Matthew 7
Ri utzilaj tzij re ri kanimajawal Jesucristo · Tap a verse to see its cross-references.
Miqꞌat tzij pakiwi jujun chik
1»Miꞌan ri xa piwe riꞌix kixuꞌan aj qꞌatal tzij pakiwi jujun chik, chaꞌ jelaꞌ na kaqꞌat ta tzij piwi riꞌix. 2Ma e ruꞌanik kiqꞌat tzij riꞌix pakiwi jujun chik, jelaꞌ kuꞌan ri Dios piwi riꞌix; ma rukꞌ ri pajbꞌal kixpajan wi, rukꞌ laꞌ kixpaj wi riꞌix.
3»¿Suꞌchak e lik katzutzaꞌ rukꞌaj cheꞌ kꞌo chupa ruwach rawatz-achaqꞌ yey e na katok ta kꞌu il che resaxik ri cheꞌ qꞌebꞌel chupa rawach riꞌat? 4Y we qꞌebꞌel la jun cheꞌ chupa rawach riꞌat, ¿utz nawi kabꞌiꞌij che rawatz-achaqꞌ: “Chayaꞌa luwar chwe kanwesaj la jun ukꞌaj cheꞌ kꞌo chupa rawach”? ¡Na utz taj! 5¡Xa kebꞌ apalaj! Nabꞌe na chawesaj lo la cheꞌ qꞌebꞌel chupa rawach riꞌat, y jelaꞌ kat-tzuꞌn chi utz chaꞌ katoꞌ rawatz-achaqꞌ che resaxik lo rukꞌaj cheꞌ kꞌo chupa ruwach rire.
6»Miya chikiwa ri tzꞌiꞌ janipa ri lik chom chwach ri Dios, ma kꞌaxtaj kepe chiwij y kakiraqachꞌij ipa; jekꞌulaꞌ mikꞌaq chikiwach ri aq ri perlas kꞌo iwukꞌ, ma kꞌaxtaj xa kakixiqꞌixaꞌ uwiꞌ.
Chitzꞌonoj che ri Dios janipa ri kajawax chiwe
7»Janipa ri kajawax chiwe, chitzꞌonoj che ri Dios y kayaꞌiꞌ chiwe; chitzukuj rukꞌ Rire janipa ri kajawax chiwe y kiriqo; chichꞌaꞌbꞌej Rire y lik kixukajmaj loq. 8Ma china ri kutzꞌonoj ri kajawax che, kukꞌul na; china ri kꞌo kutzukuj, kuriq na; y china ri kachꞌaw pan che ruchiꞌ ja, kajaqiꞌ na lo che.
9»¿Kꞌo nebꞌa juna achi chixoꞌl, we rukꞌajol kutzꞌonoj pam, kuya juna abꞌaj che; 10o we kutzꞌonoj kar, kumatz ri kuya che? ¡Na jinta junoq! 11Ekꞌu riꞌ riꞌix tobꞌ xa ix tikawex na lik ta utz ikꞌuꞌx, na rukꞌ ta kꞌu riꞌ, kiriq uyaꞌik chomilaj taq sipanik chike riwalkꞌoꞌal. ¡Makꞌuwariꞌ ri Qaqaw Dios kꞌo chilaꞌ chikaj kuya chomilaj taq sipanik chike ri ketzꞌonow re che!
12»Ekꞌu riꞌix chiꞌana chike ri tikawex jelaꞌ pachaꞌ ri kiwaj kakiꞌan rike chiwe. Ma e utaqanik waꞌ Rutzij Upixabꞌ ri Dios tzꞌibꞌital kan kuma ri Moisés y ri qꞌalajisanelabꞌ.
