Matthew 10
भगवानेन छाचला बुल · Tap a verse to see its cross-references.
ईसु बारे चेलाक हक आपे
1ईसु आपसा बारे चेला काजे धड़े बुलायु ने तीनुक, भुतड़ा नीकाळनेन हक आप्यु, ने आखी भातीन मांदवाड़ ने आखी भातीन लुल्गाय काजे वारु करनेन हक आप्यु।
2तीनु बारे नेवताळान नाव जो छे: पेहलु सीमोन, जु पतरस कह्वाये, ने तेरु भायस अन्दीरीयास; जब्दीन पुर्यु याकुप, ने तेरु भायस युहन्नु; 3ने फीलीप्पुस, ने बरतुल्मे, ने थोमा, ने फाळु लेणे वाळु मत्ती, ने हलफाईन पुर्यु याकुप, ने तद्दे, 4सीमोन, कनानी ने यहुदा ईस्करीयोती ने हयु ईसुक धुकु दीन धराड़ी बी देदु।
ईसु बारे चेला काजे मकलने सी पेहेल सीकाड़े
5हीनु बारे चेला काजे ईसु ज हुकुम आपीन मकल्यु: नी-यहुदी माणसे भीणी घुण जावु, ने सामर्यान काहना बी सहर मां घुण जावु। 6बाकुन ईस्रायेली जातीन माणसे मां जाजु, चे भगवान काजे ईसरीन खुवायला गाडरान तसा हय गुया। 7ने वाट्ये चालता-चालता असो परचार करु, की सरगेन राज धड़ेत आय गुयलो छे! 8मांदला काजे वारु करु, मरला काजे जीन्दा करु, कुड़ायला काजे चुखा करु, भुतड़ान आत्मा काजे नीकाळु। तुहुंक फुकट मां जड़लो छे, तुहुं बी फुकट मां आपु। 9परचार करने जावु तत्यार, तुंद्री थयलि मां सनो, चांदी, नी ते पयस्या घुण ली जावु; 10तुहुं वाट्ये वापरने करीन कांखुर जावु ती चां नीते झुळु राख्जु, नी दुय कुरता, नी खासड़ा, नी लाकड़ी लेजु, काहाकी दाहड़क्या काजे दाहड़की जड़नु चाहजे।
11“काहना बी सहर मां नीते गांव मां जावु, ती चां पुगीन एक अदमीन पतु लागाड़ लेजु, ने चां सी तेरेन चां रवजु।” 12तुहुं घर मां भरायु ती तीनुक संयबरकत आपजु। 13कदी तीना घर मां माणसे भुरसु करन्यु रवसे, तीते तुंद्रो सांतीन संयबरकत हींद्रे पर हय जासे, बाकुन कदी चे भुरसु करन्या नी रहे, ती तुंद्रो संयबरकत तुंद्रे भेळु पछो आवसे। 14जे कुय बी तुंद्रो आव-भाव नी करे, ने तुंद्री वात नी सामळे, ती तीना घर, ने तीना सहर सी नीकळता जाय्न आपणे पायेन धुळा काजे बी झाटकी देजु। 15मे तुहुंक छाचलीन कहं की नीयावेन दाहड़े तीना सहरेन दुख सदोम ने अमोरा देसेन माणसेक अदुस डंड जड़से।
आवणे वाळी गरान बारामां चेला काजे ईसु सीकाड़े
16देखु, मे तुहुंक लेंड्यान तसा माणसेन ईचमां गाडरान तसु मकलो, तेरेसी घड़सान तसा कदर्या ने पेरवान तसा सुदा बणु। 17बाकुन वेरी माणसे सी चेतीन रवु, चे तुहुंक धरीन पंचुन हात मां सुप देसे, ने तींद्रा भक्तीन घर मां ली जाय्न सपाटा देसे। 18तुहुं मेसेक मानी रया करीन हकदार्या ने राजा अगळ ली जासे, काहाकी तुहुं मारा गवा छे। असा करीन तुहुं नी-यहुदी अगळ मारा गवा बणसु। 19जत्यार चे तुहुंक धराड़ीन सीपायड़ान हात मां आप देसे, ती असी फीकुर घुण करु की हामु कसा ने काहली रीती सी कवसुन काहाकी ज काय तुहुंक कह्णु छे, च तीनीत टेमे बताड़ देसे। 20काहाकी कह्णे वाळा तुहुं नी हय, बाकुन तुंद्रा भगवान बासेन जीव-आत्मा तुंद्रेम हय्न बुलसे।
21भाय, भायस काजे अळी बास पुर्या काजे, मारने करीन धराड़से अळी पुर्या आयस बासेन वेला नी हवे ने तींद्रे भीणी उठीन तीनुक माराड़से। 22मारा नाव पर भुरसु कर रया करीन आखा माणसे तुंद्रे सी भुंडा रवसे, बाकुन काहनु बी मरता लग गम खासे, चेत छुटकारु हात करसे। 23जत्यार चे तुहुंक एक सहर मां एला पाड़े ती दीसरा सहर मां ढासी जाजु। मे तुहुं काजे छाचलीन कहं, की माणसेन पुर्या काजे पछु आवणे लग तुहुं ईस्रायेली देसेन आखा सहरेम फीरता-फीरता परचार करनेन काम पुरो नी कराये।
