Matthew 10
BAL CEHEC JE HAUN · Tap a verse to see its cross-references.
Jisas uqana aposel 12-pela age ijanaga
1Odimei Jisas uqa uqana malogom 12-pela utaadeceb uqaca hocobil uqa buga me qee dana deweneganadec ititacadecnuca, dana hag filfil aqecca dewenega laleg mein eundecca cunug me madecnuca cabi eu ebenegana men.
2Uqana aposel 12-pela age ijanaga eu odi. Casac eu Saimon, ageha Pita egina, odocob uqa waliag eu Andru. Oso eu Jems, uqa Sebedi melah, odocob uqa waliag eu Jon. 3Odocob Filipca, Batolomjuca, Tomasca. Odocob Matju, uqa takis cedec dana. Odocob Jems, uqa Alfias melah, odocob Tadias. 4Odocob Saimon, uqa Selot agena am oso, age Juda dana eu Rom dana Judia hatunadec ititacadecnu egina. Odocob Judas Iskariot, uqa hibna Jisasnu balijimei uqana cad ebenegana muden.
Jisas uqa aposel 12-pela agena cabi aden
5Jisas uqa dana 12-pela eu suladi maaden, “Juda dana qee eundec agena hatuna cain lowain. Sameria agena jobon oso cain lowain. 6Qee. Age Isrel sihuldec sipsipwe dad mi cobogina eundecca leigale. 7Age eu cocobi me je qasali maadeiga, ‘Sao cul jobon cemenega hona,’ adeiga. 8Hag nijegina eu me madeiga. Cal mein eundec tuliadeiga. Lepra hewadec eu eeladeiga. Buga me qee dana deweneganadec ititacadeiga. Age eu odocnu gagadic odoc i qee fajelein, age gauc loo adem. Eunu ageha gauc loo adeigale,” aden.
9“Age gold qaigca, silwa qaigca, kopa qaigca agena oologamna u tacecnu cain walowain. 10Dana cabi ona eu uqana cabinu sab jec wadac gulucdocnu ihoc bilina. Eunu jic cobocnu ceteh oso cain hewowain. Age badom cain hewi cobowain. Lotoc lecisca cain hewi belowain, osol himec taceiga. Jaimaga tacec eu cain tacowain. Jic coboc kom ha cain hewi cobowain,” aden.
11“Age jobon osoosona limeig age dana oso hutan meca bilinafo eunu sisiladi feigale. Odocob oso hutan me bilecebfi age uqana jona bibileig li jobon eu culimeig beleiga. 12Age jo euna leleig dana cajaca age jo euna bilec eu maadoqagan, ‘Anut eeladeiale,’ adoqagan. 13Aria, jo euna bilec eundec dana mefi eu agena eeladec je dewenega fagdugian. Euqa jo euna bilec eundec eeladec je eu ocnu ihoc qeefi agena eeladec eu ceseli ageca hugian. 14Odocob dana oso age oiadecnu agena je ha dah mecnu culecebilfi age jo eufo, jobon eufo cuculadi beloqaga bili comis jaimagana fagdon eu qoidu heleiga. 15Ija mele maadigina, Gesiladec Deel Benna jobon eu ameg me qee bahic ugian. Dana cajaca Sodom Gomora bilein eu ageha Gesiladec Deel Benna ameg me qee oqagan. Euqa jobon eu agena je hibemdogina jobon eu agena ameg me qee eu Sodom Gomora agena ameg me qee wooldugian,” aden.
Culumen ben filfil malogomca caligian
16Jisas je haun maaden, “Feiga, ija age suladigina odi sipsip age qa cus gemo leginawe suladigina. Eunu age man sononec doc silecca odi cisdudu coboginawe coboigale. Euqa age cuhudid qauecca qee odi coboigale,” aden.