Ri okibꞌal chꞌutiꞌn uwach
13»Chixok bꞌi che ri okibꞌal chꞌutiꞌn uwach. Ma ri okibꞌal y ri bꞌe keꞌek chi xibꞌalbꞌaꞌ lik nim uwach, yey lik e kꞌi ri kebꞌok bꞌi chiriꞌ. 14Noꞌj ri okibꞌal y ri bꞌe keꞌek chi kꞌaslemal na jinta utaqexik, lik chꞌutiꞌn uwach, yey na e ta kꞌi ri kebꞌok bꞌi chiriꞌ.
Ruchꞌaꞌtem ri tikawex kukꞌutu saꞌ ri kꞌo pa ranimaꞌ
15»Lik chichajij iwibꞌ chikiwach ri kakibꞌiꞌij e qꞌalajisanelabꞌ re ri Dios yey xa e sokosoꞌnel. Ma waꞌ kekꞌun iwukꞌ riꞌix lik chakojoꞌ utz kikꞌuꞌx, noꞌj chupa ri kanimaꞌ xa pachaꞌ e utiw lik e bꞌiqꞌonel. 16Ekꞌu riꞌix kiwetaꞌmaj saꞌ ri kꞌo pa kanimaꞌ ri tikawex ruma ri kakiꞌano, we utz o na utz taj.
»E pachaꞌ taq ri cheꞌ: ri kꞌiix, na uva ta rujiqꞌobꞌalil kuyaꞌo; yey ri xulukej, na higos ta rujiqꞌobꞌalil kuyaꞌo. 17Jekꞌulaꞌ juna chomilaj cheꞌ, lik chom rujiqꞌobꞌalil kuyaꞌo; noꞌj ri cheꞌ na chom taj, na jinta uchak rujiqꞌobꞌalil kuyaꞌo. 18Ri chomilaj cheꞌ na ubꞌe taj we na chom ta rujiqꞌobꞌalil kuyaꞌo; jekꞌulaꞌ ri cheꞌ na chom taj na kuya ta ujiqꞌobꞌalil chom. 19Yey ronoje cheꞌ we na chom ta rujiqꞌobꞌalil kuyaꞌo, kachet bꞌi y kaporox pa aqꞌ. 20Riꞌix kiwetaꞌmaj kꞌu uwach juna cheꞌ ruma rujiqꞌobꞌalil kuyaꞌo; jekꞌulaꞌ kaqꞌalajinik saꞌ taq ri kꞌo pa kanimaꞌ ri tikawex ruma ri kibꞌinik kisilabꞌik.
Na konoje taj kebꞌok chilaꞌ chikaj
21»Na konoje ta ri kakibꞌiꞌij chwe “Qajawal, Qajawal” kebꞌok chilaꞌ chikaj pa rutaqanik ri Dios, ma xew kebꞌok ri kakiꞌan ri rajawal ukꞌuꞌx ri Nuqaw kꞌo chilaꞌ chikaj. 22Kopon kꞌu ruqꞌijol echiriꞌ ri Dios kuqꞌat tzij pakiwi ri tikawex, yey chupa laꞌ la qꞌij lik e kꞌi ri kakibꞌiꞌij chwe: “Wajawal, Wajawal, riꞌoj xqaꞌan qꞌalajisanik chupa ri bꞌiꞌ la chike ri tikawex. Yey chupa ri bꞌiꞌ la xeqesaj bꞌi ri itzel uxlabꞌixel y pa ri bꞌiꞌ la xqaꞌan ukꞌiyal milagros” kechaꞌ. 23Ekꞌuchiriꞌ, riꞌin jewaꞌ kambꞌiꞌij chike: “Na xinwetaꞌmaj ta kꞌana iwach, chixela wukꞌ; ma riꞌix xew ix ꞌanal re ri lik itzel uwach.”