24चेलु आपणा मास्तर सी मटु नी हय सके; ने पावर्यु आपणा मालीक सी मटु नी हय। 25चेला काजे मास्तर, ने पावर्या काजे मालीक बराबर रहणुत वारु छे। कदी माणसे घरेन मालीक काजे भुतड़ु कह्यु, ती तेरा घरन्या काजे काय नी कह्या?
मालीक सी बीहु, माणसे सी मां बीहु
26तेरेमां माणसे सी घुण बीहु; असो काय ढाकायलो नी हय, च उघाड़े असो नी हय; ने असो काय बी सातायलो नी हय, च मालुम नी हवे। 27ज मे तुहुं काजे आंदारला मां कय रयु, तीना काजे तुहुं वीजाळो हवे तत्यार दीसरा काजे सामळाव जु; ज मे काय तुहुं काजे मन मां कह्लु च तुहुं, घरेन छत पर चहड़ीन परचार करजु। 28ज डील काजे खत्तम करे, बाकुन आत्मा काजे खत्तम नी कर सके, तींद्रे सी मां बीहु; बाकुन तेरेत सी बीहु चु आत्मा अळी डील दुयु काजे नरक मां खत्तम कर सके। 29काय एक पयस्या मां दुय घीनचीड़ा नी वेचाये? तेबी तुंद्रा सरग वाळा बासेन मरजी पाखुर तेरे मां सी एक बी मरीन भुयमां नी पड़े। 30तुंद्रा मुणकान कान्या बी आखा गीणायला छे। 31तेरेमां तुहुं बीहयु मां; काहाकी तुहुं तीनु घीनचीड़ा सी बड़ीन छे। पेहला जमाना मायन ईस्रायली माणसेन घरेन छत|alt="Flat-roofed, olden house in Israel" src="lb00234c.tif" size="col" copy="Horace Knowles ©" ref="10:27"
ईसु काजे माननु ने नी माननु
32जु कुय बी माणसे अगळ मेसेक मान लेसे, तीना काजे मे बी आपणा सरग वाळा बास अगळ मान लीस। 33बाकुन जु कुय बी माणसे अगळ मेसेक नी माने, ती मे बी आपणा सरग वाळा बास अगळ तीना काजे नीकारु कर दीस।
ईसुन आवणेन जपाप
34तुहुं मार बारामां असा समजी रया की मे कळी मां सुक-सांती लीन आवलु छे; मे सांती आपणे नी, बाकुन तलवार लीन आवलु छे। 35मार पर भुरसु कर रया करीन, पुर्यु बासेन वीरुद करसे, ने पुरे मायन वीरुद करसे, ने उहड़ीस सासुसेन वीरुद करसे। 36असा करीन मारा चेलान घरन्यात तेरा वेरी बण जासे।
37“जे माय नीते बास काजे मारे सी अदुस परम करसे, चु मार पर भुरसु करन्यु नी हय; ने जे पुर्या नीते पुरे काजे मारे सी अदुस परम करसे, चु मार पर भुरसु करन्यु नी हय; 38ने जे आपणु कुरुस लीन मारे पछळ नी चाले चु मारु भुरसु करन्यु नी हय।” 39जु आपणा जीव काजे बचाड़से, चु खुवसे; ने जु मारे वजे सी आपणी जान खुवसे, तीना काजे जीवन जड़ जासे।
जे तुंद्रो आव-भाव करसे तीनुक भगवान संयबरकत आपसे
40ज्य तुंद्रो आव-भाव करसे, चु मारो आव-भाव करे; ने ज मारो आव-भाव करे, चु मारा मकलने वाळा भगवानेन आव-भाव करे। 41जु भगवानेन अघी सी आवणे वाळी वात देखाड़ने वाळा काजे भगवानेन अघी सी आवणे वाळी वात देखाड़ने वाळु छे करीन तेरो आव-भाव करे, तीना काजे भगवानेन अघी सी आवणे वाळी वात देखाड़ने वाळाक संयबरकत जड़से; ने जे वारलु माणुस काजे वारलु जाणीन आव-भाव करसे, तीना काजे वारलु माणुस काजे संयबरकत जड़से। 42जु कुय ईनु नानला मां सी एक काजे मारु चेलु छे, करीन एक कळस्यु सेळो पाणी पावसे, मे तुंद्रे सी छाचलीन कह्वो की, चु कसु बी करीन आपणो फळ नी खुवे।