17“Age dananu dah qut coboigale. Age gesiladecnu cegulec amegna ehi li madimeig agena cuha jona ha qisaadoqagan. 18Ageha ija cilehtecnu cisdumeig gabman ilo kingca amagana ehi li madecebil tawoqagan. Odimeig age ijana me je gabman ilo kingca Juda dana qee eundecca maadoqagan. Saen euna age dana amagana wawaga meleec age eu doqagan eunu qasali madoqagan. 19Age age gesiladecnu cegulec amegna madecebil saen euna Anut je adeceb je eu tutuc madoqagan. Eunu age casac cel je cel je madigen eu cain saciadowain. 20Ge, agedodoc je qee madowain. Memegana Kis eu age uqa co tawecebil je madigian,” aden.
21“Saen euna dana waliagwaliagnu balijimeig age walinigail aqecebil cal moqagannu gesilec jona madoqagan. Memegail ageha agena melnu balijuqagan. Mel age memegail anagailnu cajimeig age aqoqagannu gesilec jona madoqagan. 22Odocob ija ijani hewegina eunu dana cajaca cunug age agenu gemanaga beceb sagagadoqagan. Euqa dana cajaca cunug age ceteh eu cunug wooldudu cit qoc gadacna calegina eu Anut uqa age cahahaadigian. 23Ija mele maadigina, age jobon oso cuculi busali osona li bilec odi oodi Isrel agena jobon cunug qee li hedoc ninijeb Dana Melah ceseli hugian. Eunu dana age jobon oso aqati tootooadecebil busali jobon osona beli bileiga,” aden.
24“Malogom uqana iwaldoc wooldoc qee nijel. Odocob cabi danaha uqana dana ben qee wooldona. 25Malogom uqa uqana iwaldoc cinigwe bilina eu ihoc. Cabi danaha uqa uqana dana ben cinigwe bilina eu ihoc. Age jo gug jajabi Bielsebul doin eunu ege doqona, uqana jo eundec ha odi jajabadi je me qee bahic maadoqagan,” aden.
Dana age Anutnu dih cucuiuqagan
26Jisas je haun maaden, “Ceteh cunug jahuldoc nijina eu isi camasac migian. Odocob ceteh cunug jahunec nijina eu isi cunug doqagan. Eunu age dananu cain cucuiuwain. 27Ija tuna jahuni je maadigina eu cahinegna dana amagana madeigale. Ija age jahna maadecemin dah megina eu jo ohisna tatawi dana cajaca cunug qasali maadeigale. 28Dana age dewenega cal mecnu qoc fegina qa dolonoga cal mecnu qoc eu qee fegina eundecnu cain cucuiuwain. Qeeo. Age Anutnu dih cucuiuqagan. Uqa dewenega dolonogaca eu oloqanih jana fadaligiannu ihoc nijina,” aden.
29“Feiga, man fululec nag eundec lecis toea osolna idadogina. Man fululec eu age oso age Memega qee madec mahana qee tonena. 30Age gosiniga ilomogana nijia euqa cunug Anut wele sanijen bilia. 31Eunu cain cucuiuwain. Agena fajec eu man fululec nag mati agena fajec wooldoc nijia,” aden.
Ege Jisasna malogom ec madecnu cain majanaga adeiaun
32Jisas je haun maaden, “Eunu oso uqa dana amagana tatawi ijanu madi madena, ‘Ija Jisas uqana malogom,’ ena eu uqanu ijaha Mei sao jobon bilia amegna madigen, ‘Eu ijana,’ igen. 33Osoqa uqa dana amagana tatawi ijanu qee sasac qu madena, ‘Ija Jisas uqana malogom qee,’ ena eu uqanu ijaha Mei sao jobon bilina amegna madigen, ‘Dana i ijana qee,’ igen!” aden.