Ri ja tzꞌaqom lo paꞌbꞌaj y ri ja xꞌaniꞌ pa sanyebꞌ
24»China kꞌu ri kataw re ri nutzij yey kuꞌan janipa ri kambꞌiꞌij, kanjunimaj rukꞌ jun achi lik kꞌo unaꞌoj ma xutzꞌaq lo ri rocho paꞌbꞌaj. 25Xpe kꞌu lo ri jabꞌ, lik xnimar taq ri nimayaꞌ y xpe lo unimal kaqjiqꞌ y xumachꞌ ribꞌ che ri ja; na rukꞌ ta kꞌu riꞌ, ri ja na xtzaq ta ubꞌi, ma paꞌbꞌaj tzꞌaqom lo wi. 26Noꞌj kꞌu ri kuta ri nutzij yey na kuꞌan ta janipa ri kambꞌiꞌij, kanjunimaj rukꞌ jun achi na jinta unaꞌoj, ma xuꞌan ri rocho pa sanyebꞌ. 27Xpe kꞌu lo ri jabꞌ, xenimar taq ri nimayaꞌ, xpe lo unimal kaqjiqꞌ y xumachꞌ ribꞌ che ri ja. Ekꞌu riꞌ ri ja xwuluwubꞌ bꞌi y xsach uwach» xchaꞌ.
28Echiriꞌ xukꞌis ubꞌiꞌxik waꞌ ri Jesús, ri winaq lik kaminaq kanimaꞌ che rukꞌutunik, 29ma ruma rukꞌutunik kaqꞌalajinik lik kꞌo uwach, na xa ta pachaꞌ ri kakiꞌan raj kꞌutunel re ri tzijpixabꞌ.

Did you know?
Judgment, the narrow way, and a firm foundation
- The event record dates the start of the Sermon on the Mount to AD 28 and its duration to one day. This chapter ends as the crowds are astonished at Jesus’ teaching, because he taught as one who had authority, and not as their scribes.Sources: Sermon on the Mount · the Bible text itself
- Jesus warns that the judgment a person pronounces, and the measure that person uses, will be turned back on them. He pictures someone who notices a speck in a brother’s eye yet misses a beam in their own, and he says the beam must be removed first.Sources: the Bible text itself
- The chapter calls doing to others as you would have them do to you the essence of the Law and the Prophets. It contrasts a wide gate and broad way that leads to destruction, which many enter, with a small gate and narrow way that leads to life, which few find, and it compares hearing these words and acting on them to a house built on rock rather than on sand.Sources: the Bible text itself
Notes written with AI assistance from open sources (Theographic Bible Metadata, CC BY-SA 4.0; Easton’s Bible Dictionary, public domain) and reviewed before publishing.
Credits and license for this translation
Ri utzilaj tzij re ri kanimajawal Jesucristo New Testament in Achi Rabinal; acr (GT:acrN:Achi) copyright © 2009 Wycliffe Bible Translators, Inc. Language: Achi Dialect: Rabinal Translation by: Wycliffe Bible Translators, Inc. Copyright Information © 2009, Wycliffe Bible Translators, Inc. All rights reserved. This translation text is made available to you under the terms of the Creative Commons License: Attribution-Noncommercial-No Derivative Works. ( http://creativecommons.org/licenses/by-nc-nd/3.0/ ) In addition, you have permission to port the text to different file formats, as long as you do not change any of the text or punctuation of the Bible. You may share, copy, distribute, transmit, and extract portions or quotations from this work, provided that you include the above copyright information: You must give Attribution to the work. You do not sell this work for a profit. You do not make any derivative works that change any of the actual words or punctuation of the Scriptures. Permissions beyond the scope of this license may be available if you contact us with your request. The New Testament in Achi © 2009, Wycliffe Bible Translators, Inc. All rights reserved. This translation is made available to you under the terms of the Creative Commons Attribution-No Derivatives license 4.0. You may share and redistribute this Bible translation or extracts from it in any format, provided that: You include the above copyright and source information. You do not make any derivative works that change any of the actual words or punctuation of the Scriptures. Pictures included with Scriptures and other documents on this site are licensed just for use with those Scriptures and documents. For other uses, please contact the respective copyright owners. 2014-04-18
Source: http://ebible.org/acrNNT/ · eBible.org