Did you know?
The Twelve Sent on Mission
- Simon, called Peter, and his brother Andrew—the first pair named among the twelve—were fishermen from Bethsaida, on the western coast of the Sea of Galilee. James and John, listed next, were sons of Zebedee, a Galilean fisherman who had his own boats and hired servants.Sources: the Bible text itself · Simon Peter · Andrew · Zebedee
- Matthew, identified in the list as the tax collector, was the son of Alphaeus and had formerly been known as Levi; he collected taxes at Capernaum, and the name Matthew means “gift of God.” Thomas, named beside him, was also called Didymus, the Greek equivalent of the Hebrew name, meaning “twin.” Bartholomew means “son of Tolmai” and is generally supposed to have been the same person as Nathanael.Sources: the Bible text itself · Matthew · Thomas · Bartholomew
- Jesus warns that the day of judgment will be more bearable for Sodom and Gomorrah than for a town that refuses the twelve apostles. Easton's Bible Dictionary (1897) describes those cities of the plain of Siddim as destroyed by fire and proverbial for wickedness, and places them, probably close together, near the northern end of what is now the Dead Sea.Sources: the Bible text itself · Sodom · Gomorrah
Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.
Credits and license for this translation
भगवानेन छाचला बुल Bhilali: भगवानेन छाचला बुल (Bible) copyright © 2024 The Word for the World International Language: Bhilali Contributor: The Word for the World South Asia भगवानेन छाचला बुल The New Testament in Bhilali Language The Word For The World This translation is made available to you under the terms of the Creative Commons Attribution Share-Alike license 4.0. You have permission to share and redistribute this Bible translation in any format and to make reasonable revisions and adaptations of this translation, provided that: You include the above copyright and source information. If you make any changes to the text, you must indicate that you did so in a way that makes it clear that the original licensor is not necessarily endorsing your changes. If you redistribute this text, you must distribute your contributions under the same license as the original. Pictures included with Scriptures and other documents on this site are licensed just for use with those Scriptures and documents. For other uses, please contact the respective copyright owners. Note that in addition to the rules above, revising and adapting God's Word involves a great responsibility to be true to God's Word. See Revelation 22:18-19. 2025-04-26
Source: http://ebible.org/bhi/ · eBible.org