi anaaseefa narí ainainara anoona kai fee qidanoo. Qooma qumbiqaidanoo qeemarifanoo ainaininoo fifiifanoo eenda amuqusai munu taikaidanoo.

19Mi anaaseefa narí sanda sufuseenoo narí qamunna auqidanoo.

20Mi anaaseefa kudi fasiqauqa faqa ainaina siaisa faqa afaarinoo nimidanoo.

21Suara aaku aukuana mi anaaseefa faasai deedaqammaqaina asausi faqaa qamunna narí maaqaki mariasa aiqama nimifaqa afisusee amiqimmasee maridaqa.

22Mi anaaseefa faiqara qaarisaa ufiqira qamunna auqidanoo. Mifa aakianda amiqira sandannai auqira qamunna kai afisidanoo.

23Aiqama uriqararausa mina afaaqiara uriqararafee qidaqa. Mi fasiqafa maqusa qambaanai faiqí firaasa faqa marida ufa qimarifaqa aiqamausa mina ufa iridaqa.

24Mi anaaseefa qamunna faqa nooiqandi mariana faqa auqi marifaqa ainaina faqaasa ani feefauridaqa.

25Mi anaaseena afeeka faqa andeeqarana faqa mifa qamunnara foora afisinoo maridanoo. Mifa kasooaqee kambiqaaninna mandainainnara sia rufiaidanoo paasoosidanoo.

26Mina ookiqari firaa amiqira irirafa kai uridanoo.

27Mi anaaseefa narí faiqi namu faqa narí afaaqi faqa ainainasaa rakisidanoo. Sia kudoosaapaidanoo.

28Mi anaaseena faiqi namu nári ninoonara asasiafanoo mina afaaqi fannoo faqa mina amooqidanoo idiki keeqaidanoo maaqi qidanoo.

29Moomoo anaasee amiqira ainaina auqee mariasa maridaqa, anee misa narusee uriqararafa mariananoo.

30Moo anaasee fifau reendeenirafa maridanoo. Amiqira afaaqa faqaafa mina amiqirafa dauni taikaannoo. Yaaweena ufa mau fimari aanaaseena kai amooqiaqa.

31Mifa auqai ainaina akiiqara uriqarara auqu amia. Mifa auqai ainainna fannoo mina auqu uqeerarana amidanoo.

Artistic illustration — an interpretation, not a historical record.

Did you know?

Advice to a King and the Noble Woman

  • The historical identity of King Lemuel is not certainly known outside this passage. His name means dedicated to God, and while rabbinic tradition identified him with King Solomon, the text presents him receiving moral instruction and guidance on righteous leadership directly from his mother.Sources: Lemuel · Mother of Lemuel · the Bible text itself
  • The poem in the second half of the chapter describes a capable woman managing varied economic affairs, including evaluating and buying real estate, planting a vineyard, producing textiles, and trading with merchants, all while providing for her household and aiding the poor.Sources: the Bible text itself

Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.

Credits and license for this translation
Fúka Moodaanaki Kira Ufa Afaqínaasa Ufa
Portions of the Holy Bible in the Binumarien language of Papua New Guinea
Buk Baibel long tokples Binumarien long Niugini
copyright © 1983, 2001, 2017 Wycliffe Bible Translators, Inc.
Language: Binumarien
Translation by: Wycliffe Bible Translators
This translation is made available to you under the terms of the
Creative Commons Attribution-Noncommercial-No Derivatives license 4.0.
You may share and redistribute this Bible translation or extracts from it in any format, provided that:
You include the above copyright and source information.
You do not sell this work for a profit.
You do not change any of the words or punctuation of the Scriptures.
Pictures included with Scriptures and other documents on this site are licensed just for use with those Scriptures and documents.
For other uses, please contact the respective copyright owners.
2013-08-10

Source: http://png.bible/bjr/ · eBible.org

Talk to us

Tell us where you read from, how the Bible has helped you, or what we could improve. We read every message.