Jisasna malogom age Jisas nalug moqagan
34Jisas je haun maaden, “Age wawagana cain madowain, Jisas uqa mahana malol bilec igecnu hon owain. Ija malol bilec mahana ahu mecnu qee holom. Ija han cadec ehi nem. 35Ge, ija dana cajaca qatanadecemin
‘mel oso memegna cad ibuldugian,
odocob mel aid uqa anagna cad ibuldugian,
odocob huhighuhigca ale cad biluwasan’
eunu hom.
36‘Odocob dana uqana jona bilegina eundec
age wawaga filfilca uqana cadca biluqagan,’” aden. (Maika 7.6)
37“Oso uqa memeg anagcanu ija wooltiti nalunula menafi eu ijana bilecnu ihocca qee. Oso uqa melahnuca ategnuca ija wooltiti nalug menafi eu ijana bilecnu ihocca qee. 38Oso uqana na babalec gahidu ija tooti cobocnu culinafi eu uqa ijana bilecnu ihocca qee. 39Oso uqa uqana cebac bilec hewigia odona eu uqa uqana cebac bilec felacudigian. Oso uqa ijana bilina eunu uqana cebac bilec felacudecebfi eu uqana cebac bilec ugian,” aden.
Dana age Kraisna sihul cesuladegina eundec age ameg me oqagan
40Jisas je haun maaden, “Dana oso uqa age ehadi uqaca bilecnu cudun culiadena eu uqa bilec cudun ija culitena. Oso uqa ija bilec cudun culitena eu Anut sulten eu bilec cudun culitona. 41Oso uqa je hahun madec dana oso uqa je hahun madec dana bilina eunu bilec cudun culitocobfi eu uqa je hahun madec dana ameg me oc eu ugian. Oso uqa dana ititom oso uqa dana ititom bilina eunu bilec cudun culitocobfi eu uqa dana ititom ameg me oc ha ugian. 42Oso uqa mel sim eundec oso uqa ijana malogom bilina eunu wa daec oso dih wetidocob jecebfi ija mele maadigina, uqa ameg me oc eu culecwe qee,” aden.

Did you know?
The Twelve Sent on Mission
- Simon, called Peter, and his brother Andrew—the first pair named among the twelve—were fishermen from Bethsaida, on the western coast of the Sea of Galilee. James and John, listed next, were sons of Zebedee, a Galilean fisherman who had his own boats and hired servants.Sources: the Bible text itself · Simon Peter · Andrew · Zebedee
- Matthew, identified in the list as the tax collector, was the son of Alphaeus and had formerly been known as Levi; he collected taxes at Capernaum, and the name Matthew means “gift of God.” Thomas, named beside him, was also called Didymus, the Greek equivalent of the Hebrew name, meaning “twin.” Bartholomew means “son of Tolmai” and is generally supposed to have been the same person as Nathanael.Sources: the Bible text itself · Matthew · Thomas · Bartholomew
- Jesus warns that the day of judgment will be more bearable for Sodom and Gomorrah than for a town that refuses the twelve apostles. Easton's Bible Dictionary (1897) describes those cities of the plain of Siddim as destroyed by fire and proverbial for wickedness, and places them, probably close together, near the northern end of what is now the Dead Sea.Sources: the Bible text itself · Sodom · Gomorrah
Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.
Credits and license for this translation
BAL CEHEC JE HAUN Genesis and the New Testament in the Amele language of Papua New Guinea Buk Stat na Nupela Testamen long tokples Amele long Niugini copyright © 1997 Wycliffe Bible Translators, Inc. Language: Amele Contributor: Wycliffe Bible Translators This translation is made available to you under the terms of the Creative Commons Attribution-Noncommercial-No Derivatives license 4.0. You may share and redistribute this Bible translation or extracts from it in any format, provided that: You include the above copyright and source information. You do not sell this work for a profit. You do not change any of the words or punctuation of the Scriptures. Pictures included with Scriptures and other documents on this site are licensed just for use with those Scriptures and documents. For other uses, please contact the respective copyright owners. 1997-01-01
Source: http://png.bible/aey/ · eBible.org