Nations Bible

Matthew 7

Sunbin-Got em Kitakamin Weng · Tap a verse to see its cross-references.

1Yangeko, Yesus e iti weng mak bokoyemomele: “Yu kanelom mali kawtiw ilo geeyembokoliw te! Yu ilo geeyembiw tewe, Sunbin-Got e yukati geeyemboke kasike. 2Yu kilele kililina! Sunbin-Got e yulo yukalem mali kawtiw ilo geeyembiliw kukuw beemdiw bakati geeyemboke kasike. Yu nomin sawa weng mak kuluko, kitil kuw kebomi, mali kawtiw ilo geeyemiw tewe, Sunbin-Got akati sawa weng be kuluko, kitil kebomi, yulo bakalem ki akate geeyemoke te.

3Yutaka! Kukun atew mak yom kawkunum kusel im kiin be net keyembe tewe, yu kukun be fein atebiliw kate, yukalem kiin dim em am mili sel atew eisneng kiin kasi koyemkabe be yu ibolow fukuninba kebiliw a? 4Fimdi famde kawtiw yutaka! Yu yom kawkunum kumel biilo bokoyemomeliw: ‘Nakunum kumel yutaka! Nu yom kiin net kasiyembe ais kukun be kulu kolewokoluw te!’, yangbiliw kate, am mili eisneng atew yukalem kiin kasi koyembe be yu nam atemiw te! 5Feinka! Emisik e, yu yukalem kiin dim em am mili be kulu kolewsomi, iti kiin ken boliwka! Beemteben e, yu uneko, yom kawkunum kumel biim ais kukun bakati kulu koyemoliwka!

6Yu kilelbi boliw te! Mesesem eisneng mak Sunbin-Got e akalem wiin so amkose eisneng mak yu kanelom wiin banim atew keleweko, kut mian atul nam ilo dukalewbokoliw te! Mesik isik i famdes teleko, yulo yen wanokoliw kasike. Beemdiw, yu kanelom bonang on kisol mak kaing biim biliw dim elo duyemoliwka! Kaneliw tewe, i sak deit san san keleweko, kawtol kawtol kelokoliw kasike.”, yangse kale.

Sunbin-Got em Ken Eisneng Duyemkabe em Weng te.

7Yangeko, Yesus e iti weng mak bokoyemomele: “Yu mesesem mesesem eisneng mak Sunbin-Got elo dakalaliw tewe, e fein kiliko, yulo dukayemboke te. Beemdiw, yu mesesem mesesem eisneng mak fenemiw tewe, yu mesesem be fein atebamokoliw te. Yu abisom dim kel gogo keemiw tewe, Sunbin-Got e am yal be busuyemoke te. 8Nimtew angom? Mali kawtiw mak mesesem mesesem eisneng mak Sunbin-Got elo dakalaliw tewe, e ilo fein dukayemboke kasike. Beemdiw, mali kawtiw mak mesesem mak fenemiw tewe, i mesesem be fein atemokoliw te. Iti beemdiw, mali kawtiw mak abisom dim gogo keemiw tewe, Sunbin-Got e am yal be fein busuyemoke kasike.

9Auk so alew so yutaka! Yom muluwel i yulo bokoyemomeliw: ‘Yemen mak duyemew kano, nu wanuma!’, yangeko, yulo dakalaliw tewe, yu ilo nam tum mak duyemeko, ‘Wanina!’ yangbokoliw te. 10Beemdiw, yom muluwel i yulo bokoyemomeliw: ‘Takam mak duyemew kano, nu wanuma!’, angeko, dakalaliw tewe, yu ilo nam ambew mak duyemeko, ‘Wanina!’, yangbokoliw te. 11Auk kumel aliwol yu sili sili nam kawtiw kate, yu yom muluwel ilo ken eisneng duyemkabiliw kasike, yukal kilele kal kemoliwka! Yom abiil tikin alakabe sen banim so Kalew be kalfongsomi, yulo ken eisneng fein dukayemkabe te. 12Yu kililina! Yu ibolow tem kel fukunomeliw: ‘Kawtiw i nulo kukuw ken kuw kukuyemoliwka!’, angbiliw kasike, yukati mali ilo yukalem ibolow fukunin bakatetew keyemboliwka! Kaneliw tewe, yu Moses em kukuyemin weng beem mongom so, Sunbin-Got em bontem dim bakamin kunum biim yangsiliw weng beem mongom so, alik alik be ki kelewokoliw te.”, yangse kale.

Abisom Fong Gel em Fakam Weng te.

13Yangeko, Yesus e iti fakam weng mak bokoyemomele: “Yu abisom fong gel beem kawtem unomin bukeko, gulas matem unoliwka! Kate, kawtiw banso i abisom fian kawtem uneko, weing dong tem unekabiliw deiw fian sel beelo gelewkabiliw te. 14Gelewkabiliw kate, finik so bin deiw so finik so bin em abisom so be atin fong gel kuw kasike, kunum waneng banban i abisom so deiw so be ateminba kekabiliw te.”, yangse kale.

Ais Dem Gilakabe em Fakam Weng te.

15Yangeko, Yesus e iti fakam weng mak bokoyemomele: “Yu dasuw selew selew kunum im funum funum keyembiliw kukuw be kilelbiko, boliwka! I kom mit teleko, kal dim kel ken kuw kelokoliw kate, biim ibolow mutuk kawyak e, i kut mian atul nam atew kesomi, yulo yen wanokoliw kasike. 16Kate yu biim kukuw be kilele diw atebamoliwka! Beem dulum elote, yu fakam weng be ibolow fukunina! Ais daon e nam ki keko, seil gilaloke te. Beemdiw, ais be nam ki keko, sum gilaloke te. 17Yu kililina! Ais ken mak dem ken kuw gilaloke kate, e ki keko, wa dem mak nam gilaloke te. Beemdiw, wa ais mak dem wa kuw gilaloke kate, e ki keko, dem ken kuw nam gilaloke 19kasike, kawtiw i dem ken gilalinbakabe ais beelo sek so okileweko, ful ais dalokoliw te. 20Feinka! Yu kawtiw im kanekabiliw kukuw beem dem e diw atemeko, kal kesomi, bokolomeliw: ‘Kawtiw biim dem e wa kasike, i dasuw funum kawtiw kuw ite te!’, angokoliw te. Angeko, mali kunum waneng im dem bakati diw atemeko, ‘Ite fein kunum waneng kebiliw te!’, angeko, kal kelokoliw te.

21Yu kilelbiko, boliwka! Mali kawtiw i nelo ‘Kamok Fian o! Kamok Fian o!’, nangbiliw kate, i abiil katem alakabe Aatim beem ibolow fukunin gelewinba keliw tewe, i abiil tikin em gawman ding keloke dim em wati tak nam uneko, ka biw te. 22Feinka! Sunbin-Got em kunum waneng alik alik ilo diweko geeyemoke ding dim e, mali kawtiw banban i nelo bokonemomeliw: ‘Kamok Fian a! Kamok Fian a! Kom wiin dim ete nu oktakak kunum keko, aneng matil anbakalako, kitil eisneng fian mak aluwkabuluw kasike, ku nulo kom ken abiw dim beelo yemde unolewka!’, nangokoliw te. 23Nangokoliw kate, beem ding dim bakate, ne yan weng mak kaim filel bokoyemomeli: ‘Ne yulo itel gel so mak akokow te. Yu atin kuw ibolow sili sili nam min kasike, fongate akate nem mit kale asinina!’, yangoki te.”, yangse kale.

Am Gemin em Fakam Weng te.

24Yangesomelei, Yesus e iti fakam weng mak bokoyemomele: “Nem weng be kiliko, fein gelewbiliw kawtiw i kaneko kawtiw ite te? I kunum ibolow fukunin ken so kunum bakatetew kebiliw te. Kunum be ilkul mak kuluko, kawin dim moko, am kun kitil nam kawin mutuk diw kabalak elo mose te. 25Mose kasike, suuk inim fian so ok so dakiko, toloke kate, am be nam fokfok angoke te. Nimew angom? Kunum be am be am kun kitil nam so kawin diw kabalak elo moko, gese kasike. 26Kate, nem bokoyemsi weng be kililiw kate, kilele gelewinba kebiliw kawtiw i ibolow fukunin banim kunum bakatetew kebiliw te. Kunum be ok ais am kun kuw kuluko, kawin tikin kayak kuw moko, am gese te. 27Gese kasike, suuk inim fian tele ding dim e, am be duneng duneng keko, atin kuw fokfok mit daloke te.”, yangse kale.

28Yangei, ka biliw kunum waneng banban bi Yesus em kukuyemse weng be kiliko, yol angsiliw kale. 29Nimtew angom? Em bokoyemse weng be Sunbin-Got em kukuyemin weng kalem aulewko, kukyemkabiliw kunum im weng emdiw ba kate, “Yesus em weng be auk so weng kele kai!”, angsiliw kasike.

Artistic illustration — an interpretation, not a historical record.

Did you know?

Judgment, the narrow way, and a firm foundation

  • The event record dates the start of the Sermon on the Mount to AD 28 and its duration to one day. This chapter ends as the crowds are astonished at Jesus’ teaching, because he taught as one who had authority, and not as their scribes.Sources: Sermon on the Mount · the Bible text itself
  • Jesus warns that the judgment a person pronounces, and the measure that person uses, will be turned back on them. He pictures someone who notices a speck in a brother’s eye yet misses a beam in their own, and he says the beam must be removed first.Sources: the Bible text itself
  • The chapter calls doing to others as you would have them do to you the essence of the Law and the Prophets. It contrasts a wide gate and broad way that leads to destruction, which many enter, with a small gate and narrow way that leads to life, which few find, and it compares hearing these words and acting on them to a house built on rock rather than on sand.Sources: the Bible text itself

Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.

Credits and license for this translation
Sunbin-Got em Kitakamin Weng
The New Testament and part of the Old Testament in the Bimin Language of Papua New Guinea
Nupela Testamen na sampela hap Oldpela Testamen long tokples Bimin long Niugini
Copyright © 2008 Bible Society of Papua New Guinea
Language: Bimin
Translation by: Wycliffe Bible Translators
This translation is made available to you under the terms of the
Creative Commons Attribution-No Derivatives license 4.0.
You may share and redistribute this Bible translation or extracts from it in any format, provided that:
You include the above copyright and source information.
You do not make any derivative works that change any of the actual words or punctuation of the Scriptures.
Pictures included with Scriptures and other documents on this site are licensed just for use with those Scriptures and documents.
For other uses, please contact the respective copyright owners.
2016-10-03

Source: http://png.bible/bhl/ · eBible.org

Talk to us

Tell us where you read from, how the Bible has helped you, or what we could improve. We read every message.